Аҧсны Аҳәынҭқарра Ахада

 

Рауль Ҳаџьымба Аҧсны иҟоу Алада Уаҧстәыла Ареспублика Ацҳаражәҳәарҭа даҭааит

08.08.2017

Нанҳәамза 8 рзы, Алада Уаҧстәыла Ареспубликаҟны иҟалаз нанҳәамзазтәи аибашьра жә-шықәса ахыҵра амш аҽны, Аҧсны Аҳәынҭқарра Ахада Рауль Ҳаџьымба Алада Уаҧстәыла Ареспублика Ацҳаражәҳәарҭа даҭааит.

Ахада минуҭктәи аҿымҭрала иҭахаз ҳаҭырла игәалаиршәеит.

«Жә-шықәса ҵит арҭ ахҭысқәа ианрылагаз аҽны инаркны, Аладауаҧстәылатәи ажәлар рзы рыцҳара дуны иҟалаз ахҭысқәа. Қырҭтәыла сааҭк ала Алада Уаҧстәыла Ареспублика адунеи иқәӡамкәа ианнахырц аӡбеит. Зегьы ибзианы иаҳдыруеит уи рылшазҭгьы, убри аҩызаҵәҟьа алахьынҵа ишынҭагылоз Аҧсынгьы», - иҳәеит Рауль Ҳаџьымба.

Аҳәынҭқарра Ахада иазгәеиҭеит Урыстәылатәи Афедерациа иаанарҧшыз агәаҕьра иабзоураны аҭынчра аиқәырхара шалыршахаз, Аҧсни Алада Уаҧстәылеи рыжәларқәа ари рхашҭраны ишыҟам.

Аҧсны иҟоу Алада Уаҧстәыла Ареспублика Аҷыдалкаатәи Амчнаӡазмоуи Ацҳаражәҳәаҩ Олег Боциев иаҵшьны иҳәеит ари амш Алада Уаҧстәыла ажәлар ахааназы ргәаҿы ишаанхо.

«Жә-шықәса ҵит шьҭа аҭынчреи ауаатәыҩсеи ирҿагылоу ацәгьоура бааҧсқәа ируаку ахҭыс аныҟалаз аахижьҭеи. Абри амш аҽны есқьынгьы ула иаахгылоит ҭынч ицәаз Цхьынвал ауааҧсыра аҟәҟәаҳәа ианрылахысуаз», - иҳәеит Олег Боциев.

Уи иазгәеиҭеит, абри ауха ақырҭуа ган аҭынчразы аиҿцәажәарақәа шымҩаҧысуаз Алада Уаҧстәыла аганахьала иҟанаҵаз агрессиа атәы.

Аҷыдалкаатәи Амчнаӡазмоуи Ацҳаражәҳәаҩ Семион Григориев иазгәеиҭеит Урыстәылатәи Афедерациа Аҧсни Алада Уаҧстәылеи аамҭа хьанҭақәа ианырҭагылаз адгылара шрынаҭаз, уи аҧхьаҟагьы адгылара шрынаҭало атәы.

«Урыстәылатәи анапхгара аҭакзыҧхықәу аӡбара аднакылеит Қырҭтәыла аҭынч мҩа разаагаразы имҩаҧнагаз аоперациа ала арҭ ахҭысқәа аринахыс уаҳа имҩаҧымсларц, Аҧсни Алада Уаҧстәылеи аҭынч ҧсҭазаара шьақәгыларц азы», - иҳәеит Семион Григориев.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT