Аҧсны Аҳәынҭқарра Ахада

 

Ахада Хьыбла Герзмава дидикылеит

06.08.2017

Ахада Хьыбла Герзмава дидикылеит

Нанҳәамза 6 рзы Аҧсны Ахада Рауль Ҳаџьымба идикылеит Аҧсни Урыстәылеи жәлар рартист, «Ахьӡ-аҧша» аорден актәи аҩаӡара занашьоу Хьыбла Герзмава, иара убас XVI амузыкатә афестиваль «Хьыбла Герзмава шәаалыҧхьоит…» иалахәу.

Аҳәынҭқарра ахада асасцәа бзиала шәаабеит ҳәа реиҳәеит.

«Сара сзы гәахәароуп еиҭа Аҧсны шәбара. Ҳара ҳлызгәдууп ҳаеҵәахә - Хьыбла, агәра ганы сыҟоуп ҵҩа змам ахәаҧшыҩцәа рыблақәа хымкыкәа, аҧхарра шрылҭо. Ҳара ҳзы гәадуроуп есышықәса ара имҩаҧысуа афестиваль, Хьыбла илыцны иаауеит ҳахәаҧшыҩцәа насыҧ рызҭо лҩызцәа. Иҳалшо зегьы ҟаҳҵароуп арҭ аусмҩаҧгатәқәа акыраамҭа ицаларц. Иҭабуп ҳәа шәасҳәоит иахьа абра шәахьыҟоу азы», - иҳәеит Ахада.

Хьыбла Герзмава Ахада иҭабуп ҳәа иалҳәеит иҟаиҵаз адкыларазы.

«Иҭабуп иҟашәҵаз адкыларазы. XVI афестиваль ҳаҧсадгьыл аҟны имҩаҧысуеит. Сара сҩызцәа Фабио Мастранџело, Агунда Кулаева, Алеқсеи Татаринцев сыцны сааит. Иахьа инаҳагӡо аконцерт даара иҧшӡоу апрограммала ишьақәгылоуп. Сара сзы гәахәароуп ҳфестиваль азҿлымҳара ду ахьамоу. Иҳалшо зегьы ҟаҳҵоит Аҧсны акультура аизҳазыҕьаразы. Гәахәароуп ҳара ҳзы еиҭа ара аҟазаара, даара ҳаигәырҕьоит апартер аҟны шәбара», - лҳәеит Хьыбла Герзмава.

Адирижиор Фабио Мастранџело аҳәынҭқарра Ахада иҭабуп ҳәа иеиҳәеит ааҧхьаразы, ҷыдала иаҵшьны иазгәеиҭеит Хьыбла Герзмава лбаҩхатәреи лыҧшӡареи ртәы.

«Даара иҭабуп иҳашәҭаз ааҧхьаразы. Хьыбла ҳара дахьаҳҩызоу адагьы, зеиҧш ыҟам аеҵәахәқәа дыруаӡәкуп. Сара сзы гәахәароуп, атәылаҟны ауадаҩрақәа шыҟоугьы, уи лус ахә ҳаракны иахьышәшьо, лусура адгылара ахьашәҭо. Ари атәыла дуӡӡа иадырганы иҟоуп», - иазгәеиҭеит иара.

Аҩада Уаҧстәыла-Аланиа зҽаҧсазтәыз артист Агунда Кулаева иазгәалҭеит Аҧсны лыҧсадгьыл аҟны дыҟазшәа лхы шылбо.

«Иахьа ҩымшуп ара ҳаҟоуижьҭеи, сыҧсадгьыл аҟны саныҟаз еиҧш схы збоит. Хьыбла есқьынгьы сҩызцәа сыцуп лҳәоит, сколлегацәа ҳәа акәымкәа. Ари ҳара ҳзы акраҵанакуеит. Абас гәыкала, ҳаҭырқәҵарала Аҧсны ҳашрыдыркылаз еиҧш ҽаџьара ҳрыдыркыланы исгәалашәом. Ҳконцерт анагӡара ҳаламгац, арахь иҟалараны иҟаз ҟалахьоушәа сгәы иабоит», - лҳәеит лара.

Аҳәынҭқарра Ахада ҷыдала аҵакы аҭаны иазгәеиҭеит Аҧсны иҟоу асасцәа аҩны иҟоушәа рхы рбозароуп ҳәа.

«Ҳара ҳзы акраҵанакуеит аҩны шәыҟоушәа шәхы жәбозар. Акраҵанакуеит иара убас иахьа ауаҧс жәлар рҭыҧҳа ҳ-Хьыбла ссир дахьлывагылоу », - иазгәеиҭеит Ахада.

Аҩада Уаҧстәыла-Аланиа зҽаҧсазтәыз артист Алеқсеи Татаринцев иҳәеит ара ироуыз адкылара артистцәа аҭакҧхықәра шрыднаҵо.

«Еилкаауп Аҧсны штәыла дуум, аха агәаартра, адкылара – ари зегьы ирыцкуп, аҧхарра ду аҵоуп. Шәара иҟашәҵаз адкылара ҳаҭыр дууп ҳара ҳзы. Уи аҭакҧхықәрагьы ҳаднаҵоит. Ҳәарада, ҳаргьы иҳалшо ҟаҳҵоит иҳашәҭаз абзиабара асценаҟнытә ҳҟазарала шәаргьы ишәаҳҭарц азы», - иҳәеит иара.

Акультуреи аҭоурых-культуратә ҭынхеи рминистр Ельвира Арсалиа иазгәалҭеит афестиваль аиҿкааҩцәа аҳәынҭқарра Ахада аконцерт аҿы ишизыҧшу.

«Ҳара, хымҧада, ҳашәзыҧшуп. Иҭабуп ҳәа шәасҳәарц сҭахуп. Аҧсшьара мшқәа шыҟоугьы амаҵзурақәа зегьы аус руеит, иҳацхраауеит афестиваль атрадициақәа инарықәыршәаны. Зегьы аконцерт ахь иааир рҭахуп. Иҭабуп ҳәа иаҳҳәоит амеценат Николаи Ачба, иахьа иара ицхыраарала атеатр ашҭаҟны ишиашоу ицо атранслиациа аиҿкаара алыршахеит. Ҳара аныҳәа ду, аныҳәа ҧшӡа ҳазыҧшуп», - лҳәеит аминистр.

Аҭҵаарадырреи, акультуреи, аҵараиуреи рзы Ахада иабжьгаҩ Владимир Занҭариа иазгәеиҭеит Аҧсны жәларбжьаратәи ахьӡ аларҵәаразы афестиваль инанагӡо ароль атәы.

«Акультура ала ҳара ҳхы еиҭаҳҳәоит, абри аус аҟны аҵакы дуӡӡоуп ари апроект. Иҭабуп ҳәа лаҳҳәоит Хьыбла Леуарса-иҧҳа, абас шықәсырацәала ааҧсарада абри аус дахьаҿу. Сара еилыскаауеит шаҟа лгәы-лыҧсы, шаҟа мчы азылкуа. Лара ааҧхьара рылҭоит амузыкатә елита, даргьы уи ргәаҧханы иақәшаҳаҭхоит. Насыҧ ҳамоуп ҳәа иҳаҧхьаӡоит абас ауаа дуӡӡақәа рыҿцааразы аҭагылазаашьа ахьҳамоу», - иазгәеиҭеит иара.

Ахада иҳәеит иахьатәи аконцерт дшазыҧшу, афестиваль иалахәу зегьы ирзеиҕьеишьеит ақәҿиарақәа, иара убас иҳәеит Хьыбла Герзмава лусураҿы аҧхьаҟагьы леихьӡарақәа дуқәа рыгәра шиго. 

1 (1).JPG

1 (5).jpg

1 (4).jpg
   


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT