Аҧсны Аҳәынҭқарра Ахада

 

Ахада Вадим Ҳаразиеи Инар Гыцбеи идикылеит

04.08.2017

Ахада Вадим Ҳаразиеи Инар Гыцбеи идикылеит

Нанҳәамза 4 рзы Аҧсны Ахада Рауль Ҳаџьымба Ҭырқәтәыла иҟоу Амчнаӡазмоу Аҧсны Аҳәынҭқарра Ахаҭарнак Вадим Ҳаразиеи уаанӡа ари амаҵура аанызкылоз Инара Гыцбеи идикылеит.

Рауль Ҳаџьымба иазгәеиҭеит ҧаса Ҭырқәтәыла иҟаз Амчнаӡазмаз Аҧсны Аҳәынҭқарра Ахаҭарнак иусураан иҟаҵаз шмаҷым.

«Зегь раҧхьаӡа исҳәарц исҭаху, даараӡа аус бзиақәа ҟаҵан. Иҳалҳаршаз маҷӡам Ҭырқәтәыла. Сгәы иаанагоит иҵегьы аҧхьаҟа аусқәа рацәоуп ҳәа. Уи ауасхыр азышьҭеиҵахьан уаанӡа иҟаз шықәсырацәала аҧышәа дуӡӡа змаз Владимир Аҩӡба, уи ишьҭахь Инар Гыцба. Агәра згоит рнапы злакыз аусқәа иҵегь рылҵшәа еиҳаны анагӡара шроуа азы.

Аха уа ҳара ҳнапы злаку, ҳахшыҩ, ҳусқәа зегьы зызку Ҭырқәтәыла иҟоу ҳамҳаџьыр хылҵшьҭрақәеи ҳареи иҳабжьоу аимадара арҕәҕәара, абрахь рҭоурыхтә ҧсадгьыл ахь рхьарҧшра ауп. Уи иахьа-уаҵәы иалагӡаны зегьы рырхынҳәра шҳалымшо бзиаӡаны иаҳдыруеит. Уи азы иаҭахуп иҿиоу аекономика, анхаразы еиҳа еиҕьу аҭагылазаашьақәа. Аха ҳашьцәа агәра дыргара ҳалшароуп ара ишырзыҧшу, ара зегьы ҳаидгылара шаҭаху, милаҭҵас, ҳәынҭқарраҵас ахеиқәырхара ҳалшарц азы.

Иҭабуп ҳәа уасҳәоит даараӡа, Инар. Иҟаҵоу маҷӡам, уара уҷкәынаны, иулшаз ҳ-Аҧсынра иахәоит, ҳмилаҭ хылҵшьҭра уа иҟоуи ара иҟоуи ҳаимадара аизырҳаразы шәызҿыз аусқәа даараӡа рыгәра згоит. Шәарҭ шәызҿыз, ганрацәала имҩаҧыжәгоз аусура иақәнагоу ахәшьара аҭаны, уи иацҵаны, аҧхьаҟатәи аусқәа шәнапы рылашәкып ҳәа сгәы иаанагоит, Вадим Николаи-иҧа. Ирацәоуп, имариаӡам аусқәа.

Агәра згоит Аҧсны иҟоу шәарҭ аус шәыцызуша аусбарҭақәа зегьы напы еибаркырала аусура мҩаҧысыртә ишыҟарҵо.

Издыруеит уахь ицо шәарҭ зегьы шәхы шәшамеигӡо, шәусура алҵшәақәа шроуа. Ҳарҭгьы арантә иҳалшо ала ҳшәыцхраауеит аусура ахаҭабзиара, алҵшәа бзиақәа аиурц азы», - иҳәеит Рауль Ҳаџьымба.

Инар Гыцба иазгәеиҭеит илшо зегьы шыҟаиҵо аҳәынҭқарра аус азы, арҭ ашықәсқәа рыҩныҵҟала иоуз аҧышәа рыцеиҩшара дшазхиоу.

«Аҭакҧхықәра иҳадышәҵаз, раҧхьаӡа инаргыланы, Аҧсны Аҳәынҭқарра, Аконституциа, азакәанқәа, ҳџьынџьуаа рганахьала имҩаҧгатәыз аусқәа инарықәыршәаны ҳусура наҳагӡон ҳәа сгәы иаанагоит. Уахь иҟоу ҳашьцәеи ҳареи ҳаибабара, ҳаизыҟазаашьақәа иҵегьы рырҕәҕәаразы иҳалшо ала адгылара аҳҭон. Иҭабуп идуӡӡаны ҳәа расҳәарц сҭахуп Адәныҟатәи аусқәа рминистррахь схы нарханы. Иара убас Владимир Николаи-иҧа Ҳаразиа Аҧсадгьыл ахь архынҳәразы Аилак ахантәаҩы иаҳасабала ацхыраара ду ҳаиҭон», - иҳәеит Инар Гыцба.

Вадим Ҳаразиа Ахада иҭабуп ҳәа иеиҳәеит агәрагареи иҟаиҵо адгылареи рзы.

«Даараӡа ибзианы еилаҳкаауеит аҭакҧхықәра иҳаду. Ҳәара аҭахума, Владимир Џьамал-иҧа  акыр шықәса аус ииуз ишьҭахь ари аҟара ихаргалаз аусура ацҵара цәгьахозар акәхап, аха иҳалшо ахәыҷ ала уи аизырҳара ҳашьҭалоит. Ишәасҳәарц сҭахуп, Владимир Аҩӡбеи ҳареи ҳшеибабаз, ҳшеицәажәаз, дҳадныҳәалеит, иҳаиҳәеит ацхыраара шҳаиҭо. Ҳәара аҭахума, ишышәҳәаз еиҧш, уа еилых ҟамҵаӡакәа зегьы ҳҳәоу еиқәшәаны, ҳажәҩахыр еибыҭаны аус ҳамур, алҵшәа алҵӡом. Ус иагьыҟаҳҵоит. Агәра ганы сыҟоуп ацхыраара шҳашәҭо азы», - иҳәеит Вадим Ҳаразиа.

Ҭырқәтәыла иҟоу Амчнаӡазмоу Аҧсны Аҳәынҭқарра Ахаҭарнак Иабжьгаҩ Џьансыхә Лазба иазгәеиҭеит раҧхьа ишьҭоу аус иацу аҭакҧхықәра ду атәы.

«Иҳаду аҭакҧхықәра аҩаӡара даара иҳаракуп. Шәымчала, ҳамчала, ҳнапы еибаркны, ахшыҩ, аҧышәа рхархәарала инаҳагӡоит ҳәа сгәыҕуеит аҧсуаа рхеилакқәа рыҟны имҩаҧгатәу аусқәа, ҳаҧсадгьыл, ҳазегьы ҳҽеидаҳкыларц азы иҳалшо ала аус ҳуп ҳәа», - иҳәеит иара.

Адәныҟатәи аусқәа рминистр Даур Ақаҩба Ҭырқәтәыла иҟоу Амчнаӡазмоу Аҧсны Аҳәынҭқарра Ахаҭарнак иаҧхьа ишьҭоу аусқәа рыҟны изеиҕьеишьеит аихьӡарақәа.

«Вадим Николаи-иҧеи сареи изныкымкәа инапы злаку аусқәа ртәы ҳалацәажәахьеит, убри аганахьала иҟаҳҵаша ашьаҿақәа еибаҳҳәеит», - иазгәеиҭеит иара.

Аҧсадгьыл ахь архынҳәразы Аилак ахантәаҩы Беслан Дбар Вадим Ҳаразиа иусураҿы изеиҕьеишьеит ақәҿиарақәа.

«Ҩышықәсеи бжаки Аилак дахьахагылаз, иара иҧышәа, насгьы Ҭырқәтәыла иҟоу ҳдиаспора ахеилакқәеи иареи русеицура аҧышәа ду инаҭеит. Ари агәра снаргоит ҩаҧхьагьы алҵшәа бзиақәа шаадырҧшуазы. Уи, хымҧада, ара Аҧсны иқәынхо ажәлар зегьы ҳазыҧшуп», - иҳәеит иара.

Аиҧылара ахыркәшамҭазы Рауль Ҳаџьымба Инар Гыцба Аҧсны Ахада ихьӡ иадҳәалоу анапхаҵа сааҭ ҳамҭас ииҭеит Ҭырқәтәыла Ареспубликаҟны иҟоу аҧсуа диаспореи Аҧсны ауааҧсыреи реизыҟазаашьақәа рырҿиареи рырҕәҕәареи рыҟны илагаламҭазы.    

2.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT