Аҧсны Аҳәынҭқарра Ахада

 

Ахада ихы алаирхәит асовет еибашьцәа рыҧсыбаҩқәа Ҧсҳәы ақыҭан анышә рамадара ацеремониа

02.08.2017

Ахада ихы алаирхәит асовет еибашьцәа рыҧсыбаҩқәа Ҧсҳәы ақыҭан анышә рамадара ацеремониа

Нанҳәамза 2 рзы Аҧсны Аҳәынҭқарра Ахада Рауль Ҳаџьымба далахәын 1941-1945шш. рызтәи Аџьынџьтәылатә еибашьра Дуӡӡаан Санчаратәи акаҵәара ахьчаразы иҭахаз аибашьцәа рыҧсыбаҩқәа Ҧсҳәы ақыҭан анышә рамадара ацеремониа.

Ацеремониа алагамҭаз, ажурналистцәа рызҵаарақәа рҭак ҟаҵо, Ахада иазгәеиҭеит Ҧсҳәы ақыҭаҟынтәи ауаа ықәҵны имцаратәы, ара рынхара аиҕьтәразы аҭагылазаашьақәа рзаҧҵара шаҭаху. Инаҵшьны дазааҭгылеит ақыҭа уажәтәи анапхгара аус ахьынӡаруа ашықәсқәа ирылагӡаны иҟаҵоу шмаҷым.

«Иргылоуп ашкол, ауахәама. Уи ауаа ргәы шьҭнахит, аусурҭа роуит, анхара иацырҵартә агәаҳәара рнаҭеит. Ари Аҧсынтәыла акәакь хәыҷ иқәынхо ауаа рцивилизациа даҽакала ирзаҧҵазар рықәнагоуп», - иҳәеит Рауль Ҳаџьымба.

Алахьеиқәҵаратә митинг аҟны дықәгыло, Ахада иҳәеит дарбанзаалак зыҧсадгьыл зхы ақәызҵаз асолдаҭ анышә дамадазар шакәу, изызҳауа аҿар ҳахьчаҩцәа ргәалашәара акамыршәра шрылааӡатәу. Иара убасгьы ари аус аиҿкаара иалахәыз аҧсуааи аурысцәеи «Санчара. Ашьхаҳаракыратә фронт-2017» захьӡу аҧшааразы аекспедициа алахәцәеи зегьы иҭабуп ҳәа реиҳәеит.

«Кавказ акаҵәарақәа зықьҩыла ауааҧсыра рхы ақәырҵеит. Иахьа ҳара анышә иамаҳдоит Асовет ар 33-ҩык асолдаҭцәа. Урҭ реиҧш иҟоу аҵеицәа ргәалашәареи иаадырҧшыз афырхаҵара ахамшҭреи уалны иҳадуп Аҧсны иқәынхо зегьы. Ҧсра рықәым Аҧсадгьыл афырхацәа», - иҳәеит Рауль Ҳаџьымба.

Аҟәа араион Анапхгара ахада иқәгылараҟны инаҵшьны дазааҭгылеит 1942ш. нанҳәамза 27 рзы анемец архәҭақәа ақыҭа Ҧсҳәы шааныркылаз, Асовет ар уи цәыббрамза 9 рзы ахы ишақәиҭыртәыз атәы.

«Ара гәыкала имааиз ҳәа аӡәгьы дыҟаӡам. Ҭаацәарацыҧхьаӡа ари аибашьра аӡә дызцәаламӡыз ыҟам. Араион Анапхгара ахьӡала ари аекспедициа иалахәыз, Ҧсҳәы ақыҭа ахадара, иқәынхо ауааҧсыра зегьы иҭабуп ҳәа расҳәар сҭахуп», - иҳәеит Валери Смыр.

Аекспедициа аицеиҿкааҩ, ААР иатәу Д.И. Гәлиа ихьӡ зху Аҧсуаҭҵааратә институт аҭҵаарадырратә усзуҩ еиҵбы Николаи Медвенски иҳәеит, Аџьынџьтәылатә еибашьра Дуӡӡа еилгеижьҭеи 72 шықәса шҵхьоугьы, уи ахҟьа-ҧҟьақәа акыраамҭа иахьатәигьы игылараны иҟоугьы абиҧарақәа ргәы шарцыхцыхло.

«Иахьатәи амш уи арҵабыргуеит. 1942ш. ҧхынгәымза 15 рзы Санчаратәи акаҵәара агаразы аҽазышәараҟны иҭахаз Аахыҵкавказтәи афронт 46-тәи ар 61-тәи ахысратә дивизиа 66-тәи, 307-тәи ахысратә полкқәа 33-ҩык рсолдаҭцәеи рофицарцәеи иахьа анышә иамадан», - ҷыдала иажәаҟны дазааҭгылеит иара.

Николаи Медвенски агәыҕра ааирҧшит зыҧсадгьыл зхы ақәызҵаз аибашьцәа рыҧсыбаҩқәа рыҧшаареи анышә рамадареи ирызку аусурақәа ишрыцҵахо.

«Ҧсҳәы ақыҭан асовет еибашьцәа рыҧсыбаҩқәа анышә рамадара ацеремониа» захьӡу афотоальбом

23.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT