Аҧсны Аҳәынҭқарра Ахада

 

МОСКВА АҚАЛАҚЬ АҞНЫ Ф.А.ИСКАНДЕР ИБАҞА ААРТРА АЦЕРЕМОНИА АЛАХӘЦӘА РАХЬ АХАДА ИНАИШЬҬЫЗ АЖӘА

31.07.2017

Фазиль Абдул-иҧа Искандер - акы иаламҩашьо зхатә цәаҩа змоу, ганрацәала еибарку арҿиамҭа хьыршәыгәқәа рыла адунеитә сахьаркыратә литература зырбеиаз ажәа азҟаза дуны дыҟазаауеит наӡаӡа. Ашәҟәыҩҩы ду иҧсҭазаара далҵижьҭеи шықәсык анҵы аҽны Москва ақалақь Новодевичиетәи аҧсыжырҭаҟны ибаҟа аартра – иара ихьӡ акамыршәреи, иидеиақәеи ихәыцшьеи рынаунагӡатәра ирсимволуп. Ииашаны иагьыӡбахеит ари абаҟа шьаҭас иахьаҭаз иналукааша аҧсуа скульптор Марина Ефрем-иҧҳа Ешба иаҧылҵаз Ф.А. Искандер искульптуратә портреҭ, арҭ аҟазацәа аиҩызара бзиа, арҿиаратә еимадарақәа рыбжьан.

Ашәҟәыҩҩы илитературатә лшамҭақәеи иеихьӡарақәеи рыхә ҳаракны иршьахьеит ажәа азҟазацәа, алитератураҭҵааҩцәа, акритикцәа аӡәырҩы, Урыстәылеиҧш, уи анҭыҵгьы. Иара иаҧиҵаз апрозатә, апоезиатә, апублицистикатә ҩымҭа шьахәқәа рҟны аҧсуа милаҭтә культуреи адоуҳатә цәаҩеи ганрацәала иаарҧшуа, уаҩ илаҧш иҵамшәо амаӡақәа аартуа, угәаҵанӡа инеиртә, ажәа хыркыла иҧсадгьыл Аҧсны дазышәаҳәоит. Иара убас Фазиль Искандер аҧсуа литература ашьақәгылареи аҿиареи еиуеиҧшым аамҭақәа рзы иеицырдыруа аҧсуа авторцәа раҧҵамҭақәа реиҭага ссирқәеи урҭ рҟазара иазку астатиақәеи рыла аҧсуа литература иреиҕьӡоу абаҟақәа адунеи аларҵәараҿы илагала амҽхак дуӡӡоуп.

Аҟәыҕара – аламыс иаӡрыжәыз хшыҩуп; – ари аҵак ду змоу афоризм Фазиль Абдул-иҧа иоуп иаҧызҵаз, уи шаҳаҭра ауеит иарбанзаалак афилософиатәи адоуҳатәи ҵабырг аилкаара шиҷыдаҟазшьаз.

Фазиль Искандер ианашьоуп СССР-и Урыстәылеи р-Ҳәынҭқарратә премиақәа, А.Пушкин ихьӡ зху апремиа, апремиақәа «Иаснаиа Полиана», «Триумф», уб.егь. Иазгәаҭатәуп иара Д.Гәлиа ихьӡ зху Аҧсны Аҳәынҭқарратә премиа шианашьоу. Гәадуроуп ҳара ҳзы иара «Ахьӡ-аҧша» аорден актәи аҩаӡара ахьианашьоу.

Аҧсны Аҳәынҭқарра аҧхьаҟагьы ҳџьынџьуаҩ хьӡырҳәага ихьӡи хәызмам илитературатә ҭынхеи рынаунагӡатәразы иақәнагоу ауснагӡатәқәа мҩаҧнагалоит.

Аҧсны жәлар еснагь гәадуралеи ҳаҭырқәҵара дулеи Фазиль Абдул-иҧа изыҟан, уи иганахьала ирымоу агәбылреи абзиабареи иҭынхаз аҟазара ҳаракы ахә ҳаракны изшьо ргәаҵаҿы наунагӡа иаанхоит!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT