Аҧсны Аҳәынҭқарра Ахада

 

Ахада Аҩныҵҟатәи аусқәа рминистрра аколлегиа инеиҵыху аилатәара далахәын

25.07.2017

Ахада Аҩныҵҟатәи аусқәа рминистрра аколлегиа инеиҵыху аилатәара далахәын

Ҧхынгәымза 25 рзы Аҧсны Аҳәынҭқарра Ахада Рауль Ҳаџьымба Аҩныҵҟатәи аусқәа рминистрра аколлегиа 2017 шықәса актәи азбжазтәи аҩныҵҟатәи аусқәа русбарҭақәа русура алҵшәақәа реихшьала иазкыз инеиҵыху аилатәара далахәын.

Аколлегиа аусура ахыркәшамҭазы Ахада инеиҵыху аилатәара алҵшәақәа еихишьалеит:

«Иҭабуп ҳәа расҳәар сҭахуп зегьы ирылаҵәаз ацәгьоура ҟазҵаз рыҧшаара иалахәыз Аҩныҵҟатәи аусқәа рминистрра ахатә еилазаареи уи аус знапы алакыз зегьи - – Аҳәынҭқарратә шәарҭадаратә маҵзуреи, Апрокуратуреи, Аҳәынҭқарратә ахьчаратә маҵзуреи русзуҩцәа. Иеимадаз, ҳәоуеиқәшәарыла ишьақәгылаз шәусура иҵоуроу алҵшәа ҳнаҭеит. Аха ҳара дҵа хаданы иаҳзықәгылоуп ас еиҧш ацәгьоурақәа зынӡа иҟамлартә еиҧш аҭагылазаашьа аҧҵара. Сара лассы-лассы исҳәалоит апрофилактикеи азҧхьагәаҭареи азинхьчаратә усбарҭақәа русураҿы ихадараны иҟазароуп ҳәа. Ара хшыҩзышьҭра рыҭаны иеиҭарыхәаҧштәуп ацәгьоурақәа рыпрофилактикеи разҧхьагәаҭареи реиҧш иҟоу аус хадақәа знапы алаку аиҵаҟәшақәа жәпакы русурагьы.

Ари аҩыза аусура аҭыҧантәи аусбарҭақәа рыла иалагатәуп, аха, рыцҳарас иҟалаз, урҭ еиҳараӡакгьы ақьаад аҟноуп иахьарбоу, аус иадҧхьалоу маҷуп», - азгәеиҭеит Аҳәынҭқарра Ахада.

Рауль Ҳаџьымба иқәгылараан дазааҭгылеит аҩныҵҟатәи аусқәа русбарҭақәа рматериалтә-техникатә ҭагылазаашьа азҵаарагьы.

«Аҩныҵҟатәи аусқәа рминистрра иахьатәи аамҭазы иаиуа аматериалтә-техникатә цхыраара амҽхак ҭбаам, аха, аҳәынҭқарра иамоу алшарақәа аҽҭагӡаны, адгылара анаҭоит. Атранспорт аганахьала зыӡбахә сҳәахьаз ацхыраара акәзар, иақәнагоу аҧаратә хархәагақәа азоужьуп, хара имгакәа ари аус ӡбахап ҳәа сгәы иаанагоит. Аматериалтә-техникатә еиқәыршәара егьырҭ ахырхарҭақәа ртәы уҳәозар, АКЦ ари азҵаара аӡбара алзыршо ак акәны иҟоуп. Аха ҳабжьара иҟоуп ари аҭагылазаашьа даҽакала хшыҩзышьҭра азҭо ауаа. Ари иашамкәа иазнеиуеит. Ҟалашьа амаӡам амилаҭ иатәу аусбарҭа ахыхь даҽа еилазаарак ахагыло, Аҩныҵҟатәи аусқәа рминистрра анапынҵақәа назыгӡо даҽа еилазаарак ашьақәыргылара. Уи Аҧсны Аҩныҵҟатәи аусқәа рминистрра ацхраароуп хықәкыс иамоу. Ҳара ари аиҵаҟәша аусзуҩцәа хыҧхьаӡарала ишеиҟарахо ҳалацәажәахьеит. Анапхгара азҵаарагьы ӡбоуп», - иҳәеит Аҳәынҭқарра Ахада.

Ахада дазааҭгылеит аилатәараҟны иқәгылоз ишьҭырхыз аштаттә еихшанҵа азҵаарагьы.

«Аштаттә еихшанҵа атәы уҳәозар, шәара шәыҩныҵҟа ишьақәгылоу ахыҧхьаӡарақәа ҿырҧшыс иаазгар сҭахуп. Шәеилазаараҟны иҟоу 2 668 штаттә ак рахьтә ҳазну ашықәс ҧхынгәымза 1 азы 1 698 штат роуп ихарҭәаау. Уи 970 штаттә ак ҭацәуп ауп иаанаго. Сара сгәаанагарала, аштаттә еихшанҵа азҵаара ҳаиҭахәаҧшны, ҳаҧхьа иқәгылоу апроблемақәа еиҕьны рыӡбаразы ҳхы иаҳархәартә ишьақәҳаргылап. Шықәсымзар шықәсык абжьара аштатқәа рхыҧхьаӡареи аусзуҩцәа рхыҧхьаӡареи еиқәшәом. Шәааи, абри аҭагылазаашьа ҳаҧсахып, ҳагьрылагап ҳуаажәларраҟны зыӡбахә рҳәо ареформақәа. Агәра шәсыргоит, зынӡа даҽа хырхарҭақәак рыла алҵшәақәа ҳауа ҳшалаго», - иҳәеит Рауль Ҳаџьымба.

3.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT