Аҧсны Аҳәынҭқарра Ахада

 

Рауль Ҳаџьымбеи Анатоли Бибилови рыпресс-конференциа

07.07.2017

Рауль Ҳаџьымбеи Анатоли Бибилови рыпресс-конференциа

Ҧхынгәымза 7 рзы аиҿцәажәарақәа реихшьалақәа ирызкыз Аҧсны Аҳәынҭқарра Ахада Рауль Ҳаџьымбеи Алада Уаҧстәыла Ареспублика Ахада Анатоли Бибилови рыпресс-конференциа мҩаҧысит.

«Мшыбзиақәа, ҳаҭыр зқәу ажурналистцәа. Аҩ-ҳәынҭқаррак рхадацәа реиҧылара темас иамоуп Алада Уаҧстәылеи Аҧсни реизыҟазаашьақәа ҧхьаҟатәи рыҿиара. Ахырхарҭақәа рацәоуп, ари аамҭа иҭагӡаны ҩ-ганктәи аиқәшаҳаҭрақәа ааба ирыҵаҩуп, аха макьана аус здуулаша азҵаарақәа маҷым, агәра гангьы ҳаҟоуп ҳусеицура ишацҵахо. Ари хымҧада есааира иеизырҳатәу усуп. Иҟан аамҭақәак, ҳаизыҟазаашьақәа еиҳа ихьысҳахо ианалагаз, аха урҭ иеиҳау аҩаӡарахь ишьҭыхтәуп. Аекономика иадҳәалоу азҵаарақәа ыҟоуп, аӡәырҩы алогистикатә зҵаарақәа рықәыргылара аҧсам ҳәа зыҧхьаӡогьы ыҟоуп, аха активла аус здуулаша ахырхарҭақәа маҷым: акультуратә, агуманитартә зҵаарақәа. Иахьа шәара лабҿаба ижәбеит Аҧсны Аҳәынҭқарреи Алада Уаҧстәыла Ареспубликеи Руаажәларратә палатақәа рыбжьара адокументқәа рнапаҵаҩра. Араҟагьы ҳуаажәларра акыр ҧхьаҟа ишцаз убартә иҟоуп», - иҳәеит Рауль Ҳаџьымба.

«Бзиара жәбааит, ҳаҭыр зқәу ажурналистцәа. Ҳәарада, иахьатәи аамҭазы Алада Уаҧстәыла Ареспубликеи Аҧсны Аҳәынҭқарреи ирыбжьоу аизыҟазаашьақәа шыҳаракугьы, ҳара иҳамоуп урҭ реизырҳара алзыршогьы аҭагылазаашьақәа. Шәареи ҳареи ҳабжьара иҟоу аизыҟазаашьақәа шьаҭас ирымоу ҳтәылақәеи ҳажәларқәеи рыхьчаразы азеиҧш проблема иҳамаз акәӡам, урҭ шәышықәсала шәышықәсала ишьақәгыло иаауеит. Агәра ганы сыҟоуп, ҳара ҳагәҭакқәа, Аҧсны Ахада игәҭаки Алада Уаҧстәыла Ахада игәҭаки, раҧхьаӡа иргыланы, ҳажәларқәа ринтересқәа ишрызку.

Ҳаиашьаратә республикақәа рхадацәас иҟалалакгьы, арҭ аизыҟазаашьақәа еиқәҳархалароуп, еихаҳҳалароуп, арҭ аизыҟазаашьақәа ҳабжьазароуп ҳҳәынҭқаррақәа, ҳажәларқәа рыҧсҭазаара аганқәа зегь рыҟны.

Рауль Џьумка-иҧа ишиҳәаз еиҧш, иҳамоу алшарақәа рацәоуп. Ҿырҧшык шәзаазгар сылшоит. Алада Уаҧстәыла Аҭагылазаашьа ҷыдақәа рзы аминистрс саныҟаз, уи иашьашәалоу Аҧснытәи аилазаареи ҳареи аусеицура ҳабжьан. Ҳаиқәырхацәа арахь иааҳашьҭуан, дара аусушьа еиҿырҵаауан, рҧышәа еимардон.

Ҳара аиашьаратә ҳәынҭқаррақәа рхадацәа раҳасабала, ас еиҧш аусеицура арҿиара адгылара аҳҭалоит».

***

Алада Уаҧстәыла Ахада иара убас дазааҭгылеит Аҧсни дареи реизыҟазаашьақәа рырҕәҕәаразы раҧхьа иргыланы иҟаҵатәы ашьаҿақәа.

«Зегь раҧхьа игылоуп - – агәаҳәара, уи, агәаҳара, хымҧада, иҟоу. Ҳнапы зҵаҳҩыз аиқәшаҳаҭрақәа наҳагӡароуп. Урҭ ақьаад аҟны иаанмыжькәа, иақәнагоу ашьаҿақәа, иақәнагоу аусқәа ҳадаҳкылароуп, аиқәшаҳаҭрақәа рҟны иарбоу апунктқәа зегьы ҳрықәныҟәаны, иҳарҿиароуп», - иҳәеит Анатоли Бибилов.

Аекономика аҟәшаҟны аизыҟазаашьақәа ртәы далацәажәо, Рауль Ҳаџьымба иазгәеиҭеит аҩ-ҳәынҭқаррак атуризми акурортологиеи рхырхарҭақәа рыла аимадарақәа рырҿиара шрылшо.

«Уи иеиҭарҿыцтәу аҵак ду змоу хырхарҭоуп. Аибашьра ашьҭахь иаҳцәыӡыз рацәоуп, аха ари аусура ҩаҧхьа ахацыркразы алшара ҳамоуп», - иҳәеит Рауль Ҳаџьымба.

Аҧсны Ахада иаҵшьны иҳәеит ҳҳәынҭқаррақәа ирырҭо ацхыраара ҵыхәаҧҵәара амамкәа ишыҟам, убри аҟнытә аҩныҵҟатәи алшарақәа шыҧшаалатәу.

«Ари атуризм мацара акәӡам, уахь иаҵанакуеит аграртә ҟәшагьы, Алада Уаҧстәыла ианаамҭаз аҿиара бзиа аман абаҳчааӡара. Абри аганахьала аус еицура зҳалымшои», - иҳәеит аҳәынҭқарра Ахада.

Анатоли Бибилов иацҵаны иҳәеит аҧеиҧш ду шамоу амандарина акспорт Аҧснынтәи Алада Уаҧстәылаҟа.

«Ҳара алшара ҳамоуп Алада Уаҧстәылеи Аҧсни иҟоу атауарқәа рзы еицаҳзеиҧшу анаплакқәа раартразы, урыстәылатәи аџьырмыкьахь ацәырҵразы», - Алада Уаҧстәыла Ахада.

Иара убас уи ажурналистцәа иреиҳәеит иреиҳа аҵараиурҭақәа рыҟны аҵара зҵо астудентцәа реиҭныҧсахлара шцо. Убас, Алада Уаҧстәыла ауниверситета аҟны аҵара рҵоит аҧсны атәылауаа.

Активла русеицура мҩаҧысуеит ареспубликақәа рымчратә усбарҭақәа русзуҩцәа.

Жәларбжьаратәи аимадарақәа рырҿиара иазку аизыҟазаашьақәа рзы Алада Уаҧстәыла Ареспублика Ахада иазгәеиҭеит адәныҟатәи аусқәа рминистррақәа инхарҭәааны русеицура шеиҿкаау.

«Иахьа имҩаҧысуеит Алада Уаҧстәыла Ареспубликеи, Аҧсны Аҳәынҭқарреи, Урыстәылатәи Афедерациеи р-Дәныҟатәи аусқәа рминистррақәеи рыбжьара аусура мҩаҧысуеит ҳазхазҵаз атәылақәа рхыҧхьаӡара ацҵаразы», - иҳәеит иара.

Анатоли Бибилов ишьақәирҕзҕәаны далацәажәеит ҳҳәынҭқаррақәа Женеватәи аиҿцәажараҟны еицҿакны, ирҳәо акны ишықәгыло.

«Ҳара ҳтоурыхқәа еиҧшуп, апроблемагьы еиҧшны еилаҳкаауеит, иаҳхаҳгаз азы ҳхьаа акуп. Убри аҟнытә абри аганахьала аусура бзианы имҩаҧысуеит, агәра згоит аҧхьаҟа иҵегьы ишеиҕьхо азы, шәаргьы ҳаргьы уи алҵшәа ҳбоит хара имгакәа», - абас ихиркәшеит иара иажәа.

Алада Уаҧстәыла газла аиқәыршәаразы Агазааглых аиқәшаҳаҭра аҵаҩра иазкыз азҵаара аҭак ҟаҵо, Анатолий Бибилов иазгәеиҭеит Алада уаҧстәыла азы агаз астратегиатә ҵакы змоу аалыҵны ишыҟоу атәыла аекономика аҿаиаразы. Сынтәа иазҧхбагәаҭоуп иҿыцу адокументациа азырхиара, ари ишалнаршо апроект 2018 шықәсазы анагӡара.

«Алада Уаҧстәыла афымцамч ахәҧса аҧсны ишыҟоу еиҧш иҟазҭгьы, агаз ҳҭахымхаргьы ҟаларын», - иҳәеит Алада Уаҧстәыла ахада.

Уи иазгәеиҭеит агаз ахәҧса Нхыҵ Кавказ изыҧсоу иаҟарахар ҟалоит ҳәа.

Рауль Ҳаџьымба иҳәеит ари тема Урыстәылатәи Афедерацииа ахадеи Урыстәылатәи Афедерациа афымцамч аминистри рыҟны ишалацәажәахьоу.

Аҳәынҭқарра ахада иазгәеиҭеит аҧхьанатә ҳхы иаҳархәо ахәҧса ашәашьа ҳҵароуп ҳәа. Уи иаҵшьны иҳәеит Аҧсны агаз аҭахны ишыҟоу Егры афымцастанциаҟны аӡы аҩаӡара алаҟәреи афымцамч азымхареи инарымаданы.

«Ҳхы иаҳархәо агаз азы даҽа тәылак ашҟа иаҳшәалар акәхоит, уа уи аӡәгьы иҳанаижьлаӡом», - иҳәеит Ахада.

Алада Уаҧстәыла Ахада излаиҳәаз ала, раҧхьатәи иофициалтә визит аҳасабала Аҧсны алихит. Анаҩс, иазҧхьагәаҭоуп Нхыҵ Кавказ ареспубликақәа, иара убас Лугансктәи Жәлартә Республикеи Донецктәи Жәлартә Республикеи.

«Аҧхьаҟа жәларбжьаратәи аизыҟазаашьақәа рырҿиара ҳасаб рзуны, ҳазхазҵаз атәылақәа рышҟа ацара азгәаҭоуп. Иҟалоит ҳаицныҟәара азгәаҳҭаргьы. Ари макьана ҳаламцәажәаӡац, сгәы иаанагоит Рауль Џьумка-иҧа ари аҧшьгаразы саҭаиҵарым ҳәа», - абас игәҭакқәа дрылацәажәеит Алада Уаҧстәыла Ахада.

Алада Уаҧстәыла Аҳәынҭқарра Ахада Анатоли Бибилов Аҧсны иофициалтә визит мҩаҧысуеит ҧхынгәымза 7 инаркны 8 рҟынӡа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT