Аҧсны Аҳәынҭқарра Ахада

 

Ахада Руслан Ҳашыг диԥылеит

26.06.2017

Ахада Руслан Ҳашыг диԥылеит

Рашәарамза 26 рзы Аԥсны Аҳәынҭқарра Ахада Рауль Ҳаџьымба ателеканал «Абаза-ТВ» Адиректор хада Руслан Ҳашыг диԥылеит.

Аҳәынҭқарра Ахада Руслан Ҳашыг идиныҳәалеит ателеканал 10 шықәса ахыҵра. Иара иазгәеиҭеит ихьыԥшым ателеканал аԥҵара ауаажәларраҟны иаҭахны ишыҟалаз.

«Аԥсҭазаара иаҳнарбеит зхатә гәаанагара змоу, ззанааҭ ибзианы иазыҟаҵоу ауаа аус ахьыруа ихьыԥшым ателехәаԥшра ацәырҵра аҭахны ишыҟаз. Шәара ҳауаажәлар ибзианы ирыдыркыло аинформациатә аалыҵ азнагашьа шәақәшәоит», - иҳәеит Ахада.

Руслан Ҳашыг Ахада иҭабуп ҳәа иеиҳәеит аиԥыларазы.

«Рауль Џьумка-иԥа, иҭабуп ҳаиԥыларазы. Уи ихьыԥшым Амассатә информациа ахархәагақәеи, ҳара ҳканали, 10 шықәса ирҭагӡаны имҩаԥаҳгаз ҳусуреи шәшазыҟоу атәы бзианы иаанарҧшуеит», - ҳәа азгәеиҭеит ателеканал «Абаза-ТВ» Адиректор хада Руслан Ҳашыг ицәажәараҿы.

Руслан Ҳашыг дазааҭгылеит 10 шықәса рыҩныҵҟа ателеканал аусура атәы. Убас, «Абаза-ТВ» ари аамҭа иалагӡаны 25-ҩык ажурналистцәа азыҟанаҵеит, жәларбжьаратәи ателеканалқәеи иареи аизыҟазаашьақәа рыбжьанаҵеит, ҳазну аамҭазтәи Аԥсны аҭоурых аазырԥшуа хәызмаӡам архив аԥнаҵеит.

«Ҳара гәадурала иаҳҳәар ҳалшоит ҳапроект анагӡара аиуит ҳәа. Иҳацхраауаз, иҳавагылаз зегьы иҭабуп ҳәа раҳҳәоит», - иҳәеит Руслан Ҳашыг.

Аҧсны Ахада «Абаза-ТВ» Адиректор хада Руслан Ҳашыг ҳамҭас ииҭеит агәаларшәагатә сааҭ. Ателеканал авидеокамерақәа раахәаразы афинанстә цхыраара аиҭеит.

IMG_5002.jpg


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT