Аҧсны Аҳәынҭқарра Ахада

 

Аҧсны Ахада Ауаажәларратә палата алахәцәа дырҧылеит

23.06.2017

Аҧсны Ахада Ауаажәларратә палата алахәцәа дырҧылеит

Рашәарамза 23 рзы Аҧсны Аҳәынҭқарра Ахада Рауль Ҳаџьымба Ауаажәларратә палата алахәцәа дырҧылеит.

Ари аиҧылараҟны ирылацәажәон ҳтәылаҿы ишьақәгылаз акриминогентә ҭагылазаашьа аиҕьтәразы шьаҿақәас иҟаҵатәу. Ауаажәларратә палата амаӡаныҟәгаҩ Наҭела Акаба лажәақәа рыла, ари апроблема аӡбаразы хымҧада рус еимадазароуп азинхьчаратәи ауаажәларратәи усбарҭақәа, аветерантә еиҿкаарақәа, ажурналистцәа, азинхьчаҩцәа.

«Азинхьчаратә усбарҭақәеи ауаажәларреи ацәгьоурақәа рҿагылара аус аҿы рымч еибырҭароуп», - лҳәеит лара.

Ауаажәларратә палата алахәыла Сократ Џьынџьал инаҵшьны дазааҭгылеит азинхьчаратә система ареформа азура дшаҿагылоу. Иара игәаанагарала, иҟоу азакәанқәа ишақәнагоу ирықәныҟәатәуп, раҧхьа иргыланы, ацәгьоура ашьауҕақәҵара хымҧада иақәыршәатәуп.

Ауаажәларратә палата алахәцәа аҳәынҭқарра Ахада иахь Ааҧхьара ҟарҵеит Аҩныҵҟатәи аусқәа рминистрреи Апрокуратура хадеи рҟны Ауаажәларратә хеилакқәа раҧҵаразы.

Апрокурор хада Зураб Ачба аҵыхәтәантәи аамҭазы Аҧсны иҟалаз ацәгьоура бааҧсқәа русҭҵаара ацашьа атәы аиҧылара иалахәыз ирзеиҭеиҳәеит. Иара убасгьы аҳәынҭқарра АИХ ахаҭарнакцәа уи азы аинформациа роур рҭахызар, Апрокуратура еснагь иадҵаалар шрылшо реиҳәеит.

Аҩныҵҟатәи аусқәа рминистр ихаҭыҧуаҩ Рауль Зыхәба иазгәеиҭеит зыӡбахә ҳәоу ацәгьоурақәа раарҧшразы азинхьчаратә усбарҭақәа иахәҭоу ауснагӡатәқәа шымҩаҧырго. Иара иҳәеит азинхьчаратә усбарҭақәеи ауаажәларра рхаҭарнакцәеи русеицура аидеиа дшадгыло. Иара игәаанагарала, аусҭҵаара иеиуеиҧшым аетапқәа рҟны ари аҩыза ацхыраара хәарҭара аиур алшоит.

Жәлар Реизара адепутат Баҭал Табаҕәуагьы Ауаажәларратә хеилакқәа раҧҵара ахықәкы дадгылеит, иагьазгәеиҭеит азинхьчаратә усбарҭақәа рхыҧша ашьҭыхра, рырҕәҕәара хымҧада ишаҭаху.

Ахада акриминогентә ҭагылазаашьа аиҕьтәразы аиҧылара алахәцәа ражәалагалақәа рзы игәаанагара иҳәеит.

***
Арҭ апроблемақәа зхьымсуа ҳәа ҳабжьара аӡәгьы дыҟамзар ҟалап. Убри азы ҳазегьы ҳаидгыланы, ҳамчи ҳахшыҩи еибыҭаны, иеиуеиҧшым азҵаара уадаҩқәа рыӡбашьа иаша ҳақәшәароуп.

Уаанӡа имҩаҧысуаз ҳаиқәшәарақәа рҟны зыӡбахә ҳҳәоз ҳусеицура хацҳаркыроуп. Ауаажәларратә хеилакқәа раҧҵара шаҭаху сара хаҭала изныкымкәа исҳәахьан. Урҭ раҧҵара хықәкылаҵәҟьа ҳрыламгар ада ҧысхәа ыҟам. Аҩныҵҟатәи аусқәа рминистрреи Апрокуратура хадеи рҟны адагьы, егьырҭ аҳәынҭқарратә усбарҭақәа рҟны иаҧҵатәуп.

Дарбанзаалак ауаҩы иахьатәи аамҭазы дзыргәаҟуа аҭагылазаашьазы иидырырц ииҭаху еиликаар шыҟало идыруазароуп, уи аилкаара дацәымшәароуп. Сара сгәаанагарала, ҳара анаҩсан зыӡбахә сҳәо ашьаҿа ҟаҳҵароуп. Излазбо ала, ара Џьҕамазиаа рҭаацәа ахаҭарнакцәа тәоуп. Исашәҳәа, аӡәыр даҳҧырхагоума Ауаажәларратә палата аусура аҳәаақәа ирҭагӡаны ари ашьаусҭҵаара ахылаҧшра, Апрокуратуреи Аҩныҵҟатәи аусқәа рминистрреи рҟны имҩаҧысуа аусеилыргарақәеи ишақәнагоу, рҵыхәтәанӡа рнагара ацклаҧшра? Аӡәгьы даҳҧырхагам.

Ацәгьоурақәа рҵыхәтәа ахьҧырҵәахьоу ҳәынҭқарракгьы ыҟаӡам. Аха иарбанзаалак атәыла, уи аиҳабыра дҵа хаданы аҧхьа иқәгылоуп арҭ ацәырҵра бааҧсқәа иахьынӡауа рырмаҷра, урҭ раҧырҟәҟәаара знапы иану аусбарҭақәа аҳәынҭқарраҟынтәи иахәҭоу адгылара рыҭара. Аҳәынҭқарреи ауаажәларреи иааизакны ацәгьоура аҳәаақәа арҭбаара иеидгыланы, иахьынӡауа иалдмыршароуп.

Иара убасгьы аҳәынҭқарра аҧхьа дҵа хадас иқәгылоуп ацәгьоура азҧхьагәаҭара. Уи азы иахьатәи аамҭазы иҟаҵоузеи, уаанӡагьы иҟаҵази? Рыцҳарас иҟоу, акгьы ҟаҵамызт. Ацәгьоурақәа разҧхьагәаҭареи рыҟалара алмыршареи азы ауснагӡатәқәа ҳәа акгьы мҩаҧаҳгом.

Ари аҩыза аҭагылазаашьа аҧыхразы, ацәгьоурақәа иахьынӡалшо раанкыларазы ауаажәларра азинхьчаратә усбарҭақәа русура ахылаҧшра арҭар хымҧада иаҭахуп. Ари азҵаара шәареи сареи ҳалацәажәахьеит, уи адокументқәа акыр рҟны иарбоуп.

Акраҵанакуеит, ҳәарада, азинхьчаратә усбарҭақәа реибыҭара азҵаара. Рыцҳарас иҟоу, иҟаҵоу маҷуп азинхьчаратә усбарҭақәа ишақәнагоу аусура рылшарц азы. Иҟаӡам ирымазарц зыхәҭоу атехникатә хархәагақәа. Аха абри акәӡами хықәкысгьы иҳамоу Урыстәылеи ҳареи ҩ-ганктәи ҳусеицуразы алшарақәа ҳанрылацәажәо? Аинформациатә координациатә центр аҧҵара ҳҳәынҭқарра ахьыҧшымра иаҧырхагоуп ҳәа ргәы изаанагои џьоукы? Ас еиҧш иҟоу аҿырҧштәқәа аҭыҧ рымоуп апостсоветтә тәылақәа рыҟны акырџьара. Абарҭ аусбарҭақәа раҧҵара ашьҭахь ҧасатәи аҳәынҭқаррақәа жәпакы рыҟны, аспециалистцәа рнапынҵақәа анынарыгӡа, ихынҳәны ртәылахь ицеит. Аҭыҧантәиқәа иаҭаху амыругақәеи алшарақәеи рзынхеит.

Иахьа ҳара аекспертиза аӡбахә ҳҳәоит. Иарбан експертизазаалакгьы афинанстә лагала дуқәа аҭахуп. Цәгьарас иалои арҭ аҭагылазаашьақәа ҳзаҧырҵозар? Арҵабыргратә материалқәа иахьа ишыҟоу аасҭа еиҳа оперативла анырра ахьроуа азоума?

Абахҭа атәы ҳҳәозар. Хара имгакәа Урыстәылатәи Афедерациа Ашәарҭадаратә хеилак анапхгареи ҳареи аиҧылара ҳауеит. Аҩныҵҟатәи аусқәа рминистрреи Аиустициа аминистрреи рыҟны ари аус ҳалацәажәахьеит. Сгәы иаанагоит абахҭаҟны ацәгьоуцәа рҭартәара адагьы, урҭ аусура иадҧхьалахоит, 500 ҭыҧ рҟынӡа змоу азхоит ҳәа сгәы иаанагоит Аҧсны азы.

Азеиҧш хылаҧшратә усеицура атәы ҳҳәозар, ус еиҧш аусура мҩаҧысӡом ҳәа агәаанагара змоу сара сызшәықәшаҳаҭхаӡом. Ари аусура мҩаҧысуеит, аха ибааҧсны имҩаҧысуеит. Иҟоуп Апрокуратураҟны азинхьчаратә усбарҭақәа зегьы русура еиҿызкаауа аусбарҭа. Рацәак ҵуам уи сара сыдҵала аусура иаларгеижьҭеи.

Иахьа иара убас иеиҿкаау ацәгьоурақәа рҿагыларазы азакәан апроект азырхиоуп. Иҳадгалаз апроект ҳара ҳҭагылазаашьа иашьашәаламызт. Уи иахьа Аҩныҵҟатәи аусқәа рминистрраҟны иҟоуп, егьырҭ аусбарҭақәа ақәшаҳаҭханы ианыҟала анаҩс, Апарламент ашҟа идәықәҵахоит, сгәы иаанагоит уи хара имгакәа иҟалоит ҳәа.

Анаркоманиа ҳхыҵәеит ҳҳәоит. Иахьа иазҧхьагәаҭоу асанкциақәеи иҳамоу аҭагылазаашьеи еибакапануам. Агәра шәсыргоит, QIWI ала аҧарашьҭра иҟоу уахәаҧшуазар, ҳара ҳҟынтә иқәҵны шә-миллионкла аҧара ацара иаҿуп. Уи рылазырҵәои аиҿкааҩцәеи рыҧсы ҭанаҵы аҭакра рыҭара рықәҵалатәуп. Даҽа мҩакы ыҟаӡам.

Абџьар атәы ҳҳәозар, амчратә усбарҭақәа зегьы еилыхрада ари аусура амҩаҧгаразы адҵа рыҭоуп. Уи мҽхакыҭбаала, чынс изҵазкуазаалак, ҧымкрада имҩаҧгатәуп. Аӡәгьы азин имаӡам, адепутатцәагьы, аҳәынҭқарра Ахадагьы, зинда аныҟәгара. Иахьа хәыҷгьы дугьы иныҟәыргоит абџьар. Уанӡагьы иныҟәыргон. Убри ауп Ахада ишьразы аҽазышәарақәагьы зыҟаз.

Аӡәгьы имҳәаӡеит ари аҭагылазаашьа ҳанышәар ҳалшоит ҳәа.

Аҭыҧ змаз абарҭ ацәгьоура бааҧсқәа аҳәынҭқарра Ахадагьы, ауаажәларра зегьы рылаҧш ахызароуп.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT