Ахада Аҧсны Аҽыбҕаҟазаратә спорт афедерациа анапхгара дырҧылеит

Ахада Аҧсны Аҽыбҕаҟазаратә спорт афедерациа анапхгара дырҧылеит

Рашәара 20 рзы Аҧсны Аҳәынҭқарра Ахада дырҧылеит Аҧсны Аҽыбҕаҟазаратә спорт афедерациа анапхгаҩы Аслан Камлиеи Урыстәылатәи Афедерациа Ахада иаҧхьахә азы аҽырыҩраҟны аиааира згаз аҽыбҕаҟазаҩцәеи.

Рауль Ҳаџьымба асасцәа дрыдныҳәалеит Москватәи аҽырҩырҭа хадаҟны аҧхьахә хада ахьыргаз азы.

«Даҽазныкгьы ишәыдысныҳәалоит шәиааира! Ҳтәылазы ихьыӡ дууп ҳбираҟ егьырҭ аҳәынҭқаррақәа рбираҟқәа ирывагыланы ианахашәыршәыруа. Агәра згоит, ари аспорт хкы аҿиаразы ҳалшарақәа еиҳа-еиҳа ишрыцло, шәаргьы аиааира ҿыцқәа хымҧада ишышәзыҧшу», - иҳәеит Ахада.

Рауль Ҳаџьымба иазгәеиҭеит аҳәынтқарра ари аспорт хкы аҿиаразы иҟанаҵо адгылара ишацнаҵало.

Аслан Камлиа Ахада иҭабуп ҳәа иеиҳәеит иҟаиҵо адгылареи ацхыраареи рзы. Иара убасгьы уи инаҵшьны дырзааҭгылеит Афедерациа ҧхьаҟатәи апланқәа, Аҧсны Ахада ихраҿа агаразы аҽырыҩрақәа рымҩаҧгарагьы убрахь иналаҵаны.

Москватәи аҽырҩырҭа хадаҟны Урыстәылатәи Афедерациа Ахада иаҧхьахә азы аҽырыҩраҟны аиааира агеит Аҧсны Аҳәынҭқарра ахьӡала иқәгылаз аҽыҩ.

Урыстәылатәи Афедерациа Ахада иаҧхьахә азы аҽырыҩра аҳәаақәа ирҭагӡаны Москватәи аҽырҩырҭа хадаҟны аҩбатәи аҭыҧ ааннакылеит Ахра Ашәба иҽыҩ.

Урыстәылатәи Афедерациа Ақыҭанхамҩа аминистр иаҧхьахә азы аҽырыҩраҟны ахҧатәи аҭыҧ ааннакылеит Нодар Ҵышәба иҽыҩ.

IMG_4741.JPG


Возврат к списку