Аҧсны Аҳәынҭқарра Ахада

 

Ахада Аҩныҵҟатәи аусқәа рминистрраҟны аилатәара мҩаԥигеит

19.06.2017

Ахада Аҩныҵҟатәи аусқәа рминистрраҟны аилатәара мҩаԥигеит

Рашәара 19 рзы Аҧсны Аҳәынҭқарра Ахада Рауль Ҳаџьымба Аҩныҵҟатәи аусқәа рминистрраҟны аилатәара мҩаҧигеит.

Аҳәынҭқарра Ахада инаҵшьны иҳәеит зықәра намӡац аӡӷаб лцәаҧҽра ҟазҵаз ацәгьауаҩы иганахьала рыцҳашьарак шыҟамло.

Аҳәынҭавтоинспекциа аусура атәы дазааҭгыло, Ахада иазгәеиҭеит Аҩныҵҟатәи аусқәа рминистр иҭижьыз Адҵала аинформациа ыҟамкәа ҵаҵҕәыда урыстәылатәи аномерқәа ззықәгылоу амашьынақәа раанкылара аӡәгьы дшақәиҭым.

Рауль Ҳаџьымба иазгәеиҭеит Аҳәынҭавтоинспекциа аусзуҩцәа руалафахәы шыҳаракым, аха уи ишаанамго агәынамӡара аазырҧшуа ақәгыларақәа рымҩаҧгара ҟалоит ҳәа.

«Ҳара иаҳзаауа асасцәа ирыдаҳгало амаҵзура ахаҭабзиара лаҟәуп, иахьатәи аҧсҭазаара иашьашәалоу аҭагылазаашьақәа ҳамам, уи азмырхакәа, ауаа арахь ааразы агәаҳәара рмоуртә шәаргьы шәхы мҩаҧыжәгоит», - иҳәеит Ахада.

Рауль Ҳаџьымба иажәақәа рыла, ари аусбарҭаҿы акадртә рыцқьарақәа мҩаҧгатәуп, арзаҳалқәа зҩыз рмаҵурақәа ирымхтәуп.

Аҩныҵҟатәи аусқәа рминистр Аслан Кобахьиа иазгәеиҭеит аусурахь ауаа анрыдыркыло зегьы ишреилдыркаауа руалафахәы ашәагаа. Уи згәамҧхо аӡәыр дыҟазар, агәынамӡаратә қәгыларақәа аҭахӡам, изҭахым аусура ааныжьразы арзаҳал иҩыр илшоит, .

Иара иеилатәаз агәра диргеит арзаҳалқәа зҩыз зегьы русурақәа ишрымххо, дара руалафахәқәа Аҳәынҭавтоинспекциа аусзуҩцәа рыбжьара ишеихшахо. Иара убасгьы Аслан Кобахьиа иҳәеит мчыбжьык иҭагӡаны аилазаара аиҭазшьара шымҩаҧгахо.

«Сара излаздыруала, уа иҵабыргым арзаҳалқәагьы рылоуп. Егьырҭ ҳусзуҩцәа рыхьӡ алагьы арапортқәа зҩыз ҟалеит. Ҳгәаанагарала, аусқәа реиҧҟьара зҭаху амчқәа ыҟоуп. Аҳәынҭавтоинспекциа иаҿагылоу аусқәа реиҵаҟәаҟәара ишаҿу умбар залшом», - иациҵеит Кобахьиа.

Ахада ари аҭагылазаашьа аполитика аганахь аиагара шаҭахым иҳәеит.

«Арҭ реиҧш аусқәа аполитикатә еибарххарақәа рахь ишәмырхан, ара политика ҳәа акгьы ыҟаӡам. Ауаа рыхдырра еицакны аусқәа реиҵаҟьаразы аҽазышәарақәа мҩаҧысуеит», - иҳәеит аҵыхәтәаны Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT