Аҧсны Аҳәынҭқарра Ахада

 

Рауль Ҳаџьымба Урыстәыла амш азгәаҭара иазкыз аусмҩаҧгатә аҟны иқәгылара

08.06.2017

Рашәара 8 рзы Аҧсны Аҳәынҭқарра Ахада Рауль Ҳаџьымба Урыстәыла амш аныҳәа инамаданы Аҧсны Аҳәынҭқарраҟны иҟоу Урыстәылатәи Афедерациа Ацҳаражәҳәарҭа ахыбраҟны дықәгылеит.

***

Ҳаҭыр зқәу Семион Виачеслав-иҧа!

Ҳаҭыр зқәу абра иеизаз зегьы!

Ишәыдысныҳәалоит аурыс милаҭ рзы иреиҳаӡоу аныҳәақәа иреиуоу – Урыстәыла амш!

27 шықәса раҧхьа РСФСР аҳәынҭқарратә суверенитет азы Адекларациа рыдыркылеит. Убри амш инаркны аурыс ҳәынҭқарра арҕәҕәареи аҿиареи азы амҩа уадаҩ ианысит, зыӡбара мариамыз аус дуқәа акыр мҩаҧыргеит.

Иахьатәи аамҭазы Урыстәылатәи Афедерациа адунеи аҟны реиҳа зхыҧша ҳараку аҳәынҭқаррақәа ируакуп. Жәларбжьаратәи аизыҟазаашьақәа рҟны ихадоу аҭыҧ ааннакылоит, ҳаҭыр ду ақәуп. Уи адунеитә економикеи аполитикеи анырра ҕәҕәа рынаҭоит.

Ҳара уи ихадоу, акрызҵазкуа ҩызаны иҳавагылоуп. Урыстәылатәи Афедерациа Аҧсны афинанстәи аполитикатәи дгылара анаҭоит, аҳәаақәа рыхьчараҟны иацхраауеит. Иара убас ҳара ҳажәларқәа есышықәса зыҽзырҭбаауа аиҩызаратә еизыҟазаашьақәа иеидыркылоит. Уи еиҳаракгьы акультуратәи асоциалтәи еимадарақәа ирыбзоуроуп.

Аиҩызареи астратегиатә партниорреи рзы аҧсуа-аурыс Еиқәшаҳаҭра аҧҟарақәа шьаҭас изауз аҧсуа-аурыс еизыҟазаашьақәа аҿиарамҩа иануп. Уи абзоурала иеиуеиҧшым аусхкқәа рҟны ҳусеицура арҭбааразы мҽхакы ҭбаала аусурақәа мҩаҧысуеит.

Даҽазныкгьы абра иеизаз зегьы ишәыдысныҳәалоит Урыстәыла амш. Гәык-ҧсык ала Урыстәыла иқәынхо ажәлар ирзеиҕьасшьоит аҭынчра, агәыцқьара, аизҳазыҕьара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT