Аҧсны Аҳәынҭқарра Ахада

 

Ахада Абжьаҟазаратә ӡбарҭа Ахантәаҩи аколлективи ирыдиныҳәалеит уи аиҿкаара амш

06.06.2017

Аҧсны Аҳәынҭқарра Ахада Рауль Ҳаџьымба Абжьаҟазаратә ӡбарҭа Ахантәаҩы Фатима Кәыҵниеи аколлективи уи еиҿкаауижьҭеи 20 шықәса аҵра инамаданы дрыдныҳәалеит.

***

Ҳаҭыр зқәу Фатима Алықьса-иҧҳа!

Гәык-ҧсык ала шәколлективи Шәареи ишәыдысныҳәалоит Аҧсны Аҳәынҭқарра Абжьаҟазаратә ӡбарҭа 20 шықәса ахыҵра амш.

Абжьаҟазаратә ӡбарҭа аҧҵара аҭаххеит аекономикатә цәырҵрақәеи аамҭа ҿыц аҭахрақәеи ирымаданы, уи абзоурала аекономикатә усхкахь азинмчра ахы ылнагеит, аекономикатә еимакқәа рыхәаҧшразы хымҧада иаҭахыз ихьыҧшым аӡбарҭатә система аусура иалагеит.

Аҧсны Абжьаҟазаратә ӡбарҭа аӡбаҩцәеи аспециалистцәеи рзанааҭдырреи, рус азҟазара ҳараки, робиективреи уасхырс иазышьҭоуп аусӡбарҭатә проблемақәа раҧыхра.

Ҳтәылаҿы имҩаҧысуа економикатәи, асоциалтәи, аполитикатәи рҿыцрақәа еснагь аиҭакрақәа рҭахуп, аусӡбареиҿкаареи аусӡбарамҩаҧгареи рызҵаатәқәа рганахьала. Агәра згоит, ҳҳәынҭқарраҟны зынагӡара ҳаҿу аусӡбаратә реформа аекономикатә зинмчра алшарақәеи аекономикатә еимакқәа рҭышәныртәалареи реиҕьтәраҟны алагала ду шыҟанаҵо.

Аӡбаҩцәа ихадоу рҷыдаҟазшьақәас иҟоуп иалырхыз рус гәыкала азнеира, руалҧшьа ацәхьамҵра, ламысцқьала аусура, апринципра, аамсҭашәара.

Фатима Алықьса-иҧҳа! Абжьаҟазаратә усӡбарҭа аколлективи Шәареи ишәзеиҕьасшьоит шәзанааҭ аҿы ақәҿиарақәа. Аусӡбаратә реформа аиҕьтәразы амчи алшареи шәыгымзааит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT