Аҧсны Аҳәынҭқарра Ахада

 

Аҧсны Ахада Лили Бганба лиубилеи лыдиныҳәалеит

10.05.2017

Лаҵарамза 10 рзы Аҧсны Ахада Рауль Ҳаџьымба Аҧсны Аҳәынҭқарра раҧхьатәи афинансқәа рминистр Лили Бганба 80-шықәсалхыҵратә иубилеи лыдиныҳәалеит.

***

Ҳаҭыр зқәу Лили Дугуж-иҧҳа!

Гәык-ҧсыкала ишәыдысныҳәалоит шәиубилеи!

Ауаатәҩсатәи азанааҭтәи ҟазшьа ҳаракқәеи, агәаҕьра дуи, анапхгаҩ иҟыбаҩи ирыбзоураны, шәара, традициатәла ахацәа еиҳа ирҟазшьоу аҟазараҟны – аҳәынҭқарратә ргылараҟны зылшамҭақәа ҕәҕәоу иналукааша аҳәса шәыруаӡәкуп. Шәара, ззыҟаҵара ҳараку аспециалист, шәбаҩхатәра асоветтә аамҭазгьы иазгәаҭан Аџьатә Бираҟ Ҟаҧшь аордени «СССР Аҳәынҭбанк» ҳәа иҿырҧшыгоу адыргеи рыла.

Асоветтә аамҭазы ишәымаз ахәаахәҭра аминистр иҧышәа иабзоураны, шәара аибашьра ашьҭахь ишәылшеит ареспублика аминистрра хадақәа ируакыз – Афинансқәа рминистрра аусура аиқәырхареи аҳәаақәҵареи. Ҟазарыла имҩаҧыжәгоз анапхгарала игылеит аҳәынҭқарратә маҵзурақәа рыҟны азыҟаҵара бзиа змоу аспециалистцәа рабиҧара ҿыцқәа.

Ҳара ахә ҳаракны иаҳшьоит Аҧсны Аҳәынҭқарра асоциалтә- економикатә ҿиараҟны шәылшамҭа.

Ҳаҭыр зқәу Лили Дугуж-иҧҳа, ишәзеиҕьасшьар сҭахуп агәабзиара, агәамч, ҩныҵҟала агәҭынчра, инымҵәаӡо аҧсҭазааратә гәазыҳәара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org