Аҧсны Аҳәынҭқарра Ахада

 

Ахада амшцәгьа ахҟьа-ҧҟьақәа раҧыхра азҵаарақәа ирызкыз аилацәажәара мҩаҧигеит

24.04.2017

 Мшаҧымза 24 рзы Аҧсны Ахада атәылаҟны иҟалаз амшцәгьа ахҟьа-ҧҟьақәа раҧыхра азҵаарақәа ирызкыз аилацәажәара мҩаҧигеит.

Рауль Ҳаџьымба иазгәеиҭеит Аҷыдалкаатәи ҭагылазаашьақәа рзы Аминистрреи афымцамч аҟәша аусзуҩцәеи лассы имҩаҧыргаз аусура атәы.

«Гәахәарыла иазгәасҭарц сҭахуп ишьақәгылаз аҭагылазаашьа арҽеиразы лассы аусура знапы алазкыз Аҷыдалкаатәи ҭагылазаашьақәа рзы Аминистрреи афымцамч аҟәшеи русзуҩцәа русушьа. Сгәы иаанагоит, иҟалаз амшцәгьа иахҟьаны ицәырҵыз ауадаҩрақәа гәазҭаз рацәак ыҟам ҳәа. Амҩақәа ртәы ҳҳәозар, уа иахьатәи уаҵәтәи амшқәа ирылагӡаны аиҭаҵра иаҧырхагоу зегьы рыҟнытә ирыцқьатәуп, аҵла хыжәжәарақәа рдацқәа рыҵыхрагьы налаҵаны», - иҳәеит аҳәынҭқарра Ахада.

Аҧхасҭа зауз ахыбрақәа рзы Ахада Аргыларатә Усбарҭеи АЕ «Аҧсныргылареи» рнапы ианырҵеит арҽеиратә усура мҩаҧызгаз иарбан еиҿкаарақәоу еилкааны адырра ирҭарц.

«Арҭ ахыбқәа зегьы ҿыцқәоуп. Иҟоуп Аргыларатә Усбарҭа, «Аҧсныргылара». Иеилшәырга арҭ аусқәа знапы ианыз. Аҧхасҭа змоу ахыбқәа зегьы Аинвестпрограмма инақәыршәаны иҟаҵоуп. Урҭ аус рыцызуаз ари аус назыгӡаз ҧшааны ирыдышәҵа рхатә харџьала еиҭашьақәдыргыларц.

Аҧыза-министр Беслан Барцыц иҳәеит уажәы аҧхасҭа амҽхак ашьақәыргыларазы аусурақәа рымҩаҧгара ишаҿу.

«Аҧхасҭа роуит араионқәа хҧа – Гагра араион, Аҟәа ақалақь, Очамчыра араион, Тҟәарчал ақалақь ахәҭак. Гагра араион аҟны анхарҭа ҩын дуқәа рхыбқәа рыхнаҟьеит аҧша, аангыларҭак хнарбгалеит, аҵлақәа каҳаит, автомашьынак аҵла ақәҳаит. Насыҧны, амашьына апассажир ҭаӡамызт, ауаа машәыр рмыхьит. Аҟәа ақалақь аҩныҵҟа иацы, Шәара шәыдҵала Аҷыдалкаатәи ҭагылазаашьақәа рзы аминистри сареи аҧхасҭа зауз аобиектқәа зегьы ҳрылсны иаҳбеит. Ахәылбыҽха адҵа рыҭан ақәыршҩы иахҟьаны аӡхыҵра ҟамларац азы ҳмаҵзурақәа рымчала ауснагӡатәқәа рымҩаҧгара.

Аҳәынҭқарратә Еилакы «Аҧсныргылара» Ҭемыр Тҟьебучаа иҳәеит аҧхасҭа зауз аргыларақәа рхыҧхьаӡараҟны ишыҟоу Гәыҧ ақыҭа аусбарҭа ахыбра, Џьал ақыҭа аусбарҭа ахыбра, Отаҧ ақыҭа ашкол, Ҷлоу ақыҭа акультура аҩни аспорттә зали.

Аҧхасҭа зауз Аҳәынҭқарратә Еилакы «Аҧсныргылара» ахыбрақәа зегьы рганахьала аекспертиза мҩаҧгахоит рыргылараан аҧҟарақәа зегьы рықәныҟәара ахьынӡамҩаҧгоу агәаҭаразы, иаҵшьны иҳәеит Аҧыза-министр. Обиектцыҧхьаӡа рыҭҵаара алҵшәақәа Ахада иҟынӡа инагахоит.

Ахада иара убас иҳәеит азаралра ахәҧса ахшәааразы аҳәынҭқарратә цхыраара рыҭахоит уи аҭахны иахьыҟаҵәҟьоу.

«Амшынеиқәафымцамч» Аусбарҭа анапхгаҩы Аслан Басари Ахада иҟынӡа инеигеит афымцамч аҟәшаҟны иҟоу аҭагылазаашьа атәы.

«Иацтәи амшцәгьа инамаданы Аҧсны ахьынӡанаӡааӡо ахҟьа-ҧҟьақәа маҷӡам. Звольт ҳараку рганахьала фба инарзынаҧшуа машәыр ҟалеит, амашәыр акыр идууп Бзыҧ ацәаҳәаҟны. Амашәырқәа зегьы абри аганахьала иаҧыхын. Амш аҧхьатәи азбжазы Гагра араион аҟны иҟалаз амшцәгьа иахҟьаны иҟалаз амашәыр аҧыхуп Агараки ақыҭаҟны ада зехьынџьара. Иахьа уаҟагьы афымцамч рыҭоуп. Иҟоуп ҭыҧқәак ҳусзуҩцәа ахьахьымӡаз, сааҭқәак рнаҩс афымцамч зехьынџьара еиҭашьақәыргылахоит,” – иҳәеит Аслан Басариа.

Рауль Ҳаџьымба Аминистрцәа реилазаара анапхгара адҵа риҭеит мшаҧымза 25 рзы амш бааҧс иахҟьаз амашәырқәа раҧыхразы иаҭаху ахарџьқәа азгәарҭарц.

Ахада Рауль Ҳаџьымба иаҵшьны иҳәеит аҧхьаҟа Аинвестпрограммала аргыларақәа аҳәынҭқарратә еиҿкаарақәа имҩаҧыргараны ишыҟоу.

«Аҧхьаҟа ҳзызҵаауа даҳдыруазароуп. Еиқәшаҳаҭрак ала аусура хацыркхоит, нас даҽа еиқәшаҳаҭрак ала егьи аиҿкаарахь ииасуеит. Аҵыхәтәаны ҳзызҵаауа дҳаздырӡом. Ари азҵаара арктәуп, еиқәшаҳаҭрала мышкы аус зуа аиҿкаарақәа ҟамлароуп. Ари аганахьала аҳәынҭқарратә еилазаарақәа рыҟны аус ҳамазароуп», - иҳәеит иара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT