Аҧсны Аҳәынҭқарра Ахада

 

Ҧхынҷкәынмза 18 рзы АА Ахада ихаҭыҧуаҩ Витали Габниа Шьамтәыла ақәҧаразы еидҵоу астильқәа р-Федерациа ахада ихаҭыҧуаҩ Аҳмаҭ Џьумаа диҧылеит

18.12.2016

Ҧхынҷкәынмза 18 рзы АА Ахада ихаҭыҧуаҩ Витали Габниа Шьамтәыла ақәҧаразы еидҵоу астильқәа р-Федерациа ахада ихаҭыҧуаҩ Аҳмаҭ Џьумаа диҧылеит

Витали Габниа иазгәеиҭеит Аҧсны иаҭааз Шьамтәылатәи аспортсменцәа гәахәарала ишрыдыркыло.

"Ҳара Шьамтәыла имҩаҧысуа ахҭысқәа зҿлымҳара раҳҭоит. Ҳара иаҳхаҳгаз аибашьра ашьҭахь даара ибзианы шәеилаҳкаауеит. Шәареи ҳареи иаҳлахьынҵан ҩ-хырхарҭакны зҽеиҩызшаз адунеи аҟны аицҟазаара", - иҳәеит Витали Габниа.

Габниа иқәгылараҿы иазгәеиҭеит Аҧсны Аҳәынҭқарра шдуумгьы, аспорт аганахьала ҳаззыгәдуу шҳамоу.

"Хара ҳазхыҽхәаша ыҟоуп, изныкымкәа адунеии Европеи ирчемпионхахьоу аспортсменцәа ҳамоуп, рааӡара ҳаҿуп аспортсменцәа ҿарацәа", - иҳәеит Аҧсны Ахада ихаҭыҧуаҩ.

Уи иара убас иазгәеиҭеит аспорттә еиҧыларақәа рыҟны аҧсуа команда аҧхьахәқәа реиҳарак ргартә изыҟалаз Шьамтәыла аибашьра ахьцо, аспортсменцәа аӡәырҩы рыҧсадгьыл ахьчараз иахьгылоу шакәу.

Витали Габниа иара убас далацәажәеит Шьамтәыла ҳџьынџьуаа маҷымкәа ишынхо, урҭ аӡәырҩы аруааны ишыҟоу.

Шьамтәыла ақәҧаразы еидҵоу астильқәа р-Федерациа ахада ихаҭыҧуаҩ Аҳмаҭ Џьумаа иазгәеиҭеит Аҧсны гәык-ҧсыкала ишрыдыркылаз.

"Идуӡӡаны иҭабуп ҳәа шәаҳҳәар ҳҭахуп. Ҳара Аҧсны ҳаҧсадгьыл аиҧш ҳахәаҧшуеит. Ҳара ара инхо ҳџьынџьуаа ҳахьрацәажәаз иҳарҳәеит ишрыдыркылаз, аиашьара, аиҩызара шырзыруыз атәы", - иҳәеит Аҳмаҭ Џьумаа.

Аганқәа Аҧсни Шьамтәылеи аспорттә федерациақәа рыбжьара аиқәшаҳаҭра рнапы аҵаҩра мҩаҧысраны ишыҟоу атәы иалацәажәеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org