Аҧсны Аҳәынҭқарра Ахада

 

Аҳәынҭқарратә бызшәатә политиказы аҳәынҭқарратә еилакы Ахантәаҩы иҧылара

17.10.2016

Жьҭаара 17 рзы Ахада Рауль Ҳаџьымба Аҳәынҭқарратә бызшәатә политиказы аҳәынҭқарратә еилакы Ахантәаҩы Нурбеи Ломиа дидикылеит.

Аҳәынҭқарра ахада Нурбеи Ломиа идиныҳәалеит имаҵура иаҭара, иҳәеит аҧсуа бызшәа аҿиаразы имҩаҧысуа аусура ацҵара илшап ҳәа игәы ишаанаго.

Рауль Ҳаџьымба иазгәеиҭеит аусеицура шаҭаху, 2008 ш. инадыркны имҩаҧгаз аусура анализ азуны, аҧхьаҟатәи жәашықәса рыҩныҵҟатәи аусура аплан шеиқәыршәатәу. Уи иацҵаны иҳәеит абызшәа аҿиара апрограммазы ахарџьқәа 2017 шықәсазтәи абиуџьет аҟны ишарбоу.

Ахада далацәажәеит апроектқәа зегьы ирыхәаҧшраны иҟоу Акомиссиа шаҧҵоцу атәы.

Аиҧылараҟны ишьҭыхын иара убас аҿар аҧсыуа ҵасла рааӡара азҵаара, уи аиҧылара иалахәыз ргәаанагарала ҳкультуреи ҳхаҭареи реиқәырхара алнаршоит.

«Абызшәа аҿиара мацара акәӡам, еиқәырхатәуп ҳкультура, ҳҿар аҧсыуа ҵасла иааӡатәуп», - иҳәеит Рауль Ҳаџьымба.

Ахада иаҵшьны иҳәеит аҳәынҭқарратә усбарҭақәа зегьы аҳәынҭқарратә бызшәахьы ишиасыракәу. Ари аусура аамҭа аҭахуп, аха уи иалагатәуп.

Аҳәынҭқарратә бызшәатә политиказы Ахада Ицхырааҩ Ҭали Џьапуа лҳәеит абызшәазы Акомиссиахь ишрыҭоу зҿлымҳара зуҭаша апроектқәа маҷымкәа, урҭ рыҩныҵҟа ишыҟоу ҳазҭагылоу аамҭазтәи аелектронтә технологиақәа рхархәаразы апрограммақәа.

Рауль Ҳаџьымба иазгәеиҭеит ҳаҧхьаҟа аус дуқәа шышьҭоу, урҭ адгылара шриҭогьы агәра диргеит.

Аиҧылара иалахәын Аҳәынҭқарратә бызшәатә политиказы Ахада Ицхырааҩ Ҭали Џьапуеи Аҳәынҭқарратә бызшәатә политиказы аҳәынҭқарратә еилакы Ахантәаҩы Нурбеи Ломиеи.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT