Аҧсны Аҳәынҭқарра Ахада Аҟәа ақ. гәыҧҩык ауааҧсыра дырҧылеит

Жьҭаара быжьба рзы Аҧсны Аҳәынҭқарра Ахада Рауль Ҳаџьымба Аҟәа ақ. Басариа имҩа 14-тәи аҩны аҟны инхо ауааҧсыра дырҧылеит.

Басариа имҩаҟны инхо ауаа аҳәынҭқарра Ахада иахь аҳәара ҟарҵеит рыҩны аҧхьа иҟоу апарк амашьынаргыларҭа алрымхырц азы. Рацәак ҵуам апарк аҟны ахәыҷқәа рыхәмарырҭа ҟарҵеит, иара уигьы, ахада иҭааз ауааҧсыра ражәақәа рыла, ашәарҭадара азҵаарақәа хырҩа рымҭакәа иҟаҵоуп.

Рауль Ҳаџьымба иазгәеиҭеит апарк иҟоу аҧҟарақәа инарықәыршәаны аиҿкаара хаҭала иара дшацклаҧшуа. Ахада аҧыза-министр ихаҭыҧуаҩ Беслан Ешба идиҵеит иахьа иахымгакәа апарк ахьыҟоу аҭыҧ аҟны Аминистрцәа рсовет ахыбра аҩналарҭа амҩақәа раркра, иаарласны уи акәша-мыкәша арыцқьара. Ахада иаҵшьны иҳәеит аиаҵәара ахьгылоу аҭыҧ аҟны аргыларақәеи уа амашьынаргыларҭақәа рыҟаҵареи ҟамлароуп ҳәа.

«Аминистрцәа реилазаара абаланс аҟны иҟоу адгьылҵакыра аӡәгьы аргыларазы ихы иамырхәароуп. Амашьынаргыларҭа уа иҟамлароуп. Аиаҵәара ахьгылу аҭыҧ аҟны ус еиҧш ахымҩаҧгашьа аӡәгьы азин имаӡам. Ахәычқәа рыхәмарырҭазы сара уи азгьы, аҭыҧ арыцқьаразгьы иаҭаху ахарџьқәа сыҧшаауеит», - иҳәеит Ахада.


Возврат к списку