Аҧсны Аҳәынҭқарра Ахада

 

Адәныҟатәи аусқәа рминистр Виачеслав Чрыгба иҧылара

06.04.2016

Аҧсны Аҳәынҭқарра Ахада Рауль Ҳаџьымба Адәныҟатәи аусқәа рминистр Виачеслав Чрыгба диҧылеит.

Адәныҟаполитикатә усбарҭа ахада Аҧсны Ахада иҟынӡа инеигеит Урыстәылатәи Афедерациа ашҟа усуратә визитла ицареи хәажәкыра 18 рзы Урыстәыла Адәныҟатәи аусқәа рминистрраҟны аиҧыларақәа рылҵшәеи, иара убас Женева 22-23 хәажәкырамзазы имҩаҧысыз Аҧсны Аҳәынҭқарра аделегациа Нхыҵкавказ ашәарҭадареи аҭышәынтәалареи рзы Жәларбжьаратәи адискуссиақәа 35-тәи рраунд алахәреи ртәы.

Москва усуратә визитла иҟазара аҳәаақәа ирҭагӡаны Адәныҟатәи аусқәа рминистр Сергеи Лаврови Адәныҟатәи аусқәа рминистр ихаҭыҧуаҩ Григори Карасини дырҧылеит. Ирылацәажәан ҩ-ганктәи аизыҟазаашьақәа рзы иактуалтәу азҵаарақәа, иара убас наҟ-ааҟ зҿлымҳара зырҭаша арегионалтәи жәларбжьаратәи атемақәа.

«Урыстәылатәи Афедерациа Ахада Владимир Путини Шәареи ҳазҭоу ашықәс азы жәабран 18 рзы шәеиҧылараан иалыршаз аиқәшаҳаҭра иацҵо, ҳара ҳрылацәажәеит Аҧсны атәылауаа рзы урыстәылатәи атәылауаҩра ырмараианы аиура амеханизмқәа», - иҳәеит аминистр. Уи иациҵеит арҭ азҵаарақәа рзы аҳәоуеиқәшәара алыршара ус имариаӡам, аха ари апроцесс хацыркуп.

Урыстәыла ААР аҟны аиҧыларақәа рымшхәаҧштәы аҟны акрызҵазкуа теманы иҟан аҧсны-урыстәылатәи аҳәаақәа рхысра арежим армариара. «Ари лымкаала ҳтәылауаа ргәы иҵхо зҵаароуп, иара анагӡара амҩа иануп, агәыҕрагьы ҳамоуп аҧсахра бзиақәа ҟалап ҳәа», - иазгәеиҭеит Виачеслав Чрыгба.

Адәныҟатәи аусқәа рминистр Ахада иеиҳәеит изаамҭанытәиу Женеватәи адискуссиақәа рраунд аихшьалақәа ртәы. «Алахәылаҩцәа зегьы ибзиоуп ҳәа иазгәарҭеит аҧсуа ган Қырҭтәылеи Алада Уаҧстәылеи рыбжьара абаандаҩцәа реимдараҟны иҟанаҵаз ацхыраара», - иаҵшьны иҳәеит Виачеслав Чрыгба. Уи игәаанагарала, хымҧада, аҧсуеи ақырҭуа гани женеватәи реиҿцәажәара иалҵшәа бзианы иҟалеит Гал ақ. аҟны ахҭысқәа рықәҿыҭреи раҧхьырҟәҟәаареи рзы амеханизм аусура аиҭахацыркра азҵааразы аҳәоуеиқәшәара алыршара.

Виачеслав Чрыгба иара убас иҳәеит афилософ, «Ахьӡ-Аҧша» I аҩаӡара занашьоу Мураҭ Иаган диижьҭеи 100 шықәса аҵра инамаданы Москватәи аҧсуа диаспора апроект «Адиаспора ахаҿқәа» инақәыршәаны имҩаҧгаз аусмҩаҧгатә дшалахәыз. Ахәылҧаз апрограммаҟны идырбан арежиссиор Амра Наҷҟьебиаҧҳа Виачеслава Чрыгба иматериалқәа рыла Мураҭ Иаган изкны иҭылхыз адокументалтә фильм, имҩаҧган Мураҭ Иаган аурыс бызшәахь иеиҭагоу ишәҟәы «Ажәытәӡатәи аҵас Қьабзе» ацәыргақәҵара.

Ахада анапынҵа ҟаиҵеит иазгәаҭоу ҩ-ганктәи аҧсны-урыстәылатәи аизыҟазаашьақәа ирызку азҵаарақәа рзы аусура арҕәҕәаразы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org