Аҧсны Аҳәынҭқарра Ахада

 

ААН Аныхатә Хеилак ахаҭарнакцәа рҧылара

05.04.2016

Аҧсны Ахада Рауль Ҳаџьымба Аҧсны Аиашахаҵаратә Ныха (ААН) ахаҭарнакцәа дырҧылеит.

Ирылацәажәан Аҧсны аныхатә ҳәоуеиқәымшәарақәа рҭышәныртәалара амҩақәа. Рауль Ҳаџьымба аганқәа ирыдиҵеит аҳәынҭқарра ҭышәынтәаланы аҿиара иаҧырхагоу - аиҟәшара аиааиразы ашьаҿақәа рыҟаҵара. «Арҭ ашьаҿақәа Аҧсны аныха акра, ҳуаажәларра ракра ашьақәыргылара иазкуп», - иаҵшьны иҳәеит Ахада.

Аҳәынҭқарра ахада иеизаз иргәалаиршәеит 2010 шықәса ҧхынҷкәын 28 рзы «Аҭоурых-культуратә ҭынха аобиектқәа ҿҳәарада хәыда-ҧсада рыҭаразы» Аминистрцәа реилазаара Ақәҵарала ацқьа апостол Симон Канатәи ихьӡ зху амонастыри, амонастыри Афон ҿыци ирыҵаркуа адгьылқәеи рыҟны иҟоу аныхабаақәеи хәыда-ҧсада ҿҳәарада ААН Пицундатәии Аҟәатәии Аепархиеи рнапахьы ииагоуп. Ахада иаҵшьны иҳәеит иарбоу адгьылҵакырақәеи амазареи ахархәара азин Аҧсны АН ишаҭоу, абри аӡбамҭа гәыҩбара аҭара шыҟамло.

Абри аан Рауль Ҳаџьымба иазгәеиҭеит ари азҵаара аӡбараан ауаажәларраҟны иҟоу азнеишьақәагьы ҳасаб шырзутәу. «Адинхаҵара шьаҭас иҟаҵаны ҳтәылауаа реиҿагылара алыҳмыршароуп – ари даара ишәарҭоуп, насгьы акыр шықәсқәа рыҩныҵҟа аҭышәнымтәалара ашьаҭа арҳар ҟалоит. Убри аҟнытә аиҿцәажәарақәеи аиҧыларақәеи иага иуадаҩзаргьы, урҭ ирыцҵаны имҩаҧгалатәуп», - иҳәеит Ахада.

Аҳәынҭқарра ахада иазхьаирҧшит аҭышәныртәалара шымҩаҧгатәу Аҧсны Амитропоплиа Ҧшьа ААН иалаҵаны, аб Дараҭи уи идгылоуи абри амҩа иазхәыцырц азгәаҭаны. «Ҳара ҳганахьала абри азҵаара аӡбара ҳацхраалоит, - иациҵеит Рауль Ҳаџьымба.

ААН анапхгаҩы инапынҵақәа назыгӡо аҧшьаҩы еиҳабы Бассариан (Аҧлиаа) аиҿцәажәарақәа мҩаҧысуеижьҭеи акрааҵуеит, ААН аҟнытә азҵаара аӡбаразы иеиуеиҧшым амҩақәа рыдгалан, аха макьана лыҵшәа ыҟаӡам иҳәеит.

Рауль Ҳаџьымба иҳәеит Аҧсны аныхатә зҵаара закәанла аӡбара дшадгыло.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org