Аҧсны Аҳәынҭқарра Ахада

 

Аҧсны Жәлар Реизара ашҟа Ахада иҟаиҵаз Анашьҭымҭа аихшьалақәа рыла анапынҵақәа рынагӡара иадҳәалоу азҵаарақәа ирызку аилацәажәара

04.04.2016

Аҧсны Ахада Рауль Ҳаџьымба аилацәажәара мҩаҧигеит Аҧсны Жәлар Реизара ашҟа Анашьҭымҭа аихшьалақәа рыла анапынҵақәа рынагӡара иадҳәалоу азҵаарақәа ирызкны.

Аилацәажәара иалахәын Ахада ихаҭыҧуаҩ Витали Габниа, Аҧыза-министр Артур Амқәаб, Ахада Иусбарҭа Анапхгаҩы Асҭамыр Ҭаниа, Аҧыза-министр актәи ихаҭыҧуаҩ Шамиль Аӡынба, Аҧыза-министр ихаҭыҧуаҩ Дмитри Сериков, Ахада Иусбарҭа Анапхгаҩы Актәи ихаҭыҧуаҩ Дмитри Шамба, Ахада Иусбарҭа Анапхгаҩы ихаҭыҧуаҩ Асҭамыр Аппба, Аминистрцәа реилазаара алахәылаҩцәеи Ахада Иусбарҭа аусзуҩцәеи.

Аилацәажәара аартуа, Ахада иазгәеиҭеит Аҧсны Жәлар Реизара ашҟа Анашьҭымҭа иагәылоу анапынҵақәа ареформақәеи аиҭакрақәеи рзы “амҩатә хсаала” аҵакы шрымоу. Убри аҟнытә урҭ хымҧада инагӡатәуп. «Арҭ анапынҵақәа рынагӡарала ҳаҧсҭазаара аганқәак рыҟны, лымкаала, аҵараиураҟны, агәабзиарахьчараҟны, акультураҟны, арепатриациаҟны апроблемақәа рыӡбара, афинанстәи атәанчаратәи системаҟны ареформақәа рымҩаҧгара, абизнес аҿиара, аҭагылазаашьа акырӡа аиҭакра алыршахоит, уи ҳтәылауаа рыҧсҭазаара аиҕьтәра иацхраауеит», - иазгәеиҭеит Рауль Ҳаџьымба.

Аҧыза-министр Артур Амқәаб Ахада иҟынӡа инеигеит Аиҳабыра - Аппарат еиҧш, Аминистррагьы, аусбарҭақәагьы – иалкаау анапынҵақәа аҿҳәара иахымгакәа рынагӡаразы иақәнагоу аусура шымҩаҧырго. Ари аусура алҵшәақәак Ахада иҟны ицәыргоуп ҳәа.

Ахада Иусбарҭа иаздырхиаз аматериалқәа дрыхцәажәо, Рауль Ҳаџьымба агәынамӡара шимоу иҳәеит анапынҵақәа рынагӡараҟны аусура ахаҭабзиареи аццакреи инарымаданы. «Рыцҳарас иҟалаз, иаҭаху аццакра ҳамаӡам аусураҟны. Иаҳзааргаз документқәак ырхынҳәны ишьҭын еиҭа аус адуларазы. Анагӡаратә мчхара аусбарҭақәа рыҟны аҩныҵҟатәи агәаҭара рҕәҕәатәуп, имҩаҧгоу аусура иааиҧмырҟьаӡакәа аҳасабарба азура амеханизм ашьақәыргылара аҭахуп хымҧада», - иаҵшьны иҳәеит Ахада.

Ахада инапынҵақәа рынагӡаразы лыҵшәа змоу аусура аҿырҧшы аҳасабала иааигеит Амилаҭтә банк, Афинансқәа рминистрра, Апрокуратура хада.

Ахада Иусбарҭа Анапхгаҩы Асҭамыр Ҭаниа иазгәеиҭеит анапынҵақәа рынагӡашьа агәаҭара шырҕәҕәатәу, уи азы Ахада Иусбарҭеи Аминистрцәа реилазаареи еиқәшәаны русеицура мҩаҧгазароуп ҳәа. "Аҧхьаҟатәи аҳасабырба амҩаҧгараан Ахада инапынҵақәа рынагӡаразы аҭакҧхықәра зду аусбарҭақәа русеицура арҕәҕәаразы иақәнагоу ауснагӡатәқәа хархәара рыҭатәуп ҳәа исыҧхьаӡоит ", - иҳәеит Асҭамыр Ҭаниа.

Аилацәажәара хыркәшо, Рауль Ҳаџьымба иаҵшьны иазгәеиҭеит, есышықәсатәи 2016 шықәсазтәи Аҧсны Жәлар Реизара ашҟа Анашьҭымҭа иагәылоу аҩныҵҟатәии адәныҟатәии аполитика азҵаарақәа рзы Ахада Инапынҵақәа рынагӡара хықәкыс иҟаҵаны Анапынҵа анагӡашьа агәаҭара рҕәҕәахоит ҳәа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org