Аҧсны Аҳәынҭқарра Ахада

 

Аҧснытәи анаплакыҩцәа рҧылара

01.04.2016

Аҧсны Ахада Рауль Ҳаџьымба Аҧсны Анаплакыҩцәа рассоциациа анапхгареи абизнес ахаҭарнакцәеи дырҧылеит.

Аиҧылара иара убас далахәын аҧыза-министр актәи ихаҭыҧуаҩ Дмитри Сериков.

Ирылацәажәан ашәахтәтә реформақәа рынагӡара иадҳәалоу азҵаарақәа, лымкаала, “Изыцҵоу ахәҧсазы ашәахтә азы” азакәан анагӡара шымҩаҧысуа, ашәахтә хылаҧшра аиҕьтәреи, ашәахтәқәҵара асистема аиҵатәреи ртәы.

Ахада иаҵшьны иҳәеит аҳәынҭқарреи абизнеси рыбжьара аиҿцәажәара аҵак ду шамоу. Уи иазгәеиҭеит аҳәынҭқарра аекономикатә политика анаплакра адгылареи арҿиареи хықәкыс ишамоу. «2016 шықәсазы абиуџьет мацара 300 млн мааҭ инарзынаҧшуа азҧаҳҵәеит, уи инацҵаны абанктә ҟәша азы акредиттә цхыраагӡақәа», - иҳәеит Ахада.

Рауль Ҳаџьымба иазгәеиҭеит атәылауаа реиҳараҩык изыцҵоу ахәҧсазы ашәахтә алагалара еилкааны ишазнеиз, избанзар ари аусмҩаҧгатә абиуџьет ахашәалатә хәҭа ахарҭәаара адагьы, аекономикатә усура ашәшьыра аҵхра иазкуп. Убри аан иџьаушьаша, “иалагалоу” ИАА иаҿагылаз аахәаҩцәа ракәӡамкәа, ахәқәа ашьҭыхра иаҿу анаплакҩцәа роуп . Насгьы лассы-лассы ахәшьақәыргылара ҵаҵҕәыда имҩаҧысуеит, избанзар рыхәқәа шьҭыҵуеит ИАА зқәым аекспорт аҟны иҟоу атауарқәа. «Изрыцлеи автохәҭақәа рыхәқәа, урҭ аазго “иалагалоу” ИАА аҟнытә рхы иақәиҭаҳтәызар? Ҵаҵҕәыда изрыцлеи ИАА иаҵанамкуа афатә аалыҵқәа рыхәқәа? Џьоукы ИАА атема рхы иадырхәоит ахәқәа шьҭыхны ҳтәылауаа ржьаразы. Урҭ дара ишырҭаху ахәқәа ирыцырҵоит, убри аан аҳәынтқарра ахара адырҵоит. Ас иҟамлароуп», - иазгәеиҭеит Ахада.

Аҧсны Анаплакҩцәа рассоциациа Ахантәаҩы Роман Качарава Аҧсны Анаплакҩцәа рассоциациа ргәаанагара иҳәеит. Уи агәаанагарала ИАА Азакәан аҧсахрақәа алагалатәуп “иалагалоу” ИАА азыҧҵәа 4 % рҟынӡа иларҟәны. «Ари амҩала ҳцар, анаплакҩцәа рхашәалахәқәа, реикәшарақәа, раалыҵқәа рыҵәахра рҭаххаӡом. Ари аџьырмыкьа аизҳара иацхраауеит. Уи иацҵаны иҳәеит анаплакыҩцәа аамҭа-аамҭала “иалагалоу” ИАА азыҧҵәа аизырҳара ишазхиоу.

Аҧыза-министр Дмитри Сериков иазгәзеиҭеит Анаплакыҩцәа рассоциациа ицәырыргаз апроблемақәа реиҳарак ИАА иазкӡам, урҭ макьанагьы Аҧсны анаплакра иаҧырхагоу даҽа ҧынгылақәак ишрыдҳәалоу. Лымкаала, зыӡбахә ҳәоу аикәшаратә хархәагақәа рзымхароуп, абри инамаданы Аиҳабыра аимпорт змоу ИАА азы ашәатәқәа рыҿҳәара ацҵара амеханизм иахәаҧшуеит. Абри инадкыланы Аиҳабыра анаплакра адгылара аҭаразы хазы аусмҩаҧгатәқәа аус рыдулара иаҿуп, лымкаала, акредит азы апроценттә зыҧҵәаҟны ацхыраара. Аекономика аминистрра апрограмма аҳәаа иҭагӡаны , уи финансла аиқәыршәара аҳәынҭқарратә биуџьет аҟны иарбоуп, иазгәаҭоуп абизнес маҷи абжьаратәи абизнеси рыцхрааразы ауснагӡатәқәа.

Аиҧылара хыркәшо, Ахада иаҵшьны иҳәеит ашәахтә реформа аанкылара ҟалаӡом, убри аан анаплакратә уаажәларра рыҿцәажәара дшазхиоу есқьынгьы аҳәынҭқарратә ӡбамҭақәа ирыхҟьаны ицәырҵыр зуа ауадаҩрақәа иахьынӡауа реиҵатәразы. Аиҧылара иалҵшәаны уи иалахәыз рыҩныҵҟа аилибакаара ыҟан еиҳа ихадаз азҵаарақәа рыҟны.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org