Аҧсны Аҳәынҭқарра Ахада

 

Рауль Ҳаџьымба аҭыҧантәи ахаланапхгара аусбарҭақәа рахь алхрақәа рыҟны ибжьы риҭеит

03.04.2016

Рауль Ҳаџьымба ибжьы риҭеит Аҟәа ақалақь абжьаратә школ №6 аҿы иҟоу алхратә округ №1 алхратә ҭыҧ №1 аҟны.

Амассатә информациа хархәгақәа рхаҭарнакцәа рыҿцәажәараан Ахада иҳәеит аҭыҧантәи ахаланапхгара аусбарҭақәа рахь алхрақәа ирымоу аҵак ду атәы. «Аҭыҧантәи алхрақәа ирымоу аҵакы азы аӡәгьы гәыҩбара имоуроуп, еиҳаракгьы, Аҭыҧантәи алхрақәа русбарҭақәа рыҟны имҩаҧысыз азакәанҧҵаратә еиҭакрақәа рышьҭахь», - иазгәеиҭеит Рауль Ҳаџьымба.

Аҳәынҭқарра ахада иҳәеит араионтә Еизарақәа еиҳа активла аусура иалагоит ҳәа игәы ишаанаго. «Урҭ еиҳа азинқәа рымоуп аҟнытә аусбарҭақәа рхадацәа русура арҭ аизарақәа рганахьала хылаҧшра бзиа роууеит. Ахадацәа ҭакҧхықәрала рмаҵурақәа рызнеира иалагоит. Ҳара - аҭыҧантәи ахаланапхгара аусбарҭақәа активла аҿиара иалагар ҳҭахуп. Усҟан егьырҭ алхрақәа, Аҧсны Жәлар Реизарагьы уахь иналаҵаны, еиҳа ҭакҧхықәрала, аус зуа азакәанҧҵара инақәыршәаны имҩаҧысуа иалагоит", - иҳәеит Ахада.

Рауль Ҳаџьымба гәахәарала иазгәеиҭеит аҿар ақалақьтә Еизара алхрақәа активла иахьалахәу. «Излазбо ала, аокругқәа, алхратә ҭыҧқәа рыҟны, шамахамзар, зехьынџьара акандидатцәа рыҩныҵҟа аҿар ыҟоуп. Ари ҳҿар аҳәынҭқарра аҧсҭазаара активла ишалахәу атәы аҳәоит», - иазгәеиҭеит иара. Ахада адепутатрахь иқәгылоу акандидатцәа ҿарацәа аихьӡарақәа рзеиҕьеишьеит.

Афото: ААУ"Аҧсныпресс"


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org