Аҧсны Аҳәынҭқарра Ахада

 

Акурортқәеи атуризми рминистрра анапхгара рҧылара

30.03.2016

Ахада Рауль Ҳаџьымба дидикылеит Акурортқәеи атуризми рзы аминистр Авҭандил Гарцкиеи уи ихаҭыҧуаҩ Асҭамыр Ахбеи. 

 Аминистр аҳәынҭқарра Ахада иҟынӡа инаигеит Аҧсны Аҳәынҭқарра хәажәкыра 23-26 рзы Ацәыргақәҵатә комплекс хада «Экспоцентр» аҟны имҩаҧысуаз 23-тәи Москватәи жәларбжьаратәи ацәыргақәҵа “Аныҟәарақәеи атуризми” (MITT-2016ш.) аҟны аҽалархәра аихшьалақәа ртәы.

«Аҧсны ахьӡала раҧхьаӡакәны абри аусмҩаҧгатә иалахәын Акуротртқәеи атуризми рзы аминистрра, ари иаҳәоит атәыла анапхгара атуристтә ҟәша аҿиара азҵаара ҷыдала зҿлымҳара шанаҭо», - иазгәеиҭеит аминистр.

Авҭандил Гарцкиа Ахада иаиҳәеит ацәыргақәҵаҟны Аҧсны акубок «иалкааау адебиут» шанашьаз.

Аҧсуа делегациа МITT-2016 аҟны напхгара аиҭон акурортқәеи атуризми рзы аминистр ихаҭыҧуаҩ Асҭамыр Ахба. Уи иажәақәа рыла, ари ацәыргақәҵа ду аҭааҩцәеи адунеи зегьы аҟны аинвесторцәеи рацәаны иаднаҧхьалеит. Асҭамыр Ахба аҧсуа експозициа аусура рҽахьаладырхәыз азы москватәи аҧсуа диаспора ахаҭарнакцәеи атуроператор дуқәа «Аква-абаза», «Русал-тур» и «Риҵа-тур» иҭабуп ҳәа реиҳәеит. Аминистр ихаҭыҧуаҩ иазгәеиҭеит Аҧсны зҿлымҳара аҭара шалыршаз, ишыҟоу авиамҩангаҩцәа аӡәырҩы ҳтәыла аҭаара ишазхиоу, Аҧсныҟа ачартертә реисқәа реиҿкаара азҵаара иалацәажәараны ишыҟоу.

Рауль Ҳаџьымба ибзиоуп ахә ишьеит Акуротртқәеи атуризми рзы аминистрра жәларбжьаратәи ацәыргақәҵа ралахәра. Уи иаҵшьны иазгәеиҭеит атуристтә ҟәшаҟны асервис аҩаӡара ашьҭыхразы аусура амҩаҧгара ишацҵатәу, иара убас зҿлымҳара шрыҭатәу ҧеиҧш змоу ахырхарҭақәа - аекологиатә, адинтә, абальнеологиатә, аҭоурых-культуратә туризм аҿиара гәцаракра шрыҭатәу. «Иахьынӡахәҭоу зҿлымҳара аҭаӡам Мрагыларатәи Аҧсны, акымкәа атуристтә обиектқәа, ажәытәӡатәи аныхабаақәа, аҭоурых-культуратә ҭынха абаҟақәа ахьыҟоу . Ҳара урҭ рышҟа анеиразы алшара аҧҵаразы аусура мҩаҧаҳгоит. Иахьа амҩа ҟаҵоуп Очамчыра араион, Елыр ақыҭан иҟоу иеицырдыруа аныхабаа ашҟа, иазҧхьагәаҭоуп Бедиатәи аныхабаахь уназго амҩа аиҭашьақәыргылара», - иазгәеиҭеит Ахада.

Рауль Ҳаџьымба иаҵшьны иҳәеит сынтәа Аҧсны атуристцәа рацәаҩны иаҭаараны ишыҟоу. «Иахьа инаркны Урыстәыла аҳәааҟны уи ахысра арманшәаларазы аусурақәа хацыркуп. Ари Урыстәылатәи Афедерациа Ахада иҧылараан ҳазлацәажәаоз акрызҵазкуа азҵаарақәа ируакуп», - иҳәеит Ахада.

Аҳәынҭқарра Ахада иазгәеиҭеит хара имгакәа акурорттә аамҭа аҽазыҟаҵара иазку аилацәажәара мҩаҧимгараны дшыҟоу.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org