Аҧсны Аҳәынҭқарра Ахада

 

Сергеи Бебиа Имшира идныҳәалара

15.09.2015

Ахада Рауль Ҳаџьымба абиологиатә ҭҵаарадыррақәа рдоктор, Аҧсны аҭҵаарадыррақәа Ракадемиа академик Сергеи Бебиа Имшира идиныҳәалеит.

Ҳаҭыр зқәу Сергеи Михаил-иҧа!

Гәык-ҧсыкала ишәыдысныҳәалоит шәиижьҭеи 75 ш. аҵра амш. Иахәҭоу ахәшьара роухьеит абиологиатә ҭҵаарадырра, лымкаалагьы аҵиаақәа ринтродуқциа арҿиараҿы шәара иаашәырҧшхьоу алшамҭақәа. Уи лабҿаба ишьақәзырҕәҕәо акы акәны иҟоуп иналукааша аҧсуа ҵарауаҩ Гь. А. Ӡиӡариа ихьӡ зху Аҳәынҭқарратә премиа ахьшәанашьоу.

Иара убас шәлагаламҭа дууп аҧсуа ҵарауааи аҳәаанырцәтәи аҵарауаа аӡәырҩи рыбжьара иҟоу аимадарақәа рымҽхак аизырҳараҿы. Шәара шәрылахәын абнақәа рҭагылазаашьа аҭҵаара иазкыз аекспедициақәа Урыстәыла, Германиа, Австриа, Венгриа, Польша, Словакиа, Литва уҳәа иеиуеиҧшым атәылақәа рҿы. Шәара ишәыбзоураны акырӡа иҭбаахеит Аҟәатәи Аботаникатә баҳча илыҧшааху аколлекциа.Иахьа ҭакҧхықәрала инашәыгӡоит Аҧсны аҭҵаарадыррақәа Ракадемиа Ахада ихаҭыҧуаҩ инапынҵақәа.

Шәара шәыруаӡәкыуп иҳаҩсыз ашәышықәса 60-70-80 -тәи ашықәсқәа раан Аҧсны амилаҭ-хақәиҭратә қәҧара аҕьараҳәа иалахәыз аҧсуа интеллигенциа рхаҭарнакцәа, Аҧсны Жәлар Рфорум “Аидгылара” аҧшьгаҩцәа.

Сергеи Михаил-иҧа, абри амш аҽны ишәзеиҕьасшьоит агәамч ҕәҕәа, ашықәсынҵыра ду, аманшәалара, шәнапы злаку аҭҵаарадырратә ус аҿы - ҧхьаҟатәи аихьӡара ҿыцқәа!

Аҧсны Аҳәынҭқарра Ахада

Р. Џь. Ҳаџьымба


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT