Аҧсны Аҳәынҭқарра Ахада

 

Сергеи Бебиа имшира идныҳәалара

Ҳаҭыр зқәу Сергеи Михаил-иҧа!

Гәык-ҧсыкала ишәыдысныҳәалоит шәиижьҭеи 75 ш. аҵра амш. Иахәҭоу ахәшьара роухьеит абиологиатә ҭҵаарадырра, лымкаалагьы аҵиаақәа ринтродуқциа арҿиараҿы шәара иаашәырҧшхьоу алшамҭақәа. Уи лабҿаба ишьақәзырҕәҕәо акы акәны иҟоуп иналукааша аҧсуа ҵарауаҩ Гь. А. Ӡиӡариа ихьӡ зхыу Аҳәынҭқарратә премиа ахьшәанашьоу.

Иара убас шәџьабаа ҕәҕәоуп аҧсуа ҵарауааи аҳәаанырцәтәи аҵарауаа аӡәырҩи рыбжьара иҟоу аимадарақәа рымҽхак аизырҳараҿы. Шәрылахәын абнақәа рҭагылазаашьа аҭҵаара иазкыз аекспедициақәа Урыстәыла, Германиа, Австриа, Венгриа, Польша, Словакиа, Литва уҳәа еиуеиҧшым атәылақәа рҿы. Шәара ишәыбзоураны акырӡа иҭбаахеит Аҟәатәи аботаникатә Баҳча илыҧшаахыу аколлекциа.Иахьа ҭакҧхықәрала инашәыгӡоит Аҧсны аҭҵаарадыррақәа Ракадемиа Ахада ихаҭыҧуаҩ иуалҧшьақәа.

Шәыруаӡәкыуп иҳаҩсыз ашәышықәса 60-70-80 ашықәсқәа раан Аҧсны амилаҭтә-хақәиҭратә қәҧара аҕьараҳәа иалахәыз аҧсуа интеллигенциа рхаҭарнакцәа, Аҧсны Жәлар Рфорум “Аидгылара” аҧшьгаҩцәа.

Ишәзеиҕьасшьоит агәамч ҕәҕәа, ашықәсынҵыра ду, аманшәалара, шәнапы злакыу аҭҵаарадырратә усаҿы ҧхьаҟатәи аихьӡара ҿыцқәа!

Аҧсны Аҳәынҭқарра Ахада
Р. Џь. Ҳаџьымба

Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT