Аҧсны Аҳәынҭқарра Ахада

 

Ареспублика Ҭаҭарсҭан (Урыстәылатәи Афедерациа) ашҟа аусуратә визитә аихшьала иазку ААТР аинтервиу

27.07.2015

Ареспублика Ҭаҭарсҭан (Урыстәылатәи Афедерациа) ашҟа аусуратә визитә ахыркәшара ашьҭахь Ахада Рауль Ҳаџьымба Аҧснытәи Аҳәынҭқарратә Телерадиоеилахәыра ажурналистцәа рызҵаарақәа рҭак ҟаиҵеит.


Алада Ахада иинтервиу астенограмма ацуп.

Акорреспондент: Рауль Џьумка-иҧа, шәусуратә визит азкуп ҳтәылақәа рыбжьара аусеицура арҕәҕәара, иеицҳзыфеидоу аизыҟазазаашьақәа раҧҵара. Алҵшәақәас иамои ара шәыҟазаара?

Рауль Ҳаџьымба: Алҵшәақәа даараӡа ибзиоуп ҳәа сгәы иаанагоит, избан акәзар аицәажәарақәа хықәкыс ирыман аизыҟазаашьақәа аҧхьаҟа рырҕәҕәара, аекономика аганахьала аицхыраара. Ара иахьа иумбарц залшаӡом Ҭаҭарсҭан ҧхьаҟа ишцаз, иацы, жәацы имҩаҧысуаз, иаҳдырбаз иаҿырҧшны даараӡа иџьоушьартә иҟоуп. Иахьа дара аекономика  ашьҭыхразы алшарақәа даараӡа ирацәаны ирымоуп. Ҳарҭ ҳанеицәажәоз, Ахада иакәыз, егьырҭ аиҳабыра алахәылаҩцәа ракәыз, зегьы ацхыраара ишазыхиоу рҳәон.

Акорреспондент: Рауль Џьумка-иҧа, иарбан хырхарҭақәоу ҳара ҳзы иеиҳа ихадоу? Ифеиданы иҟалар ауа?

Рауль Ҳаџьымба: Ара иаҳбаз, иахьа, иацы, иааидкыланы иахьа уажәраанӡа Ҭаҭарсҭан имҩаҧыргахьоу ҳара ҳхы иаҳархәартә иҟоу ҧышәоуп ҳәа исыҧхьаӡоит. 

Ақытанхамҩа иазку аусурақәа рыҟны ара даара алҵшәа бзиақәа рымоуп. Ҳара уи Аҧсны ҳхы иаҳзархәар, аекономика ашьҭыхразы даара хәарҭара амоуп. Уи адагьы, иара атуризм атәы ҳҳәозар, Ҭаҭарсҭан даара аҿиара амоуп, аҩаӡара ҳаракуп. Изларҳәо ала, абри аганахьалагьы ацхыраара ҳарҭартә иҟоуп. Ҳаицәажәон, ацхыраара ҳартоит аҧышәеимдара аганахьалагьы, ҳчынуаа абрахь иаашьҭны аамҭала, идырбаны, аҧышәа рымадараҟны иҳацхраауеит. Насгьы, иацы шәарҭ ижәбон,  иҿыцу ахархәагақәа, акомпиутертә технологиа ҿыцқәа, ҳара макьана иҳамам, дара аекономиа ашьҭыхраҟны рхы иархәаны имҩапырго, акыр рбиуџьет ашьҭыхра иацхраауеит. Уи ҳара ҳаҟны дара ҳацырхырааны иаҳзаларҵәар, аригьы хәарҭара дууп.

Акорреспондент: Абри авизит ҳара иаҳнаҭеи иҿыцу, иҿыцны иалаҳгои, хықәкыла иуҳәозар?

Рауль Ҳаџьымба: Ахадеи сареи ҳаиҧылараан ҳалацәажәеит аусуратә гәыҧ аҧҵара атәы. Абас аусеицура еиҿкааны, мчыбжьык, ҩымчыбжьа рыла наҟ-ааҟ аус злеицаҳуша азҧхьагәаҭақәа шьақәыргыланы, ҳзықәныҟәаша аусуратә программа аҧҵаны аусура еиҿаҳкаар, сгәы иаанагоит, уи даара алҵшәа бзиақәа ҳнаҭап ҳәа. Аекономика азҵаара ҳаналацәажәоз ахыхарҭақәа егь раасҭа ихадараны иалаҳкааит аграртә политика.

Акыр ҵуеит ҳара аекономика ашьҭыхра азҵаара ҳалацәажәоижьҭеи. Абри аҟәшаҟны иахьа дара ирымоу аҧышәа ҳхы иаҳархәартә еиҧш иҟаҳцароуп.  Аеконмикатә зона хәа зызбахә рҳәо, ара даараӡа ибзианы аус ауеит ҳәа иахцәажәоит. Урыстәыла абри аганахьала иреиҕьӡаны аусурақәа ахьымҩаҧысуа атәылақәа ируакуп Ҭаҭарсҭан. Абри аус азакәанқәа рыҟны иаҳарбар, дара ҳацхрааны иҿыцу раҧхьатәи ашьаҿақәа ҳзыҟаҵар, сгәы иаанагоит, ҳҳәынҭқарреи, ҳбиуџьети, иара ҳажәларгьы ирнубаалартә иҟалоит ҳәа.

Акорреспондент: Рауль Џьумка-иҧа, ара ижәбаз, ишәаҳаз атәы, Казан қалақь дууп, иааидкыланы, атәылазы, асасдкылара ижәбаз, абарҭ ирхышәҳәаауеи?

Рауль Ҳаџьымба: Казан 20 шықәса рышьҭахь саахьан. Иумбарц залшаӡом аҽшаҧсахыз. Ақалақь даараӡа аҽарҭбааит, аҿыцргыларақәа имҩаҧго ахаҿҧшра аҧсахит. Уаанӡа иҟази иахьеи узеидкылаӡом. Аиашазы, Урыстәыла аиҳабыра рыбзоурала, дара рыбзоурала, ажәлар реидгыларала ара иҟарцаз маҷӡам. Иахьа атәыла иахагылоу Рустам Минниханови ижәлари иареи еидгыланы иҟарҵаз, ирылшаз даара ирацәоуп.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT