Аҧснытәи АИХ рзы Аҧсны Ахада Рауль Ҳаџьымба ипресс-конференциа астенограмма

(Иацу II ахәҭа)

Иури Ҟәурасқәуа (агазеҭ «Республика Абхазия»): Рауль Џьумка-иҧа, ааигәа абанк аҧҵахар залшома абизнес маҷи абжьаратәи абизнеси знапы алазкырц зҭаху Аҧсны атәылауаа акредитқәа рызҭо?

Рауль Ҳаџьымба: Сара аицәажәара ҳаналагоз исҳәеит, Амилаҭтә банк иаунажьраны ишыҟоу 200 млн мааҭ инарзынаҧшуа. Арҭ аҧаратә хархәагақәа акоммерциатә банкқәа рышҟа ииагахоит. Ауаажәларра рыҟнытә иааиуа изықәшаҳаҭу апроектқәа ирзоужьхоит 1-1,5 млн мааҭ иреиҳамкәа аҧара. Урыстәылатәи аҧышәа шәацклаҧшуазар, ақыҭанхамҩаалыҵқәа аазрыхуа ауаа ироууа акредитқәа 2 млн мааҭк иреиҳаӡам. Ари етап-етапла имҩаҧыслоит. Аамҭак иаҵанакуа аусура анымҩаҧгаха анаҩс ауп акредит егьи ахәҭа аназоужьхо. Убасала, аусура еиҳа хаҭабзиарала инагӡахоит ҳәа сгәы иаанагоит.

Иури Ҟәурасқәуа: Женеватәи аиҿцәажәарақәа мҩаҧысуеит. Ҳара, убра мацароуп адунеи аҟны ҳабжьы раҳартә иаҳьыҟоу ҳәа ҳаӡбеит, егьыс, ауаа адунеи зегьы иакәшоит, Аҧсны ахьырдыруа рацәоуп. Аамҭала Женеватәи аиҿцәажәарақәа аанкылатәызар, дара рхаҭақәа аиҿцәажәарақәа аҧшьыргаанӡа иазыҧштәызар?

Рауль Ҳаџьымба: Сгәы иаанагоит, макьана ҳара аиҿцәажәаразы алшара ахьҳамоу, ҳара ҳпозициа атәы ҳҳәозар, уи жәларбжьаратәи аиҿкаарақәа рхаҭарнакцәа ҳанырҧылоз исҳәеит: Аҧсны иара ахатәы интересқәа амоуп, ахатәы знеишьагьы амоуп, уи ҳацәхьаҵрангьы ҳаҟаӡам, изҭаххазаалакгьы.

Марианна Кәыҵниаҧҳа («Абхазия-Информ»): Рауль Џьумка-иҧа, сара ауаа ирылаҩыз аӡбаратә процесс «Аладатәи аргыларатә компаниа» ахада Вадим Матуа иус иазкуп сызҵаара. Изыҟамлои аҭакра аус атәыла алымҵрала аҧсахра? Шәгәаанагара абри азы? Шәышҧазыҟоу ари апроцесс аполитикатә ҵакы амоуп ҳәа ахьазырҳәо?

Рауль Ҳаџьымба: Аҵыхәтәантәи ала ҳалагап. Абри азҵаараҟны Шәаргьы даҽа џьоукгьы аполитика адыжәбалозар, уи агәаанагара иашаӡам. Иҟоуп аинформациа аҧаратә хархәагақәа рхархәареи апроект-харџьынҵатә документқәеи рыҟны аилагарақәа шыҟоу зҳәо. Ари зыӡбаз сара сакәӡам, уи иара аус аилыргара знапы алаку роуп. Ҳазыҧшып, аус лҵшәас иаиууа ҳбап. Апрокуратура, аӡбаҩцәа аус руеит. Ара политикатә знеишьак аманы иҟаӡам.

Ҳара уанӡа, амчхараҟны ҳаныҟамызгьы, иаартны иаҳҳәон Урыстәылатәи Афедерациа афинанстә хархәагақәа ззоужьыз апрограммақәа рыҟны иарбамыз аҧарақәа обиекткқәак рыҟнытә даҽа обиектқәак рахь ишиасуаз. Аҟәа ақалақьтә стадион абарҭ аобиектқәа ируакуп. Уи раҧхьа иазгәаҭан 30 млн мааҭ инарзынаҧшуа, аҵыхәтәан, жәантә иеиҳаны иазоужьхеит. Убри аҟнытә абарҭ азҵаарақәа шыҭҵаатәу агәра ганы сыҟоуп.

Атәыла алымҵразы анапаҵаҩра атәы ҳҳәозар, ара зыӡбахә ҳалацәажәо аус мариаӡам. Аҭҵаара мҩаҧызго аусбарҭақәа еиҳа ирдыруеит ари аус аӡбара ишазнеитәу.

Марианна Котова («Абаза-ТВ»): Рауль Џьумка-иҧа, ҳара атәыла аинвестициақәа шалагалатәу атәы ҳҳәоит, аха иҟоуп афактқәа, аинвестициақәа рзы аҭагылазаашьа рацәак ишҽеим атәы зҳәо. Иаҳҳәап, «Континент» иадҳәалоу аҭагылазаашьа, иҟоуп иара убас аобиект аҳабла ҿыц аҟны. Иеилкаауп, ара абизнес знапы алазкыр зҭаху ауаа аҳәынҭқарра аҟнытә ацхыраара ишақәгәыҕуа, лымкаала, аҳәынҭқарра ахада. Иабанӡашәылшәои Шәара, ҳара зегьы иабанӡаҳалшои Аҧсныҟа аинвестициақәа иааиуа рыхьчара?

Рауль Ҳаџьымба: «Континент» атәы ҳҳәозар, сара уи аҭагылазаашьа аҭыҧ ақәҵаразы хәдықәҵаҩыс сықәгылан. Рыцҳарас иҟалаз, ҳаҭыр зқәу Варов сыбжьы имаҳаӡеит. Иахьа еиҭа сгәаанагара сҳәарц сҭахуп: ари анаплакы напхгара аҭаразы иааиуа дарбанзаалак, уснагӡатәны изықәыргылахоит аусзуҩцәа зегьи урҭ руалафахәқәеи реиқәырхара. Убасҟан ауп аҳәынҭқарра азнеишьа аниашахо. Шьҭа аинвестициақәеи урҭ рыхьчареи ртәы. Ааи, иҟоу ииашақәам аҭагылазаашьақәа. Уажә ааигәа сара сҿы иааит аобиект зыргылаз ауаа, аха ицәырҵит ауаа азакәан шьаҭа амаӡамкәа абри апроект ҳалахәызароуп ҳәа, аҧхьаҟатәи ахашәалахәы аҟнытә иалкаау процентқәак зоуларц зҭаху. Ари алҵӡом! Адҵақәа ҟаҵоуп, арҭ аилагарақәа ҳарҿагылоит ҳара. Зегьы иеилыркаарц сҭахуп, азакәан – закәануп, азакәан иеиҳау акгьы ыҟаӡам. Азҵаарақәа абас, сара ишысҳәаз иӡбахоит.

Анаид Гогориан (агазеҭ «Чегемская правда»): Рауль Џьумка-иҧа, иахышәҳәаауеи шәара ауаҩы изинқәа рзы Азинмчзмоу иусура? Ааигәа имҩаҧысыз апресс-конференциаҟны ари аус аҟны иара дыҟанаҵы зныкгьы ажәахә азырхианы сықәымгылаӡац иҳәеит. Шәгәаанагара здыруазарц сҭахуп.

Рауль Ҳаџьымба: Иара ишиҳәаз ауп ишыҟоу. Ажәахә ҟаимҵацзар зынӡа, ари зеиҧш проблеманы иҟоуп. Ҳтәылаҿы ауаҩы изинеилагарк ҟамлакәа ишҧаҟоу? Гьаргь Оҭырба иҵегьы гәацҧыҳәарала аус иулароуп. Ари аҭагылазаашьа ҳалацәажәаны алкаақәа ҟаҳҵараны ҳаҟоуп.

Зураб Аргәын (амедиацентр «Аинар»): Аурыснефт Аҧсны алахьынҵа шҧаҟалои? Анапхгара ргәаанагара зеиҧшрои?

Рауль Ҳаџьымба: Аурыснефт Аҧсны аусура иаҿуп. Аҧшыхәра атәы ҳҳәозар, ҳаҧхьа иҟаз аиҳабыра адокументқәа рнапы аҵарыҩхьан. Урҭ аусурақәа амҩаҧысра иаҿуп. Сара ари саҿагылоит, сазыҟазаашьа ахаангьы исҵәахӡомызт. Иҟоу ацәажәарақәа шьақәзырҕәҕәо шьаҭа рымаӡам. Изҿу аҧшыхәратә усурақәа роуп, уигьы уанӡа иаҧҵаз адокументқәа ирықәныҟәаны имҩаҧыргоит. Анефт аҵхра азҵаара макьана зынӡа иқәгылаӡам.

Елена Заводскаиа: Ҳара, шамахамзар, ҳаиҧыларақәа зегьы раан ҳхатәы лшарақәа ҳхы иаҳархәароуп ҳәа ҳаҳауеит. Аха уи знапы иану рыҟнытә акгьы ҳаҳаӡом, иҟои, абри аганахьала, иҟарҵои? Иҟалозар, аҭагылазаашьа зеиҧшроу ҳашәҳә.

Рауль Ҳаџьымба: Зегьы ишақәнагоу еиҧш лассы имҩаҧымсуазар ҟалап, аха аекономикеи афинансқәеи рминистррақәа адҵақәа рыҭоуп аусбарҭақәа рышҟа инеиуа афинансқәа еиҳа инҭырҳәацааны хылаҧшра арҭаларц азы. Шәара сара саасҭа иеиҕьны ижәбоит Риҵатәи аҳәырҧсарраҟнытә аизгақәа рцифрақәа зеиҧшроу, ара уанӡа иҟаз ацифрақәа миллионла ирыцло иалагеит, зҽызыҧсахыз ыҟоуп абзиара аганахьала. Иҵегьы иеиҕьны хылаҧшра рҭахызар ҟалап арҭ аобиектқәа рыдагьы егьырҭгьы. Иахьа адҵақәа рыҭоуп егьырҭ аҳәынҭқарратә туристтә обиектқәа рыҟнытә иаауа ахархәагақәа рзы лҵшәа змоу агәаҭарақәа рымҩаҧагаразы аҳасабырбара аформақәа иҵегьы реиҕьтәра.

Иахьа Гагреи Гәдоуҭеи рнапхагарақәа изларҳәо ала, ашәҟәы иҭагалоу акурорттә ҟәша аобиектқәа (хазхаҭалатәиқәа) акырынтә иеиҳахеит. Иашоуп, иҟоуп ари аҿагыларақәагьы, аха... Гәдоуҭа мацара абиуџьет ашәахтәқәа алазгалараны иҟоу 600 обиект ыҟоуп.

Аиҳабыра адҵа раҳҭеит нанҳәамза анҵәамҭазы 2016 шықәсазы аҳәынҭқарратә биуџьет апроект аздырхиарц азы, уи ахашәалатә хәҭа уажәтәи абиуџьет аҟны иҟоу аасҭа акыр иеиҳахароуп. 2009 шықәса раахыс ҳбиуџьет ахатәы хашәалатә хәҭа иацҳамҵаӡац. Уи 3,5 млрд мааҭ иахымсӡац. Ари апроцесс марины имҩаҧысӡом, аха иалшоит анагӡара.

Елена Заводскаиа: Абиуџьет аизҳара абанӡалшои, шәгәы иаанагои?

Рауль Ҳаџьымба: Уи адәныҟатәи афакторқәа ҳархьыҧшымкәа ҳҟарҵар алшоит ҳәа сгәы иаангоит.

Витали Шариа: Ари аҧхьа имҩаҧысыз апресс-конференциаҟны Гал араион ашколқәа рыӡбахә ҳалацәажәеит, ақырҭуа школқәа рыҟны арҵага шәҟәқәа ртәы, лымкаала, аҭоурых иазку арҵага шәҟәы. Убри ашьҭахь аладатәи азона ашколқәа рыҟны арҵара ақырҭуа бызшәаҟнытә аурыс бызшәахь аиагаразы аинформациа цәырҵит. Шәгәы ишҧаангои, ари аҟаҵара алшома? Атәыла анпхгара абри аганахьала гәҭакқәас иазгәанаҭеи?

Рауль Ҳаџьымба: Сара ари иаразнак аҟаҵара алшоит сҳәар сҭахӡам. Ҳара иара аҧсуа школқәагьы харҭәааны аҳәынҭқарратә бызшәахьы риагара ҳалымшаӡеит, ҳуаажәларра реиҳарак ишырҭаху еиҧш.

Ақырҭуа бызшәала аҵра атәы ҳҳәозар, Гали Тҟәарчали рраионқәа рыҟны Аконституциа ишаҳәо ҳныҟәароуп. Ҳара ахатәы бызшәа аҵара ҟалаӡом ҳамҳәаӡеит, аха уи хазы маҭәарны иҟазааит.

Аҭоурых, агеографиа амаҭәарқәа рзы арҵага шәҟәқәа аздырхиароуп Аҵара аминистрраҟны. Ақырҭуа рҵага шәҟәқәа ҟамлароуп ҳашколқәа рыҟны. Изида Ҷаниа: Сара ААР ахь схынҳәар сҭахуп. Ихы дзақәиҭтәуи Аҩныҵҟатәи аусқәа рминитр. Ҩ-маҵзурак реимак иахҟьама мамзаргьы иусушьа шәгәамҧхоу? Аминстр ҿыц иарбан ҳасабтәқәоу изықәшәыргылаз? Программа ҳәа акыр имоума? Ишьақәгылаз аҭагылазаашьа алҵшьас иҟои? Аҳәынҭмаҵзуразы азакәан алахьынҵа шҧаҟоу?

Рауль Ҳаџьымба: Аминистр ҿыц уанӡатәи аминистр изықәсыргылоз ауснагӡатәқәа изықәыргылоуп. Елена Заводскаиа дшахцәаз еиҧш акәӡам, аминистри сареи ҳгәанаагарақәа хаз-хазуп, зынӡа иеиқәшәаӡом ҳәа. Шәизҵаар шәылшоит, есҽны иареи сареи абарҭ азҵаарақәа ҳрылацәажәон.

Имариаӡам ААР аҩныҵҟа имҩаҧысуа апроцессқәа. Аминистрра аилазаашьахь аҿарацәа аларагалоит, аха аҧышәа рыҭара мҩаҧысӡом. Аусбарҭ апрофессионализмра шагу убоит. ААИ аганахьала аусура рҕәҕәатәуп, хымҧада. Раҧхьа абри апроцесс анс акәу-арс акәу ҳәаақәаҳҵеит, аха ари аҭагылазаашьа еиҭа иуадаҩхеит. Ари зегьы Лолуа имацара ихароуп узҳәаӡом. Асистема иахароуп, аус азымуӡеит.

Ҳәарада, сынтәа аҧсшьаҩцәа рхыҧхьаӡара акырынтә иеиҳахоит, ара ААР гәацҧыҳәарыла, лҵшәа бзиала аус ауроуп. Анапхгара ҿыц ари алшоит ҳәа сгәы иаанагоит. Аминситр ҿыц апрограмма имаӡам, аха сгәы иаангоит аамҭак анаҩс анапхгара ахырхарҭақәеи ахықәкқәеи шьақәыргылахоит ҳәа.

Иаахтны иуҳәозар, акадрқәа рзымхара ҳныруеит. Имариаӡам ари ма ани амаҵура иақәнагахаша ауаҩы иҧшаара. Иҟоу рҟынтә алхра ҳаҿуп.

Аҳәынҭмаҵзуразы азакәан апроект Апарламент аҟны ишьҭоуп, лассы иазырхиахоит. Уи сара исыдыскылоит хымҧада иаҭаху акы еиҧш, ақәныҟәарагьы ҳалагоит.

Аминистрцәа реилазаареи Ахада Иусбарҭа аппарати реидҵара хацыркуп уи агьынагӡахоит. Ҳара ҳҟынтәи ҳалагоит аштаттә еихшанҵа аиҕьтәра. Уи ада ҧсыхәа ҳамаӡам. Ҳара хырҳагада аҧара наҳхуеит. Ауаа иеилыркаароуп рзанааҭтә лшарақәа ҳасаб рзуны имцар ада амуа ишыҟало.

Анжела Кучбериаҧҳа: Шәара аимпортҧасхра апрограмма алахәра азҵаара шәалацәажәеит. Абри инамаданы Аҧсны иалшои, иамои ирыднагало?

Рауль Ҳаџьымба: Ибзианы аус ҳур, Урыстәыла иадаҳгало ҟалоит. Иаҳҳәап, ауҭраҭых. Ҳара арҧхагақәа рыргылара аҧышәа ҳамоуп. Урҭ Очамчыра араион аҟны ицәгьамкәа аус руит. Пицундатәи арҧхагатә нхамҩа аргылара хыркәшахоит лассы. Иҟоуп ажәалагала бзиақәа ачаи, ацитрусқәа рзы. Алшарақәа ҳамоуп, урҭ есааира иеизырҳалатәуп.

Индира Барцыцҧҳа («РИА Новости»): Иашоума Аҧсны Аҧхьаӡаратә палата агәаҭара иалагеит ҳәа ирҳәо, ари аусбарҭа анапгаҩи шәареи шәеиқәшәахьоума?

Рауль Ҳаџьымба: Ааи, аусурақәа мҩаҧысуеит. Убри аан Агәаҭаратә палатагьы аусура иаҿуп. Уи иалҵшәахо ҳбап. Елена Полуиан: Аҳаиртә баҕәаза азҵаара. Ҿҳәарас иамои?

Рауль Ҳаџьымба: Сара иахьа ҿҳәарас иамоу атәы сызҳәаӡом. Урыстәылатәи Афедерациа Ахадеи сареи ҳаиҧылараан ари ҳара ҳзы хырхарҭа хаданы ишыҟоу сҳәеит. Иара арҭ апроцессқәа зыҽрылазыхәыша ауаа рыҧшаара шалшо атәы сеиҳәеит. Иахьа ари аусбарҭаҟны аусура ҳәаақәызҵо аматериалқәа жәпакы азырхиоуп. Аусура ахацыркра дақәшаҳаҭуп. Аусура иалаго, даналаго – уи аамҭа иаҳнарбоит.

Витали Шариа: Даҽа зҵаарак, иҟалозар? Леонид Ӡаҧшьба икандидатура ықәгылазма аминистр ҿыц изҵаара аӡбараан?

Рауль Ҳаџьымба: Уаҩы гызмалуп Шәара. Акандидатурақәа рацәан. Иџьашьахәу уаауп шәара, ажурналистцәа, иуи шәара ишәҟәазшьазар акәхап. Ӡаҧшьба министрс даныҟаз дшәырџьон, изкны анекдотқәа шәҳәон. Џьоукы ддырҽхәон. Ҳара ус ҳаҟоуп. Уажәы имҩаҧысуа зегьы сгәаҧхоит ҳәа сызҳәаӡом, зҵаарақәак ишыҟоу исыдыскылароуп. Избанзар акритика ҟарҵозар, уи алкаа азуны иазнеитәуп. Ахада уи аҩыза азин имоуп. Сара зҵаарацыҧхьаӡа зегьы сырзыӡырҩуа салагар, акагьы сзыӡбаӡом, аиаша шәасҳәоит. Аӡәы акала дазнеиуеит, егьи даҽакала. Аҵыхәтәантәи аӡбара здызкыло Ахада иоуп.


Возврат к списку