Аҧсны Аҳәынҭқарра Ахада

 

Аҧсны Ахада Урыстәылатәи аинформациатә усбарҭа “Интерфакс” иаиҭаз аинтервиу

05.06.2015

Рауль Ҳаџьымба: Аҧсны амчрақәа рымахәҭақәа реиҟаратәра алыршара даара акраҵанакуеит Аҧсны Ахада далацәажәеит атәылаҟны иҟоу аҭагылазаашьа зеиҧшроу, аекономика аҿиара иазку аусхкқәа, акурорттә аамҭа аҽазырхиара ртәы.

Москва. Рашәара 3. INTERFAX.RU – Иахьа Урыстәылеи Аҧсни хшыҩзышьҭра ду арҭоит 2014 шықәсазы атәылақәа рхадацәа рнапы зҵарҩыз “Аиҩызаратәи астратегиатәи усеицуразы” Аиқәшаҳаҭра анагӡара. Атәыла иахьатәи аҭагылазаашьа, аекономика аҿиаразы имҩаҧысуа аусхкқәа, акурорттә аамҭа аҽазырхиара, Аҧсны азакәани азинтәпориадоки рышьақәыргылара ртәы далацәжәеит аҳәынҭқарра ахада Рауль Ҳаџьымба аинформациатә усбарҭа "Интерфакс-Юг" аинтервиу анаиҭоз.

- Рауль Џьумка-иҧа, иахьа атәыла аҿиара интенсивла имҩаҧысларц азы лшарақәас иаҧҵои Аҧсны?

- Иҟаҵоу маҷӡам. Раҧхьатәи амш инаркны ҳара атәылаҟны иҟоу аҭагылазаашьа аҧсахразы профессионалла аусура иазхиоу ралархәра атәы ҳҳәоит.

Уи адагьы, аҧхьа иҟаз аминистрцәа реилазаара аусзуҩцәа реиҳараҩык иахьагьы аусура иаҿуп. Ари зыҟаҳҵаз баша ацәажәаразы мамзаргьы аӡәы игәаҧхандаз ҳәа акәӡам. Агәра ганы сыҟоуп ҳколлегацәа рдыррақәеи рҧышәеи аҭахны ишыҟоу, урҭ аҧхьаҟагьы хархәара рымазароуп атәыла аекономика иеиуеиҧшым аҟәшақәа рыҟны. Иааиҧмырҟьаӡакәа ҳтәыла аполитикатә усзуҩцәа ҳареи адиалог ҳабжьоуп. Ҳтәыла алахьынҵа згәы иҵхо ауааи ҳареи ҳаиҧылалоит, урҭ апроцесс ралархәра ҳашьҭоуп. Аӡәы иеиликаауеит, даҽаӡәы ари апроцесс даҽакала дазнеирц далагоит. Аха еиҳа иалкааны иазгәаҭатәуп ҳәа сгәы иаанагоит аиҩызареи астратегиатә усеицуреи рзы аиқәшаҳаҭра аус адулара шымҩаҧысуаз атәы. Абри аан зегь раасҭа ихадароу, иара Аиқәшаҳаҭра ахаҭа ҳабжьаҵара ахьҳалшаз ауп. Сгәы иаанагоит, абри адокумент ҳуаажәларра аилибакаара, аҳәоуеиқәшәара ишазхиоу атәы аҳәоит ҳәа, рапҳьатәи апроект акыр ақәыӡбарақәа шамазгьы.

- Шәара ихадараны шәҿаҧхьа иқәшәыргылаз ауснагӡатәқәа иреиуоуп азакәан ҧыжәара аҭара, атәыла ауааҧсыра ршәарҭадареи рзинеиҟарареи. Ишҧамҩаҧысуеи уи анагӡара?

- Раҧхьа иҟаҳҵо ашьаҿақәа зызкугьы ҳҳәынҭқарра аҿиара шьаҭас азакәан азышьҭаҵароуп. Уи ацәхьаҵра ҟамлароуп. Убри аҟнытә анагӡаратә мчра аилазаарақәа зегьы адҵақәа рыҭоуп абри аусура аҭыҧқәа рыҟны имҩаҧыргаларц азы. Аҳәынҭқарратә шәарҭадаратә маҵзура иадҵоуп Аҧсны аекономика ахархәагақәа ралагалара иазхиоу аинвесторцәа ршәарҭадара ахылаҧшра. Адҵақәа аҭоуп иара убас аҩныҵҟатәи аусқәа рминистрра азинтәпориадок ахылаҧшреи Аҧсны автотранспортла иалало ҳасасцәа рганахьала уаанӡа иҟаз ацәгьоура алмыршаразы.

- Рауль Џьумка-иҧа, Аҧсны хаҭала шәара иаҧышәҵеит алхратә система, аҭыҧантәи ахаланапхгара ареформа алазгало аконституциатә комиссиа. Акомиссиа аус шҧауеи, иҟаҵои иахьа?

- Ҷыдала иазгәасҭарц сҭахуп, Аҧсны аполитикатә плиурализм ҭыҧ ахьамоу демократиатә ҳәынҭқарраны ишыҟоу. Ахада напхгара зиҭо аконституциатә комиссиа аусура иаҿуп. Уи аилазаараҟны иҟоуп иеиуеиҧшым аполитикатә мчқәа рхаҭарнакцәа, аиуристцәа. Аусуратә гәыҧ аҵыхәтәантәи ҩымчыбжьа рыҩныҵҟа активла арҭ адокументқәа рыпроектқәа аус рыдулара иаҿуп. Ари ҳара ҳзы акрызҵазкуа темоуп. Насгьы алхратә кампаниаан аппозициаҟны ҳаныҟаз ауаажәларра зықәҳаргәыҕыз хымҧада инагӡахоит. Акраҵанакуеит иара убас ҳара ҳзы Аҧсны амчрақәа рымахәҭақәа зегьы реиҟаратәра алыршара. Иҟоуп ауадаҩрақәагьы, аха урҭ азҵаарақәа ӡбамхар алшаӡом.

- Аҧсны акурорттә аамҭа ишҧазхиоу?

- Ҳусура ари ахәҭа иунарбоит атуризми аҧсшьареи робиектқәа ҳара ҳҿы ҷыдала зҿлымҳара шарҭо. Уи атәы аҳәоит Риҵатәи аҳәырҧсарраҟны имҩаҧысуа аусура. Ари аганахьала аихьӡарақәа ыҟоуп. Ҳара акурорттә ҟәша иатәу аобиектқәа зегьы ашәҟәы иҭагалатәуп ҳәа иҳаҧхьаӡоит. Уи ҳбиуџьет аҭагылазаашьа акыр иаҧсахуеит, Аҧсны ауааҧсыра азакәанеилазымго ашәахтәшәаҩцәаны иҟанаҵоит. Уи ҳҳәынҭқарра аҧеиҧш аӡбара иацхраауеит уҳәар ҟалоит.

Шьҭа ҳара хылаҧшра ду аҳҭароуп атуристцәа ирымадоу ауаа русура ахаҭабзиара. Атранспорттә маҵзура азҵаара, аҳәааҟны иҟоу аҭагылазаашьа – ари зегьы амчрақәеи егьырҭ дарбанзаалак аҧсшьаҩцәа аҳәаа ианахыс инаркны рҭыҧ аҟны инеиаанӡа знапы иану зегьы ҭакҧхықәраны ирыдуп. ААИ ААР ҳуааҧсыреи иаҳҭаауа аҧсшьаҩцәеи рымаҵура ахаҭабзиара иақәнагоу аҩаӡараҟны иҟазартә русура мҩаҧысуазароуп.

- Атәылаҿы аҭагылазаашьа ҭышәынтәалоума? Аҧсшьаҩцәа аара иацәымшәартә иҟоума?

- Ҳара ҳаҟны аҧсшьаҩцәа акагьы иацәшәаӡом. Ҵыҧх аполитикатә ҭагылазаашьа шыуадаҩызгьы Аҧсны зыҧсы зшьаз ауаа рхыҧхьаӡара акыр иеиҳан 2013 шықәса раасҭа. Ҳара ҳзакәанҧҵара аҧсшьаҩцәа ирҧырхагаӡам. Ҳаҩныҵҟатәи ҳапроблемақәа хынҭаҩынҭарада еилҳаргартә ҳаҟоуп.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org