Аҧсны Аҳәынҭқарра Ахада

 

Аҧсны Аҳәынҭқарра Ахада Рауль Ҳаџьымбеи Аҧсны жәлар рартист Алиса Гыцҧҳаи реиҧылара иазку АИХ азы ацҳамҭа

23.12.2014

Ҧхынҷкәын 23,2014ш., Аҟәа. Аҧсны Аҳәынҭқарра Ахада Рауль Ҳаџьымба дидикылеит Москватәи амузыкатә театр «Геликон-Опера» асолист, Аҧсны жәлар рартист, Урыстәыла зҽаҧсазтәыз артист Алиса Гыцҧҳа.

Ҧхынҷкәын алагамҭазы Аҧсны Аҳәынҭқарра Ахада Иусҧҟала амузыкатә культуреи атеатртә ҟазареи рыҟны иҟалҵо алагалазы Алиса Гыцҧҳа иланашьан «Ахьӡ-Аҧша» аорден II аҩӡара.

Алиса Гыцҧҳа Ахада иҭабуп ҳәа иалҳәеит лҟазара ас ахә ҳаракны иахьишьаз азы. «Сара сырҿиара 20 шықәсахыҵреи сымширеи еиқәшәеит, убри инацҵаны шәара исышәҭаз аҳамҭа, Игор Мураҭ-иҧа асценаҿы дзыҧхьаз сыхьӡала инашәышьҭыз ашәҟәы ианыз ажәа ҧшӡақәа – ари зегьы уи амш акыр идырҧшӡеит. Иҭабуп идуӡӡаны», - лҳәеит лара.

«Шәара шәеиҧш иҟоу ауаа – ҳара ҳарҿиаратә елита ахаҭарнакцәа – адунеи зегьы аҿы Аҧсны хьӡи-ҧшеи аманы ицәырызго ацҳаражәҳәаҩцәа иреиуоуп»,- иазгәеиҭеит Рауль Ҳаџьымба.

Алиса Гыцҧҳа аиҧылараҿы ицәырылгеит Аҟәа Аопера аҩны аартра аидеиа. «Иахьа аҧхьаҟа узықәгәыҕша аҿар ирызҳаит, урҭ рхы ахьаадырҧшыша аҭыҧ рымазароуп. Даара ибзиан Аҧсны Аопера аҩны аҧҵазар, мамзаргьы аҧхьанатә аҿар рылшарақәа ахьцәырыргаша аоператә студиа аартызар»,- лҳәеит лара .

«Хымҧада, ҳҿар рыҧсадгьыл аҿы инхарц азы аҭагылазаашьа рзаҧаҳҵароуп, Аҧсны ари аҟазара ахкгьы арҿиара аиуроуп, - инаҵшьны иазгәеиҭеит Ахада.

Аиҿцәажәара ахыркәшамҭазы Рауль Ҳаџьымба Жәлар рартист иааиуа Ашықәса Ҿыц лыдиныҳәалеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT