Аҧсны Аҳәынҭқарра Ахада

 

Аҧсны Ахада Рауль Ҳаџьымба ақыҭанхамҩа азҵаарақәа ирыдҳәаланы имҩаҧигаз аилацәажәара иазку АИХ рзы ацҳамҭа

18.02.2015

Жәабран 18, 2015ш. Ахада Иусбарҭа. Аҧсны Ахада Рауль Ҳаџьымба ақыҭанхамҩа азҵаарақәа ирызкыз аилацәажәара мҩаҧигеит.

Аилацәажәара иалахәын Жәлар Реизара Аиҳабы Валери Бганба, Аҧыза-министр Беслан Быҭәба, Ахада Иусбарҭа анапхгаҩы Асҭамыр Ҭаниа, Афинансқәа рминистр Амра Қәаранӡиа, Ақыҭанхамҩа аминистр Рафик Оҭырба, Аҟәатәи, Гәылрыҧшьтәи, Гәдоуҭатәи, Очамчыратәи, Тҟәарчаләи араионқәа рхадацәа.

Ахада дазҵааит ааҧынразтәи аарыхратә усурақәа шхацырку, алаҵагатә техникатә мыругақәа рҭагылазаашьа зеиҧшроу. «Анхацәа ацхыраара шрыҭатәу иазхәыцтәуп, арҵәыгақәеи абылтәи рыҭатәуп»,- иҳәеит уи.

Аилацәажәараҿы ирыхцәажәан 2015 шықәсазы Аҧсны асоциалтә-економикатә ҿиара ацхырааразы Аинвестициатә программа аҳәаа иҭагӡаны финансла иеиқәыршәахо апроектқәа аус рыдулара азҵаарақәа. «Урыстәыла иаҳнаҭо афинанстә лшарақәа ииашаны рхархәароуп алҵшәа бзиақәа ҳазҭо. Апроектқәа реиҳарак ақыҭа аҿиара иадҳәалатәуп», - иҳәеит Ахада. Уи аилацәажәара иалатәаз ирылеиҳәеит иара идҵала ҷыдала акомиссиа шаҧҵахо аекономикеи, афинансқәеи, ақыҭанхамҩа аминистррақәа рыспециалистҵәа, Апарламент адепутатцәа алархәны. Уи аргама, обиективла аҳәынҭфинансла аиқәыршәаразы апроектқәа шалнахло.

«Ҳара даара ҭакҧхықәрала ҳазнеироуп арҭ азҵаарақәа, нас аҵыхәтәаны ишәам ауалқәа рсиа ду ҳазнымхарц азы. Арҭ аҧарақәа акрызуа анхацәа рыцхыраарахь ирхазароуп, џьоукы рырбеирахь акәымкәа»,- инаҵшьны иазгәеиҭеит Ахада.

Рауль Ҳаџьымба дазааҭгылеит аҧсыӡааӡара аҿиара аҵакы ду иамоу. «Амшын ахықәан ҳанхоит, аха аҧсыӡааӡара аҿиаразы, шамахамзар, аусура мҩаҧысӡом. Шәазхәыц, аҧсыӡаарыхра аҿиаразы аҧышәаратә-гәаҭаратә проект аус шарутәу, аинвесторцәа алархәны акәзаргьы ҟалоит. Ҳара аҧсыӡ шыла ҟаҳҵоит аекспорт азы, аха иаҳа ииашами, иаҳҳәап, иара арахә рхәеилаҵа ара ҳара ҳаҟны аарыхра аиҿкаара ҳалагар», – иациҵеит уи.

Аҧыза-министр Беслан Быҭәба иазгәеиҭеит адгьылқәа рықәаарыхра ахарџьқәа шдуу: «Анхацәа реиҳараҩык адгьыл ақәаарыхра рылшаӡом, ашыла аџьырмыкьаҿы еиҳа иеиҕьаршьоит. Ари аҭагылазаашьа ҳаҧсахроуп», - иҳәеит иара.

Ақыҭанхамҩа аминистр Рафик Оҭырба Ахада изеиҭаиҳәеит аминистрра ҳазҭало ашықәс азтәи апланқәа ртәы, анхацәа ацхыраара шрыҭатәу азгәаҭаны.

Аҟәатәи араион аусбарҭа ахада Беслан Аҩыӡба иҳәеит иҟоу адгьылқәеи адокументқәа рыҟны иарбоуи шеиқәымшәо. «Ҳара комплексла аинвентаризациа ҳалагеит, иҟоу ахыҧхьаӡара ҳдыруазар ҳҭахуп. Шәҟәыла Аҟәатәи араион аҟны 107 га ачаи ыҟоуп, аха уи аус аҿы ус иҟаӡам», - иациҵеит иара.

Ахада иаҵшьны иазгәеиҭеит атәылаҿы адгьылтә кадастр аҧҵареи аинвентаризациа амҩаҧагареи хымҧада иаҭахны ишыҟоу.

Жәлар Реизара Аиҳабы Валери Бганба адгьылтә кадастр аҧҵара аидеиа дадгылеит, иагьациҵеит ақыҭанхамҩа аҟәшақәак ахашәлахәы шурымҭо, аха афатә шәарҭадара асистемаҿы зҵакы дуу акы акәны ишыҟоу, аҳәынҭқарра урҭ ҧарала ацхыраара шрырҭаракәу.

Ахада Иусбарҭа анапхгаҩы Асҭамыр Ҭаниа иҳәеит Аҧсны ақыҭанхамҩа аҿиара аконцепциа аҧҵара шаҭаху ааигәатәи-аҧхьаҟатәи аҿҳәара азгәаҭаны урыстәылатәи аџьырмыкьеи аимпортҧсахратә политикеи иаҧырҵо алшарақәа ҳасаб рзуны.

Аилацәажәара аихшьала ҟаҵо, Ахада инаҵшьны иазгәеиҭеит аиҳабыреи, ақыҭанхамҩа аминистрреи, аҭыҧантәи аусбарҭақәеи русеицура аҵакы ду. Адҵа ҟаиҵеит есымчыбжьа ааҧынразтәи анхамҩатә усурақәа шымҩаҧысуазы адырра ирҭаларц.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT