Аҧсны Аҳәынҭқарра Ахада

 

Аҧсны Аҳәынҭқарра Ахада Рауль Ҳаџьымбеи Женеватәи аиҿцәажәарақәа реицхантәаҩцәеи реиҧылара иазку

21.11.2014

         Абҵара 21, 2014ш., Аҟәа. Имҩаҧысит Аҧсны Аҳәынҭқарра Ахада Рауль Ҳаџьымбеи Нхыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа реицхантәаҩцәа Герберт Зальбер, Анџело Гнедингероми, Женеватәи аиҿцәажәарақәа рыҟны ИАР аполитикатә абжьагаҩ Хаил Мамои реиҧылара. Аиҧылара аибадырра ҟазшьан иамаз, избан акәзар ари Рауль Ҳаџьымба Аҧсны Аҳәынҭқарра Ахада иалхра ашьҭахь раҧхьатәи аҭаароуп.

Аиҧылара иалахәыз арегион аҟны иҟоу аҭагылазаашьеи Женеватәи аиҿцәажәарақәа ҧхьаҟатәи рҧеиҧши рзы ргәаанагарақәа еибырҳәеит.

Рауль Ҳаџьымба иазгәеиҭеит арҭ аиҿцәажәарақәа рҵакы шдуу Аҧсны агәаанагара ацәыргаразы, аха илҵшәадаоу аамҭарацәалатәи аиҿцәажәаратә процесс аҧсуа ган агәҭынчымра шрынаҭо.

Иеиду Европа Ахеилак аҟнытә аиҿцәажәара ацхантәаҩы Анџело Гнедингером иҳәеит Женеватәи аиҿцәажәарақәа аҿиарамҩа ишану. Иара убас Ахада иаиҳәеит ааигәа дызлахәыз 57 тәыла еидызкыло Иеиду Европа Ахеилак Есқьынгьы аус зуа ахеилак аҟны Женеватәи аиҿцәажәарақәа рымҩаҧгара шаҭаху атәы шазгәарҭаз.

Герберт Зальбер Европатәи Аидгыла аҟнытә ацхантәаҩы Аҧсны Ахада дизҵааит Аҧсни Урыстәылеи ирыбжьарҵаз Аиқәшаҳаҭра Женеватәи апроцесс анырра абанӡанаҭои ҳәа.

«Ҳара, аицхантәаҩцәа раҳасабала, шәара ишәыӡбаз ахҳәаа ҳзаҭаӡом, аха хырҩа ҳзаҭаӡом Женеватәи аиҿцәажәарақәа ирылахәу ари иахырҳәаауа, насгьы урҭ ргәалаҟазаара ишаныҧшуа», - иаҵшьны иҳәеит адипломат.

Рауль Ҳаџьымба иазгәеиҭеит ихьыҧшым, исуверентәу Аҧсны, раҧхьа инаргыланы, жәларбжьаратәи адокументқәа рнапаҵаҩраан изықәныҟәо ахатәы интересқәа шракәу. Ахада аидгыларатәи астратегиатәи усеицуразы Аҧсни Урыстәылеи ирыбжьарҵаз Аиқәшаҳаҭразы агәҭынчымра ҵаҵҕәы аманы имбаӡом. «Хара имгакәа Аиқәшаҳаҭра иаҵаҩхоит. Аҧсны ахьыҧшымреи асуверентәреи реиқәырхара рахәыц ҟаҧшьыла иазгәаҭоуп Аиқәшаҳаҭраҟны. Женеватәи аиҿцәажәарақәа рганахьала акгьы аҽаҧсахӡом, ҳара ари апроцесс ҳшалахәыц ҳалахәзаауеит», - иҳәеит Ахада.

Рауль Ҳаџьымба иазгәеиҭеит адунеитә уаажәларра Аҧсни Қырҭтәылеи рҳәынҭқарреизыҟазаашьақәа рҭышәныртәалараан Аҧсны агәаанагара ҳасаб рзырулар шакәу. Уи иажәақәа рыла аҧсуа ган хырҩа анаҭоит Қырҭтәыла аганахьала амч ахархәара алзмыршо адокумент анапҵаҩра иадҳәалоу азҵаарақәа рыӡбара.

«Аҧсны анапхгара ари апозициа зегьы ирылаҳәазароуп», - иаҵшьны иазгәеиҭеит Ахада.

Аганқәа Женеватәи аформат инақәыршәаны лыҵшәа змоу ҧхьаҟатәи аусеицура алыршаразы агәыҕра шрымоу рҳәеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT