Аҧсны Аҳәынҭқарра Ахада

 

Ахада Ихаҭыԥуаҩ аиԥылара мҩаԥигеит еиуеиԥшым аполитикатә партиақәа, ауаажәларратә усзуҩцәа, аҭҵаарадырратә иара убас арҿиаратә, интеллигенциа ахаҭарнакцәа алархәны

23.02.2021

  Ахада Ихаҭыԥуаҩ аиԥылара мҩаԥигеит еиуеиԥшым аполитикатә партиақәа, ауаажәларратә усзуҩцәа, аҭҵаарадырратә иара убас арҿиаратә, интеллигенциа ахаҭарнакцәа алархәны

Ахада Ихаҭыԥуаҩ Бадра Гәынба аиԥылара мҩаԥигеит еиуеиԥшым аполитикатә партиақәа, ауаажәларратә усзуцәа рхаҭарнакцәа, аҭҵаарадырратә иара убас арҿиаратә, интеллигенциа ахаҭарнакцәа алархәны. Ирылацәажәан аԥхьаҟатәи Ахеилак азы аԥҟара апроект, актуалра ахьынӡамоу, ас еиԥш иҟоу аилазаара аҭахны иахьынӡаҟоу.
«Ҳарҭ иаҳҭахуп аԥышәа змоу, ҳҳәынҭқарра ашьақәгылареи аҿиареи рыҟны злагаламҭа ыҟоу ауаа ргәаанагара ҳаҳарц. Ҳарҭ еилаҳкаарц  ҳҭахуп,  абас  еиԥш аилацәажәаразы аиҿкаара ахьынӡаҳҭаху»,-иҳәеит Ахада Ихаҭыԥуаҩ.  

  Бадра Гәынба далацәажәеит ауаажәларратә хеилак аидеиа.

«Ари –аилабжьара-еилацәажәаратә усбарҭахоит. Ахеилаки уи аилазаареи рзы аԥҟара шьақәирӷәӷәоит Ахада. Ахеилак аусура ахырхарҭа хаданы иҟалароуп аҳәынҭқарра аҩныҵҟатәии адәныҟатәии аполитика, аекономика аҿиара, асоциалтә усхк, ауаҩы изинқәеи ихақәиҭрақәеи ралыршареи, Аԥсны Аконституциеи азакәанқәеи рықәныҟәара хылаԥшра аҭареи ирыдҳәалоу азҵаатәқәа рыла ажәалагалақәеи абжьагарақәеи разырхиара аполитикатә партиақәеи ауаажәларратә еиҿкаарақәеи, егьырҭ ауаажәларратә институтқәа рхаҭарнакцәа алархәны имҩаԥысуа аилацәажаәарақәа шьаҭас ирыҭаны».

   Аԥҟара апроект инақәыршәаны, Ахеилак  имҩаԥнагалоит абжьгарақәа; атәыла аԥсҭазаараҟны еиҳа иҵару азҵаарақәа рзы ажәалагалақәеи абжьгарақәеи разырхиара; аполитикатә партиақәеи ауаажәларратә еиҿкаарақәеи аиҳабыреи рыбжьара аконструктивттә еиҿцәажәара алыршара; иаҳа иактуалтәу азакәанапроектқәа рыхәап шреи  абжьгарақәа разырхиареи, иара убас урҭ рполитикатә,  рсоциал-екномикатә хҟьа-ԥҟьақәа заа разгәаҭара; асоциалтә-економикатәи ауаажәларра-политикатә ҭагылазаашьа аҭҵаареи аҳәынҭқарра Ахада иахәҭоу ажәалагалақәа изнагареи.

Ахеилак азин амоуп анагӡаратә мчра иазнархио ауаажәларратә еиҿкаарақәеи аполитикатә партиақәеи, егьырҭ атәылауаҩратә уаажәлаара аинститутқәа ринтересқәа ирыдҳәалоу азыӡбақәа рыҽрылархәра, иара аусура иадҳәалоу аинформациа аларҵәара, иара убас аҳәынҭқарратә усбарҭақәеи аҭыԥантәи ахаланапхгаратә усбарҭақәеи, егьырҭ аиҿкаарақәеи рҟынтәи иахәҭоу аинформациа аиуразы, ихьыԥшым аекспертцәа радԥхьалара .

Ахеилак аилатәара мҩаԥыслоит иахәҭоуп ҳәа ианыԥхьаӡахо аамҭазы, хымз рахьтә знык еиҵамкәа. Ианаҭахха, Ахеилак аилазаара  изаамҭанытәим аилатәара мҩаԥнагар алшоит ахантәаҩы идикылаз аӡбамҭала, ажәахә ҟаиҵоит атәыла Ахада.

Бадра Гәынба игәаанагарала, Ахеилак хәарҭара злоу усбарҭаны иҟалароуп. Иҳәеит иара убас  Ахеилак аилазаара алхраҿы Ахада азҿлымҳара шаиҭо ауаҩы иԥышәеи илшареи. Ара атәыла анапхгара аҭакԥхықәра акыр иҳаракуп», - иҳәеит Гәынба.

Аилацәажәара иалахәыз ари  аԥшьгара иадгылеит,  ари аҩыза аусбарҭа ҳауаажәлар реидкылара аус аҿы зеиӷьыҟам акоуп ҳәа ирыԥхьаӡеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org