Аҧсны Аҳәынҭқарра Ахада

 

Имҩаԥысит Аԥсны Аҳәынҭқарра Ахада Аслан Бжьаниа хантәаҩра ззиуаз Аминистрцәа реилазаара инарҭбаау аилацәажәара

03.02.2021

Имҩаԥысит Аԥсны Аҳәынҭқарра Ахада Аслан Бжьаниа  хантәаҩра ззиуаз Аминистрцәа реилазаара инарҭбаау аилацәажәара


Имҩаԥысит Аԥсны Аҳәынҭқарра Ахада Аслан Бжьаниа ихантәаҩрала азинхьчаратә усбарҭақәа рнапхгаҩцәа, ареспубликатә ҳәынҭқарратә напхгаҩцәа, ақалақьқәеи араионқәеи радминистрациақәа рхадацәа злахәыз Аминистрцәа реилазаара инарҭбаау аилацәажәара

Аилацәажәара амш азҵаараҟны иқәгылан азҵаарақәа фба:

  1. Аԥсны Аҳәынҭқарраҟны иҟоу аепидемиологиатә ҭагылазаашьа, коронавирустә ҿкы аҿагыларазы ауснагӡатәқәа, аԥкратә уснагӡатәқәа аамҭа-аамҭала раԥыхразы ажәалагалақәа;  2.  2020 ш. Аԥсны Аҳәынҭқарратә биуџьет анагӡара, апандемиаан абизнес маҷи ибжьаратәу абизнеси аҳәынҭдгылара рыҭаразы ауснагӡатәқәа; 3. Аԥсны Аҳәынҭқарра атәылауаа ртәанчахәқәеи урыстәылатәи атәанчахәқәа рызшәара аԥҟареи;  4. Аԥсны Аҳәынҭқарра афымцамчтә усхк аҭагылазаашьеи аҿиареи, изакәанымкәа акриптовалиута арҳара; 5. 2020-2022шш. Аԥсны Аҳәынҭқарра  асоциалтә-економикатә ҿиара ацхрааразы Аинвестициатә программа анагӡара; 6. Аекономикатә политика ахырхарҭа хадақәа рышьақәыргыларазы ажәалагалақәа разырхиара иазку аусуратә гәыԥ аԥҵаразы аинформациа.
  
Аԥсны иҟоу аепидемиологиатә ҭагылазаашьеи коронавирустә ҿкы аҿагыларазы ауснагӡатқәеи рзы ажәахә ҟаиҵеит агәабзиарахьчара аминистр Ҭамаз Ҵахнакьиа.

Агәабзиарахьчара аминистр иазгәеиҭеит ареспубликаҟны аҵыхәтәантәи аамҭазы  коронавирус ачымазара еисааира агхара ишаҿу. "Аҵыхәтәантәи 8 мшы рыҩныҵҟала, ажьырныҳәамза 24 инаркны уаҩы ибартә иҟоуп аҿкы злоу ачымазцәа есҽны 500-ҩык рҟынӡа ргәаҭарала рхыԥхьаӡара агхара иаҿуп",-иҳәеит иара.
.
Аԥсны асанитартә ҳақьым Лиудмила Скорик «иналак-налакны арҵаратә процесс ахацыркра» алшоит ҳәа илыԥхьаӡоит. «Иахьа шьҭа Аԥсны иҟоу аепидемиологиатә ҭагылазаашьа аԥкратә уснагӡатәқәа рырԥсыҽра алнаршоит" - лҳәеит лара.  

Убри аан, Скорик иазгәалҭеит раԥхьа аҽазыҟаҵара шаҭаху, ахәыҷқәа классла 20-ҩык иреиҳамкәа  реихшара, КОВИД-19 зыхьны иацәыхьчоу арҵаҩцәа рхыԥхьаӡаразы аинформациа аизгара уҳәа уб.егь.

100 школ инарзынаԥшуа аартра иазхиоуп иҳәеит Аҵареи абызшәатә политикеи рминистр  Инал Габлиа.

"Раԥхьатәи атетап аан иааҳартуеит  ашколқәа 150 –ҩык иреиҳамкәа аҵара ахьырҵо. Ҩымчыбжьа рыҩныҵҟа аҭагылазаашьа ҭышәынтәаланы иаанхар, егьырҭ ашколқәагьы раартра ҳалагоит. Зназы 100 школк ааҳартуеит ", - иҳәеит иара.

Аминистр иажәақәа рыла онлаин ала аҵара алҵшәа бзиақәагьы аман, аха алабаратә рҵаратә процесс ахацыркразы агәыӷра ыҟоуп.  

  Аслан Бжьаниа иҳәеит арҵаратә процесс ахацыркраан ақалақьқәеи араионқәеи рхадацәа ргәаанагарақәа ҳасаб шырзутәу.

Аҳәынҭқарра Ахада  аамҭала Аԥыза-министр ин.н. инапы ианиҵеит ари азҵаара аӡбараан акоординациатә штаб аилатәара аԥхьа арегионқәа рхадацәа алархәны аиԥылара мҩаԥигарц.  

2020 ш.  аҳәынҭқарратә биуџьет анагӡаразы ажәахә ҟаиҵеит аамҭала Аԥыза-министр ин.н., афинансқәа рминистр Владимир Делба. Уи иазгәеиҭеит афинанстә документ хада ахәашәалатә хәҭа 93 процент шынагӡоу. Апандемииа иадҳәаланы иалагалоу аԥкрақәа ирыхҟьаны  абиуьџет ахь ишымааиз 739 миллион мааҭ. Еиҳарак урҭ ашәахтә ааимҭақәа роуп, Урыстәылатәи афинанстә цхыраара хаҭәааны иааит.

Аҳәынҭқарра ахада аиҳабыра ирыдиҵеит апарламент еиҳа активла аус ацура   2021 ш. абиуџьет рыдыркыларц азы.

Афымцамчтә усхк аҭагылазаашьеи аҿиара аԥеиԥши, изакәанымкәа акриптовалиута арҳарареи рзы ажәахә ҟалҵеит аԥыза-министр ихаҭыԥуаҩ -  аекономика аминистр Кристина Озган.

Кристина Озган лажәақәа рыла, ихаз афымцакаҭа алшарамчы аизҳара иахҟьаны фымцамчла аиқәыршәараҟны аиԥҟьарақәеи амашәыри, афымцамч ацәыӡреи ҟалалоит. Афымцамч ахархәара агәаҭара ахьыҟами иԥку афинанстә лшарақәеи ирхыҟьаны ари аинфраструктура ишахәҭоу аусура мҩаԥысуам.  Иазгәаҭоу ауадаҩрақәа рыҩныҵҟа иҟоуп – изаамҭанытәим аҭагылазаашьақәа рцәырҵра аҩаӡара аларҟәра иазку аусмҩаԥгатәқәа еизакны рымҩаԥгара.  

«Ара акраҵанакуеит алшарамчқәа инамыцхәны иахьыҳараку амчхарақәа рыцҵара. Раԥхьа иргыланы Аҟәеи Гагра араиони. Ас еиԥш иҟоу ажаәалагалақәа ҟаҵан урыстәылатәи  аспециалистцәа-афымцамчусзуҩцәа рганахьала нанҳәамза-цәыббрамзазы 2020 шықәсазы. Иааизакны арҭ аусурақәа рыхәԥса иартәоит 4,7 млрд мааҭ», – иазгәалҭеит аекономика аминистр.

Аҩбатәи акрызҵазкуа азҵаара – ахархәаҩцәа рганахьала афымцамч ахархәара хылаԥшра аҭареи автоматтә системала аус зуа агәаҭаратә мыругақәа ралагаларала  аԥхьаӡареи.  

«Абас еиԥш иҟоу аусура мҩаԥган  2011-2014 шш. рзы, убасҟан ишьақәыргылан 18 нызқь инарзынаԥшуа агәаҭагатә мыругақәа. Ас еиԥш иҟо азнеишьа алҵшәа аман ҳәа иԥхьӡоуп. Уи арҵабыргуеит ахархәаҩцәа рганахьала афымца ахархәара алаҟәреи ахәԥса ашәареи рзы астатистика. Убри аҟнытә ари аҩыза ахылаԥшратә система хара имгакәа Аҟәа ақ. аҟны иалагалатәуп», – ҳәа Анаҩс, Озган иҟалҵаз ажəахə аҿы иазгəалҭеит :”Амодернизациеи ареконнструкциеи рзы апрограмма аус адулан 2016 шықəса рзы, 2017-2021ш.ш. аамҭа арбаны, аха афинанстə хыҵхырҭа ахьыҟамаз иахҟьаны анагӡара залыршамхеит. Ахыбрақəа рыхəҭак ари апрограмма аҟынтə аинвеспрограмма иалагалан, ҳазҭагылоу аамҭазы урҭ рынагӡара мҩаԥысуеит. Иаҳҳəозар, астанциамаҷқəеи аихшарҭатə цəаҳəақəеи реиҭашьпақəыргылара”,-лҳəеит аминистр.

Афымцамчтəы наплакаҟны, атехникатə зҵаара анаҩс, зегь реиҳа иуадуҩу акоуп атарифтə политика. Ианаамҭаз афымцамчы аусзуҩцəа рыбжьы раҳазтгьы, иҟалап аҭагылазаашьа ари даҽакала иҟаларгьы”, - ҳəа азгəалҭеит актəи аҧыза-министр.
Лара инаҵшьны иазгəалҭеит, иахьатəи аамҭазы азҵаара шықəгылоу афымцамчтə усхк аҟны аҳəынҭқарратə  тарифтə политика аконцепциа аус адулара. Иахəҭоу ажəалагалақəа “Амшынеиқəа афымцамчы”  аҟынтə аиҳабыра рахь иаашьҭуп. Кристина Озган адырра ҟалҵеит Аҧсны Аҳəынҭқарра асоциалтә-економикатə ҿиара иазку Аинвестициатə программа аус шауазы.  

  Иҳаҩсыз ашықəс азы Озган лажəақəа рыла, аекономика аминистрра  Аинвестпрограмма аусмҩаҧгатəқəа ҩба нанагӡеит. “Ари 2017-2019ш.ш. ирыҵаркуаз апрограмма 600 млн. мааҭ  рҟынӡа афинанстə цхыраара иацəынхаз, иара убас апрограмма ҿыц 2020-2022ш.ш. рзы афинанстə лимит иартəеит 1, 5 млрд. мааҭ”, - ҳəа азгəалҭеит лара.
Фактла иаҳгозар, 1,3 млрд.мааҭ аҽҭагӡатəын, аурыс-аҧсуа аиҳабырабжьаратə комиссиа аӡбамҭа ала, 2020 ш. рзы афинанстə лимит 190 млн.мааҭ рҟынӡа иркьаҿын. Ари аҧарала Урыстəылатəи Афедерациа аҟынтəи иаауаз афымцамчы азы ауал ашəарахьы ишьҭын.
“Аинвестпрограммаала аусмҩаҧгатəқəа рынагӡара аҧсуа ган нап анаркит лаҵарамзазы. Апроект-харџьынҵатә документқəа аекспертиза ианахрыжь,  аиҳабыра апроектқəа рынагӡара нап анаркит ашықəс аҩбатəи азбжазы.

Ҧхынгəымза анҵəамҭазы 35 усмҩаҧгатəқəа рзы аҳəынҭқарратə контрактқəа рыдкылан, афинанстə цхыраара аартын нанҳəамзазы. Афинанстə цхыраара анхацыркыз инаркны ҧшьымз рыла 2020ш.рзы алимит иартəеит 1млрд.мааҭк, мамзаргьы 77%.
Ҳара ҳазлахəаҧшуа ала, ари алҵшəа бзиоуп. Иныхым ацəынха иартəоит 298млн. мааҭ”, - адырра ҟалҵеит Озган. Аҧыза-министр иазгəалҭеит, иныхым ацəынха злашьақəгылоу. 40млн. мааҭ апроект-ҧшааратə усурақəа ирзырхан, иара убас апенитенциартə усбарҭа аргыларазы ахарџьынҵатә документациа аҽазыҟаҵара. Аҧара абжа Бзыҧҭатəи астанциа маҷ аиҭашьақəыргылахь ирхан.

Озган, Ахада иҟынӡа иналгеит, ҳазҭоу ашықəс актəи азбжанӡа арҭ аҧарақəа ахархəара шырзухо. Анаҩс, аминистр еиҭалҳəеит 2017-2019ш.ш. рзы Аинвестпрограмма аҟынтə 600 млн. мааҭ ахьныхыз. “Ҳарҭ аҧарақəа рыбжеиҳарак ҳхы иаҳархуеит ажьырныҳəамза 1, 2021ш. ахь ииасуаз, уи иартəоит 232 млн.мааҭ. Урҭ рыбжьара иҟоуп ауадаҩрақəа зцу ахыбрақəа, иаҳҳəозар, Тҟəарчалтəи араионтə хəышəтəырҭа, иара убас азҵаарақəа жəпакы ишахəҭоу еиҧш аус зыдулам”,- лҳәеит Озган.
К.Озган иара убас адырра ҟалҵеит 2021ш.рзы Аинвестпрограмма инақəыршəаны ицо аусурақəа рзы.  2021ш. рзы апроект-харџьынҵатә документациа аиқəыршəара иадҳəалоу аусқəа зегьы, шамахамзар, инагӡоуп. 33 аҳəынҭқарратə еспертиза аҟынтə 26 ҳаухьеит, иаанхаз жəабранмза иалагӡаны иҳауеит, анаҩс аекономика аминистрра аусқəа рынагӡара нап аланакуеит.

Ақыҭанхамҩатə комплекс аҿиара иазкыз апланқəа ртəы аиҧылараҟны дазааҭгылеит актəи аҧыза-министр Беслан Џьапуа.
Иара иажəақəа рыла, иҳаҩсыз ашықəс азы Аҧсны ақыҭанхамҩа аминистрреи  Урыстəылатəи Афедерациеи аусеицуреи аимадареи рыбжьан.
Аҧсны Аҳəынҭқарра Ахада Аслан Бжьаниа Москваҟа иусуратə ныҟəарақəа раан диҧылеит ақыҭанхамҩа аминистр Дмитри Патрушев.
Ҳара ҳтəыла иаҭааит Урыстəылатəи Афедерациа ақыҭанхамҩа аминистрра аделегациа, аминистр ихаҭыҧуаҩ Џьамбулат Хатуов зхадараҿы дыҟаз.
Хра злоу  аинвестициатə проектқəак жəпакы аусрыдулара нап аркхоит.
Аҧсны Аҳəынҭқарра атəылауаа атəанчахəы рызшəареи, Аҧсны атəылауаа аурыс тəанчахəы рызшəареи рзы  асоциалтə еиқəыршəареи адемографиатə политикеи рминистр Руслан Аџьбеи, атəанчахəтəы фонд ахантəаҩы Денис Гəылариеи, амилаҭтə банк ахантəаҩы Беслан Бараҭелиеи ажəахəқəа ҟарҵеит.  
Аҳəынҭқарра Ахада агəынамӡара ааирҧшит атəылауаа атəанчахəы рыҭара азҵаара шыӡбо, иара убас атəанчахəы ашəара шеиҿкаау рзы. Аслан Бжьаниа адҵа ҟаиҵеит аамҭа кьаҿк иалагӡаны иҟоу ауадаҩрақəа аҧыхзарц, аҭакыҧхықəра зду аусзуцəа зегьы ргəырҽаниҵеит ишахəҭоу еиҧш рус нарыгӡарц.
Ахада ихаҭыҧуаҩ Бадра Гəынба инапхгарала аусутə гəыҧ ажəалагалақəа ҟанаҵоит Аҧсны Аҳəынҭқарра аекономикатə политика ахырхарҭа хадақәа разырхиаразы. Абри атəы иҳəеит Ахада Аслан Бжьаниа жəабранмза 3 рзы  имҩаҧысыз аиҳабыра злахəыз  инарҭабааз аилатəараҿы.

“Ари адунеи аҟны аҿиара залшом ухатə ориентир умамкəа. Аекономикатə ҿиара апланқəа, иақәнагоу аҩаӡараҿы анеиразы ахықəкқəа рынагӡара. Убри инамаданы иаҧҵоуп аусуратə гəыҧ”, - иҳəеит аҳəынҭқарра Ахада.

Аусуратə гəыҧ аҧҵан 2020ш. ҧхынҷкəынмза 8 инаркны Ахада идҵа инақəыршəаны. Уи аилазаара иалахəуп аҳəынҭқарратə усбарҭақəа рнапхгаҩцəа, аекономика, абанктə усура, абизнес-еилазаара, аекономика ахырхарҭала Аҧснеиҧш уи анҭыҵынтə аекспертцəа, иара убас ааҧхьара змоу аҟазацəа.
“Аусуратə гəыҧ азҿлымҳара анаҭоит апрограмма шықəсқəак раҧхьа аус зыдулаз, убри аан “25 шьаҿа Аҧсны Аҳəынҭқарра анекономика аҿиаразы”, Москватəи аҧсуа диаспореи, “ Аҧсны Аҳəынҭқарра астратегиатə ҿиареи”, Аҧсны Аҳəынҭқарра иҟны иаҧҵаз  астратегиатə ҭҵаарақəа  рцентр аус здырулаз иара убас егьырҭ апрограммақəа”, - иҳəеит аусутə гəыҧ анапхгаҩы, Ахада ихаҭыҧуаҩ Бадра Гəынба.

Иара иазгəеиҭеит, арҭ апрограммақəа имаҷымкəа афинастə харџьқəа шрыцыз, аус шадырулоз хыҧхьаӡара рацəала аҟазацəа. “Урҭ русумҭақəа, хымҧада ҳхы иаҳархəароуп”, - инаҵшьны иазгəеиҭеит Ахада ихаҭыҧуаҩ. Агəыҧ ахырхарҭақəа дырзааҭгыло, Гəынба иҳəеит ишхымҧадатəиу аиҭакрақəа ралагалара, иаҳхəозар, абанктə усхк, ашəахтə система рҿы.

Иаҧҵахоит аҭагылазаашьа бзиа аинвестициа адыҧхьалареи ахьчареи рзы. “Абизнес маҷи абжьаратəи рзы егьырҭ ахырхарҭақəагьы аус рыдулатəуп, аекономика аҿиара аус анырра азҭо”- иҳəеит Ахада ихаҭыҧуаҩ.

Аусутə гəыҧ раҧхьатəи аилатəара мҩаҧысуеит ҳазҭоу амзазы. Аусура аҿиашьазы Ахада инарҭбаау адырра иоулоит.

Ахада азҿлымҳара аиҭеит аусураҟны ииашоу астатистика ахархəара иамоу аҵакы. “Сара ари азҵааразы аҳəынҭстатистика анапхгаҩы слацəажəахьеит. Анаҩстəи аиҧылараҟны аусура аиҕьтəразы азҵаарақəа ҳрылацəажəоит”, - иҳəеит Аслан Бжьаниа.

        
            










Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org