Аҧсны Аҳәынҭқарра Ахада

 

Аԥсны Ахада: «Зымчхараӷәӷәоу акаҭақәа аусура иалагарц азы урҭ ирықәхарџьтәуп 11 млрд мааҭ»

27.01.2021

Аԥсны Ахада: «Зымчхараӷәӷәоу акаҭақәа аусура иалагарц азы урҭ ирықәхарџьтәуп  11 млрд мааҭ»

Аԥсны Аҳәынҭқарра Ахада Аслан Бжьаниа Аԥснытәи аҳәынҭқарратә телехәаԥшрала аԥсуа уаажәларра ргәы иҵхо азҵаарақәа рҭакқәа ҟаиҵеит.
Ахада иазгәеиҭеит афымцамч аҟны ишьақәгылаз аҷыдалкаатә ҭагылазаашьа акрызхыҵуа амзызқәа амоуп. Ихадарақәоу ируакуп 2016 шықәсазы АА ШЬаҭанкылатәи аргылара аусбарҭеи ЗҲӘА «АфымцамчкаҭаАпроекти» ирыбжьарҵаз аиқәшаҳаҭра.

Ари аиқәшаҳатра инақәыршәаны аилахәыра «АфымцамчкаҭаАпроект» иазнархиар акәын адокумент хада  «АА афымцамч аԥхьаҟатәи аҿиара асхемеи аплани». Абри азы 2016 ш. аинвестпрограммаҟны иарбан 55 млн 300 нызқь мааҭ.

Имҩаԥгаз анализ аихшьала ала ари аусхк аҟны аспециалистцәа ирыԥхьаӡеит зымчхара ҳараку акаҭақәа аусура иалагарц азы иазоужьтәуп ҳәа  11 млрд. мааҭ. Аҵыхәтәан, адокумент рыдрымкылеит аекономика аминистрраҟынгьы, аиҳабыра рҟынгьы.  2017 шықәса инаркны иахьа уажәраанӡа афымцамч алагалара алыршахеит  862 млн мааҭ, даҽ.иаҳҳә. шықәсык 215 млн мааҭ. Егьырҭ аԥарақәа рыԥшаара алымшеит, аҳәынҭқаррагьы аинвестициақәа рымҽхак аиҳатәрагьы алшомызт. Ас еиԥш ҳцалар, атәыла афымцамчсистемаҟны аҭагылазаашьа аҭышәныртәаларазы ажәашықәсақәа аҭаххоит.  Аԥсны аиҳабыра рҿаԥхьа еиҭа афымцамч апроблемақәа анцәырҵ, 2020 шықәсазы АА Ахада инапынҵала Аминистрцәа реилазаара аиҿцәажәара мҩаԥыргеит УА афымцамч аминистрра алархәны. Уи ашьҭахь нанҳәамзазы Аԥсныҟа иааит 20-ҩык  аспециалистцәа. Еиҭа акаҭақәа рҭагылазаашьа ахәшьара аҭаразы аусура мҩаԥган, иагьазырхиан адокумент   «Астанциа еиҵа афымчатехникатә мыруга  35 Квт-и инеиҳани, афымцамҩангага цәаҳәақәа, иара убас АЕН «Амшынеиқәафымцамч» афымцатә мчхарақәа рхархәарақәа рымҩаԥысшьа атехникатә аудит амҩаԥгаразы аҳасабырба».  

Аслан Бжьаниа иажәақәа рыла, ари адокумент инақәыршәаны, ареспублика фымцала аиқәыршәара аҭышәныртәаларазы, уи ахархәаҩцәа рыҭаразы, хара имгакәа ари аусхк иазоужьтәуп 4,7 миллиард маааҭ. «Ари рацәак ишьҭнахӡом амчхара, аха машәырда афымца аҭара еиҭалыршахоит»,- иҳәеит Ахада.
Аҳәынҭқарра Ахада иазгәеиҭеит Аԥсны афымца атариф аҵыхәтәан ишышьҭыхыз 2012 шықәсазы, иагьартәеит 40 копек  киловатк азы, Аԥсны иҟоу 11 нызқь мааҭ амзабжьаратә уалафахәы ҳасаб азуны.  Уи иара убас еиҿирԥшит Адлертәи араиони Шәача ақалақьи, амзабжьаратә уалафахәы 39 нызқь мааҭ ахьыҟоу, алашара атариф 4 мааҭк иаԥсазар.

«Ҳара ишьақәҳаргылароуп афымцамч атариф азы техникалеи економикалеи иҵаҵӷәырку аметодика. Аиҳабыра адҵа рыҭоуп, адокумент азырхиара иаҿуп, агәра ганы сыҟоуп  2021 шықәса актәи азбжазы адкылара шалшо»,- иҳәеит Аслан Бжьаниа.

Ахада иара убас иазгәеиҭеит аминистрцәа реилазаараҟны адокумент азырхиара иаҿнаҵы акрызҵазкуа акәны иҟоуп — «Аҽгәара» ацәаҳәа шьаҭанкыла арҿыцра . Урыстәылатәи Афедерациа ашҟа ашәҟәы азырхиоуп , уи инақәыршәаны 2021 ш. Аинвестпрограмма арҽеирақәа алагалахоит ари ацәаҳәа арҽеиразы. «Аԥсны афымцатә усхк ишәа-иза азнеира аҭахуп. Уи ус иаарласны иузыӡбаӡом. Апроблем инеиԥынкыланы аӡбара мҩаԥысуазҭгьы, иахьа иҟоу аҭагылазаашьа ҟалаӡомызт.
Еилаҳкаауеит ари аус иацу ауадаҩрақәа - ауааԥсыра алашара ҟамлар иргәаԥхаӡом, ари атема аполитикатә ҭагылазаашьа аруадаҩразы ухы иаурхәар ҟалоит, ус иагьыҟарҵоит џьоукы. Зегьы аабоит, аха ари апроблема азыӡбаӡом. Ҭынч, ишәатәуп-изатәуп зегьы», - ҳәа азгәеиҭеит аҳәынҭқарра Ахада.  

Аҳәынҭқарра Ахада аинтервиу имылхит ААТРЕ адиректор хада Ирина Агрба.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org