Аҧсны Аҳәынҭқарра Ахада

 

Ахада АЕА «Амшынеиқәафымцамч" даҭааит

26.01.2021

Ахада АЕА «Амшынеиқәафымцамч" даҭааит

Аԥсны Аҳәынҭқарра Ахада Аслан Бжьаниа АЕА «Амшынеиқәафымцамч" даҭааит.

«Амшынеиқәафымцамч"  адиректор хада Михаил Логәуеи Ахадеи  реиԥылараҟны иалацәажәан изакәанымкәа афымцамч ахархәара инамаданы аҳәынҭқарра Ахада инапынҵақәа рынагӡашьа шымҩаԥысуа атәы.

«Исҭахын ажьырныҳәамза 22 рзы аилацәажәараҟны иҟаҵаз анапынҵақәа шынарыгӡо еилыскаарц, аусура шцо, уадаҩрақәас иҟоу, аҭыԥаҟны афымцамч аусзуҩцәеи, администрациақәа рхадацәеи, азинхьчаратә усбарҭақәа русзуҩцәеи русеицура шымҩаԥысуа атәы».- иҳәеит А.Бжьаниа.

«Амшынеиқәафымцамч" Адиректор хада Михаил Логәуа иажәақәа рыла, иоуа аинформациа ала – аштабқәа аус руеит, анапынҵақәа зегьы рынагӡара иаҿуп, ус шакәу шьақәдырӷәӷәоит афымцамчсистемаҟны иҟоу арбагақәа.

«Ҳазҭагылоу аамҭазы шәыдҵа анагӡара мҩаԥысуеит администрациақәа рхадацәеи, афымцамч аусзуҩцәеи, амилициа аусзуҩцәеи русеицурала. Ҩымштәи аусура аҩныҵҟала иааанкылоуп 50 мегаватт инареиҳаны ахархәара змаз изакәанымкәа аус зуаз амыругақәа. Ари лыҵшәа бзиоуп, аха ари аусура асистема ҟазшьа амамзар, амчхареидарақәа еиҭа ирызҳауеит», – иҳәеит Логәуа.

«Амшынеиқәафымцамч" Ахада ихшыҩ азишьҭит ас еиԥш иҟоу ауснагӡатқәа рымҩаԥгара анаҩс, ҭагалан афымцамч ахархәара абри инаҟараны ишеиҵатәыз, аха ахылаԥшра анакәадаха, афымцамч изакәанымкәа ахархәара еиҭа ишазҳаз.

Ахада иаҵшьны иҳәеит, иазгәаҭоу ахықәкқәа рынагӡаразы афымцамч аусзуҩцәа русура зинла ацхыраара аҭара шырӷәӷәатәу.  

«Иацы Апарламент ашҟа исышьҭит амаинингтә фермақәа закәанымкәа рхархәаразы аҭакԥхықәратә уснагӡатәқәа рырӷәӷәаразы азакәанапроектқәа рпакет. Сгәы иаанагоит адепутатцәа адгылара рырҭап ҳәа. Урҭ рыҟны иарбахоит шәагаала зеиԥш ҟамлацыз ахараԥсақәа, амыругақәа рымхразы алшарақәа, аҭакԥхықәра рыдҵара. Сгәы иаанагоит арҭ ауснагӡатәқәа азакәан еилазго рҿагылараҟны ӷәӷәала иҳацхраауеит ҳәа», – иаҵшьны иҳәеит Ахада.

Аслан Бжьаниа иазгәеиҭеит агәаанагарақәа шыҟоу араионқәа рыҟны алашара аамҭа-аамҭала арцәара шымҩаԥысуа иаҭаху арбагақәа рышҟа аиасразы. Даҽакала иаҳҳәозар, ахархәара аларҟәра мҩаԥсыуеит ҳәа изакәанымкәа акриптовалиута зырҳауа ирҿагыланы ақәԥара иалҵшәаны акәӡам ҳәа.
    
«Ари ҷыдала хшыҩзышьҭра аҭазар сҭахуп: аԥыза-министр ихаҭыԥуаҩ инапынҵақәа аамҭала иназыгӡои Ахада Иадминистрациа анапхгаҩи иақәнагоу адҵа рысҭеит: аҭыԥқәа рыҟны инеины амыругақәа ахьаҿыху, иаҿызхыз иахәаԥшырц. Асиақәа ыҟоуп, аҭыӡҭыԥқәа рыла иныҟәааит. Аиқәымшәарақәа ҟалар, алкаақәа ҟаҳҵоит, акадртәқәагьы убрахь иналаҵаны», – иазгәеиҭеит Аслан Бжьаниа.  «Ахәашаҽнынӡа, уи ауп ҿҳәарас иамоу, - игәиҽаниҵеит иара.

Избоит аштабқәа рылахәцәа ргәы шҭынчым. Убри аҟнытә Михаил Валери-иԥа, сшәыҳәоит афымцамч алшарамчқәа ирызкны араионқәа рыҟнытә  ишәоуа арбагақәа зегьы администрациа ахадацәа ирышәҭала, адокумент ашьҭахьтәи ахаҿраҟны рнапынҵамҭақәа анызароуп. Иаҳдыруазароуп урҭ ацифрақәа ишрықәшаҳаҭу, уи аҭак аҟаҵаразы аамҭа анааилак аҭакԥхықәра хаҭала ирыдҵахоит. Нас аилибамкаара ҟамлааит», – ихиркәшеит Ахада.  

Михаил Логәуа аҳәынҭқарра ахада агәра ииргеит иахьазы ареспублика аҩныҵҟа аамҭа-аамҭала алашара арцәара шыҟам.  
«Ҳара ԥасеиԥш, араионқәа рыҟны алашара ҳарцәоит амчхараеидара ианахыԥалак. Аҭыԥқәа рыҟны уи ахархәара еиҵахо иалагар, иаҳмырцәар ҳалшоит», – иҳәеит Логәуа.

Ахада дазҵааит уахыки - ҽнаки афымцамч ахархәара.  "Ахада иҟны имҩаԥысыз аилацәажәара аԥхьа уи 11,8 млн кВ сааҭ рҟынӡа инаӡон  – ас еиԥш иҳараку арбагақәа уанӡа иҟамлацызт. Аилацәажәара ашьҭахь арбагақәа есҽны икаҳауеит, ашәахьаҽны уи иартәеит  9,8 млн кВ сааҭ.",- иазгәеиҭеит Логәуа.

Анаҩс, Ахада «Амшынеиқәафымцамч" афымца амҩақәҵарҭатә маҵзура хада даҭааит, акаҭаҟны амчхараеидара хылаԥшра шарҭо дахәаԥшны ибеит.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org