Аҧсны Аҳәынҭқарра Ахада

 

Ахада Апарламент анапхгара злахәыз аилацәажәара мҩаԥигеит

22.01.2021

Ахада Апарламент анапхгара злахәыз аилацәажәара мҩаԥигеит

Аԥсны Аҳәынҭқарра Ахада Аслан Бжьаниа Апарламент Аиҳабы, Аиҳабы ихаҭыԥуаҩцәа, апарламенттә еилакқәа рнапхгаҩцәа злахәыз аилацәажәара мҩаԥигеит.

Аиԥылара аартуа, аҳәынҭқарра Ахада иҳәеит:

«Акыр иаԥсоу аҩызцәа, шәара ижәдыруеит афымцамч аҟны иҟоу аҭагылазаашьа. Имҩаԥгоу ауснагӡатәқәа иахәҭоу алҵшәақәа рымам. Ашәахьаҽны Апарламент ахь иалаҳгалоит административтә зинеилагарақәа рзы азакәанеидкылаҟны аҭакԥхықәра арӷәӷәара иазку азакәанапроектқәа.
Аҳәара ҟасҵоит арҭ апроектқәа зегьы адгылара рышәҭарц азы. Азакәанапроектқәа иазԥхьагәарҭоит акриптовалиута изакәанымкәа арҳара иадҳәалоу ахараԥастә санкциақәа акырынтә рышьҭыхра.  


Иазԥхьагәаҭахоит амыругақәа рымхра иазку ауснагӡатәқәа, иаҭаххар ашьаус ҭакԥхықәра адҵарагьы. Исҭахын, хара имгакәа апроектқәа ҭҵааны ари апроблема шәахәаԥшыр. АЕА «Амшынеиқәафымцамчи» Аҩныҵҟатәи аусқәа рминистрреи рымчала мацара ари апроблема узыӡбаӡом, ара еиҿкаау аусеицура мҩаԥгатәуп. Абри инамаданы арахь шәаасыԥхьеит, аҳәарагьы ҟасҵоит ари азҵаараҟны адгылара сышәҭарц.  

Иахьатәи ҳаиԥылара схы иархәаны, исҳәар сҭахуп Аконтрольтә палата агәаҭарақәа аихшьалақәа рыла 38 материал  Апрокуратура хадахьы ишрыҭоу. Аматериалқәа 6 рыла аусура мҩаԥгоуп. Арҭ аматериалқәа рыла аҳәынҭқарра иаҭоу аԥхасҭа иартәоит амиллиард мааҭқәа, мааҭкгьы аҳәынҭқарра иазыргьежьӡам, аӡәызаҵәыкгьы иахьа дҭакӡам. Ари аҩыза зымҩаԥысуа еилкаатәуп, азинтә уснагӡатәқәа рырӷәӷәараҟынгьы шәсыдгылар сҭахын. Ҷыдала, акоррупциа аҿагылараҟны азакәанԥҵаратә актқәак аԥсахрақәа ралагалараҟны.  

Даҽа зҵаарак хшыҩзышьҭра ашәҭар сҭахуп, 2019 шықәсазы Апарламент ахь идәықәҵан еиҿкаау ацәгьоура аҿагыларазы азакәанапроект. Рыцҳарас иҟалаз, уигьы иахәаԥшӡам иахьа уажәраанӡа, абри адокументгьы шәахәаԥшыр сҭахын».  



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org