Ахада аԥсны-урыстәылатәи аҳәааҿы аужьратә пунктқәа гәеиҭеит

  Ахада аԥсны-урыстәылатәи аҳәааҿы аужьратә пунктқәа гәеиҭеит

Иахьа Аԥсны Аҳәынҭқарра Ахада Аслан Бжьаниа аԥсуа-аурыс ҳәааҿы аужьратә пунктқәа гәеиҭеит.

Аҳәынҭқарра Ахада ибеит ацитрусттә аамҭазы аидара документла аиқәыршәареи аҳәаахьчаратә хылаԥшреи шымҩаԥысуа.

Аужьра-гәаҭаратә усмҩаҧгатәқәа рҿы аԥсуа ган аҟнытә иалахәын Аҳәынҭқарратә ҳазалхратә еилакы ахада Гәырам Инаԥшьба, Аҳәынҭқарратә шәарҭадара амаҵзура ахантәаҩы ихаҭыԥуаҩ, Аҳәынҭқарратә шәарҭадара амаҵзура Аҳәаахьчаратә отриад аиҳабы Рустам Латипов, иара убас аҳазалхратә, аҳәаахьчаратә усбарҭақәа егьырҭ рнапхгаҩцәа.

Аурыс ган хаҭарнакра азыруан Краснодартәи атәылаҿацә Аҳәаахьчаратә усбарҭа аиҳабы Сергеи Махорин, Краснодартәи атәылаҿацә аҳазалхратә маҵзура аиҳабы инапынҵақәа назыгӡо Виачеслав Китаиски, Аԥсны иҟоу Урыстәылатәи Афедерациа Аҳазалхратә маҵзура аофициалтә хаҭарнак Константин Козлов.

Аҳәынҭқарра Ахада адырра ирҭеит аҳәынҭқарратә ҳәааҿы иҟоу аужьратә лшарақәа ртәы.
Арҭ азҵаарақәа ирылацәажәан Аԥсны Аҳәынҭқарра Ахада Аслан Бжьаниа Урыстәылатәи Афедерациахь ԥхынҷкәынмза 9 инаркны 19-нӡа иусуратә ныҟәарақәа раан.

Аҳәынҭқарра Ахада адырра злаирҭаз ала, имҩаҧыргаз ауснагӡатәқәа инарықәыршәаны, аидара мҩанызго машьына дук иаго агәаҭаратә аамҭа ԥшь-сааҭк иреиҳам.

Ҳазҭагылоу аамҭазы аҳәаа иахыгоуп 35 нызқь тонна рҟынӡа ацитрусттә аалыҵ. Иааидкыланы, Аҳәынҭқарратә ҳазалхратә еилакы адыррақәа рыла, ҳазҭоу ашықәс азы ацитрусттә аалыҵ аҽаҩра 3.5 рыла еиҳауп 2019 шықәса аасҭа. Ашықәс Ҿыц аламҭалазы ари аҭагылазаашьа иашыкьымҭахоит. Аҳәынҭқарра Ахада ирыдиҵеит иаарласны аҳәынҭқарратә ҳәаа ахысразы аусура дырӷәӷәарц.

Анаҩс, Ахада идырбеит Москва иалыршаз аиқәшаҳаҭрақәа инарықәыршәаны зеиҭашьақәыргылара хацыркхо ашьаҟауаа зықәсуа ажәытә цҳа.


Возврат к списку