Аҧсны Аҳәынҭқарра Ахада

 

Ихыркәшоуп Аԥсны Ахада Урыстәылатәи Афедерациаҟны усуратә ныҟәарала иҟазаара

19.12.2020

Ихыркәшоуп Аԥсны Ахада Урыстәылатәи Афедерациаҟны усуратә ныҟәарала иҟазаара

Аԥсны Аҳәынҭқарра Ахада Аслан Бжьаниа Урыстәылатәи Афедерациахь иусуратә ныҟәарақәа хыркәшоуп.

Аҳәынҭқарра Ахада Москва ақалақь аҿы иусуратә ныҟәарақәа мҩаԥысуан ԥхынҷкәынмза 11 инаркны 18-нӡа.
Аусуратә ныҟәарақәа рыпрограмма аҩныҵҟа иҟан Урыстәылатәи Афедерациа Ахада Иусбарҭеи Урыстәылатәи Афедерациа Аиҳабыреи рыҟны аиԥыларақәа.

Ирылацәажәан  пҳынҷкәынмза 12 рзы Шәача ақалақь аҟны Аԥсни Урыстәылеи рхадацәа Аслан Бжьаниеи Владимир Путини имҩаԥыргаз аиҿцәажәарақәа раан иалыршаз аиқәшаҳаҭрақәа апрактикаҟны рынагӡара иазку азҵаарақәа.

Имҩаԥысит аҳәынҭқарра Ахада А. Бжьаниеи Урыстәылатәи Афедерациа Ахада Иусбарҭа Анапхгаҩы ихаҭыԥуаҩ Сергеи Кириенкои реиԥылара. Ирылацәажәан аԥсны-урыстәылатәи аусеицура  мҽхакы ҭбаала азҵаатәқәа: афымцамчы азҵаара, аҳәынҭқарратә ҳәааҟны иҟоу аҭагылазаашьа, 2020-2022 шықәсқәа рызтәи Аԥсны Асоциалтә-економикатә ҿиара ацхрааразы аинвестициатә программа апроектқәа рынагӡара уҳәа ирызку азҵаарақәа.

Абарҭи егьырҭ  азҵаарақәеи ирзааҭгылан  Аԥсны Ахадеи Урыстәылатәи Афедерациа Ахада Иусбарҭа Анапхгаҩы ихаҭыԥуаҩ Дмитри Козаки реиԥылараан.

Имҩаԥысит Афедералтә министрреи аусбарҭақәеи рхадацәа  злахәыз аиԥыларақәа жәпакы.

Урыстәылатәи Афедерациа Агәабзиарахьчара аминистр Михаил Мурашкои Аслан Бжьаниеи реиԥылараан ирылацәажәеит агәабзиарахьчара ахырхарҭала аҩ-ганк  русеицура азҵаарақәа.

Ҷыдала, иазгәаҭан Урыстәылатәи Афедерациа Аԥсны короновирусттә ҿкы ачымазара иаҿагыланы имҩаԥнаго аусуреи Аԥсны атәылауаа рзы Ковид-19 авакциналаҵареи рус аҟни иҟанаҵо ацхыраара иадҳәалаз азҵаарақәа.

Аиԥылараҿы иалацәажәан аԥхьаҟа Аԥсны акардиологиатә центр аргылара азҵаара. Иара убас,  2021-2022ш.ш. аинвестпрограмма аҳәаақәа ирҭагӡаны иазырхиоуп амедико-техникатә дҵа ареспубликатә хәыҷтәы хәышәтәырҭа аргыларазы, уи Урыстәыла агәабзиарахьчара аминистрра ақәыршаҳаҭуп.  

Аԥсны Аҳәынҭқарреи Урыстәылатәи Афедерациеи рыбжьара авиаеимадара аартразы алшарақәа, В. Г. Арӡынба ихьӡ зху Аҟәатәи жәларбжьаратәи аҳаиртә баӷәаза аиҭашьақәыргылара, Ԥсоу аӡиас ала ажәытәтәи амашьынатә цҳа аиҭашьақәыргылара иадҳәалаз азҵаарақәа ирзааҭгылан Аԥсны Аҳәынҭқарра Ахада Аслан Бжьаниеи Урыстәылатәи Афедерациа атранспорт аминистр Витали Савелиеви реиԥылараҿы.  

Аиԥылара иалахәын Урыстәылатәи Афедерациа атранспорт аминистр актәи ихаҭыԥуаҩ, аҳаиртә транспорт Афедералтә усбарҭа анапхгаҩы Алеқсандр Нерадко, Урыстәылатәи Афедерациа атранспорт аминистр ихаҭыԥуаҩ, Афедералтә мҩа аусбарҭа анапхгаҩы Андреи Костиук уҳәа аусбарҭа егьырҭ анапхгаҩцәа.

Аԥсны Аҳәынҭқарра Ахада Аслан Бжьаниеи Урыстәылатәи Афедерациа ақыҭанхамҩа аминистр Дмитри Патрушеви реиԥылараҿы ирзааҭгылан ақыҭанхамҩатә аалыҵ аус адуларазы анаплакы Аԥсны аартра азҵаара, шықәсырацәалатәи асубтропикатә культуратә баҳчақәа рааӡареи рышьақәыргылареи, арахәааӡара, аԥсаатәааӡара, аԥсыӡтә нхамҩа аԥхьаҟа рырҿиара иазку азҵаарақәа жәпакы.  

Аиԥылара  иалахәын Аԥсны Аԥыза-министр актәи ихаҭыԥуаҩ, Аԥсны ақыҭанхамҩа аминистр Беслан Џьапуа, Урыстәылатәи Афедерациа ақыҭанхамҩа аминистр актәи ихаҭыԥуаҩ  Џьамбулат Хатуов.

Аԥсны Ахада иусуратә ныҟәарақәа рҳәаа иҭагӡаны уи диԥылеит Урыстәылатәи Афедерациа афинансқәа рминистр. Аслан Бжьаниеи Антон Силуанови Аԥсни Урыстәылеи асоциалтә-економикатә ҿиареи афинанстә усеицуреи крызҵаарақәа ирзааҭгылеит. Урыстәыла афинансқәа рминистрра анапхгаҩы дызлахәыз аиԥылара далахәын аԥыза-министр, Аԥсны аекономика аминистр Кристина Озган.

Аԥсны Аҳәынҭқарра ашәахтә напхгараҭараҟны урыстәылатәи атехнологиақәа рхархәаразы алшарақәа ирылацәажәан Аԥсны Аҳәынҭқарра Ахада Аслан Бжьаниеи Урыстәылатәи Афедерациа Афедералтә шәахтә маҵзура анапхгаҩы Даниил Егорови реиԥылараан. Аиԥылара далахәын аԥыза-министр, аекономика аминистр Кристина Озган.

Аганқәа иазгәарҭеит алҵшәа бзиа змоу аԥхьаҟатәи русеицура ишақәгәыӷуа атәы.  
    
Аусуратә ныҟәараан имҩаԥысит иара убас Аԥсны Аҳәынҭқарра Ахада Аслан Бжьаниеи Афедералтә шәарҭадара амаҵзура адиректор Александр Бортникови реиԥылара.

Ашәарҭадара азҵаарақәа ирызкын Аԥсны Ахадеи Урыстәылатәи Афедерациа Ашәарҭадара Ахеилак амаӡаныҟәгаҩ ихаҭыԥуаҩ Рашид Нургалиеви реиԥылара.

Аԥсни Урыстәылеи рҳазалхратә усбарҭақәа русеицура иадҳәалоу азҵаарақәа ирылацәажәан Аԥсны Ахада Аслан Бжьаниеи Урыстәыла Афедералтә ҳазалхратә маҵзура Адиректор Владимир Булавини реиԥылара.

Аԥсны Ахадеи АҲМ Адиректори алацәажәеит  аԥсны-урыстәылатәи аҳәаа иахыганы ацитрустә ҽаҩра амҩангараан  ицәырҵуа ауадаҩрақәеи аҭагылазаашьа аиӷьтәразы зыда ԥсыхәа ыҟам ауснагӡатәқәеи ртәы.  

Аслан Бжьаниа иара убас дырԥылеит Москва Аиҳабыра рминистри, Москва ақ. Адәныҟаекономикатәи жәларбжьаратәи аимадарақәеи р-Департамент анапхгаҩы Сергеи Чериомини, аџьынџьуаа Москватәи рыҩны адиректор Пиотр Гладкови.

Аусуратә ныҟәарақәа рҳәаа иҭагӡаны, иара убас имҩаԥысит Аԥсны Аҳәынҭқарра Ахада Аслан Бжьаниеи Москватәи аԥсуа диаспореи реиԥылара.  
  
Аҳәынҭқарра Ахада инарҭбааны далацәажәеит Урыстәылатәи Афедерациа Ахада Иусбарҭеи Аиҳабыреи рыҟны имҩаԥгаз аиԥыларақәа ртәы.
Аслан Бжьаниа Москватәи аԥсуа диаспора иҭабуп ҳәа реиҳәеит короновирусттә ҿкы чымазара ӷәӷәала Аԥсны иалаҵәаны ианыҟаз аамҭазы иҟарҵаз ацхырааразы, иҳәеит аԥхьаҟа  уи иаҿагыланы ақәԥаразы иазԥхьагәаҭақәоу ртәы.

  Ахада иара убас дахцәажәеит афымцам инамаданы иҟоу ауадаҩрақәеи абри аусхк аҟны ишьақәгылаз аҭагылазаашьа алҵразы мҩақәас иҟоуи ртәы.
  
Москва, Аԥсны Ахада Аслан Бжьаниа жәларбжьаратәи аинформациатә телеканал  «Russia Today» (Урыстәыла Иахьа) аинтервиу аиҭеит.

Аҳәынҭқарра Ахада иналукааша ателеканал ажурналист Роман Косариов короновирусттә ҿкы ачымазара иаҿагыланы ақәԥара, аԥсны-урыстәылатәи аизыҟазаашьақәа, Аладатәи Кавказ иҟоу аҭагылазаашьа уҳәа ирызкыз изҵаарақәа рҭакқәа ҟаиҵеит.

Ахада иҿцәажәара аефирахь иҭыҵуеит анаҩстәи амчыбжь азы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org