Аҧсны Аҳәынҭқарра Ахада

 

Ахада УА Ақыҭанхамҩа аминистр Актәи ихаҭыԥуаҩ дидикылеит

27.11.2020

Ахада УА Ақыҭанхамҩа аминистр Актәи ихаҭыԥуаҩ дидикылеит

Аԥсны Аҳәынҭқарра Ахада Урыстәылатәи афедерациа Ақыҭанхамҩа аминистр Актәи ихаҭыԥуаҩ Џамбулат Хатуов дидикылеит.
Џамбулат Хатуов Аԥсны Ахада Аԥсны Аҳәынҭқарра Аконституциа амш идиныҳәалеит.

Аҳәынҭқарра Ахадеи УА Ақыҭанхамҩа аминистр Актәи ихаҭыԥуаҩи агроааглыхратә комплекс аҟны аԥхьаҟатәи аусеицура иалацәажәеит. Аиԥылараҟны иазгәаҭан аусеицура амҽхак арҭбааразы алшарақәа ирымоу аҵак ду.

Аслан Бжьаниа дазааҭгыланы иҳәеит ақыҭанхамҩатә усхк атәыла анапхгараҟны аԥыжәара змоу ахырхарҭақәа ишыруаку  

  «Уи ҳара ҷыдала аҵак ду аҳҭоит, избанзар ақыҭа аиқәырхарала ҳмилаҭ рбызшәа, ркультура, рхаҭара еиқәҳархоит. Ҳара ақыҭа арҿиара ҳашьҭоуп»,- иҳәеит аҳәынҭқарра анапхгаҩы. Уи иҳәеит ҳазҭагылоу аамҭазы ахархәаратә џьармыкьа  2/3 аимпорттә аалыҵра ала ишышьақәгыло.  «Ҳарада, ауадаҩрақәа иҟоу маҷӡам. Аха ҳгәыӷуеит ҳалшарақәа еицҵаны арҭ апроблемақәа реиҳарак ҳариааиуеит ҳәа»,-  азгәеиҭеит А.Бжьаниа.

Џамбулат Хатуов иҳәеит аусеицура дшазхиоу. «Иазԥхьагәаҭоу аусмҩаԥгатәқәа аҵак дугьы, хәарҭарагьы рымоуп Аԥсны азеиԥш, Урыстәыла азгьы. Ҳара ибзианы еилаҳкаауеит ҳамч еилаҵаны ҳҳәынҭқаррақәа рыбжьара ақыҭанхамҩақәа рырҿиара алҵшәа бзиақәа шаиуа»,- иҳәеит УА ақыҭанхамҩа аминистр ихаҭыԥуаҩ.
Аслан Бжьаниеи Џамбулат Хатуови агәаларшәагатә ҳамҭақәа еимырдеит.  

Анаҩс имҩаԥысит Урыстәыла Ақыҭанхамҩа аминистрра аделегациеи, ареспублика ақыҭанхамҩатә усхкқәа рнапхгаҩцәеи, ақалақьқәеи араионқәеи рхадацәеи злахәыз аилацәажәара нарҭбааны.

Аиԥылара далахәын Аԥсны Аԥыза-министр Актәи ихаҭыԥуаҩ, ақыҭанхамҩа аминистр Беслан Џьапуа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org