Аҧсны Аҳәынҭқарра Ахада

 

Ахада Аладатәи Кавказ азҵаарақәа рзы аҳаҭарнак ҷыда напхгара зиҭо Евроеидгыла аделегациа идикылеит

14.10.2020

Ахада Аладатәи Кавказ азҵаарақәа рзы аҳаҭарнак ҷыда напхгара зиҭо Евроеидгыла аделегациа идикылеит

Аԥсны Аҳәынҭқара Ахада Аслан Бжьаниа Аладатәи Кавказ азҵаарақәа рзы аҳаҭарнак ҷыда напхгара зиҭо Евроеидгыла аделегациа идикылеит.

«Бзиала шәаабеит ҳәа шәасҳәоит Аԥсны! Хаҭала ҳаибадырра сеигәырӷьоит. Сгәы иаанагоит иахьатәи аиԥылара аимак зыбжьоу аганқәа рыбжьара аҭынчреи агәреибагареи рышьақәыргыларазы хәарҭа аманы имҩаԥысып ҳәа.

  Сара излеилыскаауа ала, шәара шәмиссиа хадагьы абри иазкуп. Ҳара аҭагылазаашьа аруадаҩра ҳашьҭаӡам, аибашьра ҳҭахӡам. Аӡәы идгьыл имаҳкуам, ҳара ҳтәгьы аӡәгьы иаҳҭаӡом. Ҳҳәынҭқарра аргылара, арҿиара ҳаҿуп. 12 шықәса раахыс Женеватәи аиԥыларақәа рыла адунеитә уаажәларра рҟынӡа инаҳгар ҳҭахуп ҳпозициа. Ҳара ԥасеиԥш иахьагьы амч ахамырхәаразы Аиқәшаҳаҭра аҵаҩра аҭахны иҳаԥхьаӡоит, ҳагьгәыӷуеит Европатәи аидгыла абас еиԥш иҟоу аиқәшаҳаҭра аҵаҩра иацхраауеит ҳәа»,- азгәеиҭеит Аслан  Бжьаниа аиԥылара аартуа.

   Аладатәи Кавказ азҵаарақәа рзы ЕА аҳаҭарнак ҷыда Тоиво Клаар Аԥсны Ахада иҭабуп ҳәа еиҳәеит иҟаиҵаз адкыларазы. «Иҭабуп ҳәа шәасҳәарц сҭахуп аамҭа ԥшааны ҳахьшәыдышәкылаз. Сгәы иаанагоит аганқәа зыӡбара хшыҩзышьҭра арҭаша азҵаарақәа зегьы рылацәажәара ҳалшап ҳәа. Европатәи аидгыла ахьӡала арегион аҟны аҭышәынтәалара ыҟазарц шаҳҭаху атәы ҳҳәарц ҳҭахуп, Аԥсны аԥхьаҟагьы ацхыраара аҭаразы алшара ҳашәҭап ҳәа ҳгәыӷуеит», - иҳәеит ЕА ахаҭарнак ҷыда.

Аиԥылараҟны ирылацәажәан имҩаԥысраны иҟоу аҭышәынтәалареи ашәарҭадареи ирызку Женеватәи аиԥыларақәа ртәы. ЕА ахаҭарнакцәа иара убас ирҳәеит ареспублика короновирустә ҿкы аҿагылараҟны ацхыраара арҭарц ргәы ишҭоу.  

Аиԥылара иалахәын иара убас Адәныҟатәи аусқәа рминистр Даур Ақаҩба, Аладатәи Кавказ азҵаарақәа рзы ЕА аҳаҭарнак ҷыда иполитикатә абжьгаҩ  Биорн Киуне, ЕА аҳаҭарнак ҷыда иофис аполитикатә абжьгаҩ Еммануель Анкетильи, ОБСЕ аполитикатә абжьгаҩ Готтфрид Ханне.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org