Аҧсны Аҳәынҭқарра Ахада

 

Ахада арҵаҩцәа рзанааҭтә ныҳәа рыдиныҳәалеит

05.10.2020

Ахада арҵаҩцәа рзанааҭтә ныҳәа рыдиныҳәалеит

Аҧсны Аҳәынҭқарра Ахада Аслан Бжьаниа арҵаҩцәа рзанааҭтә ныҳәа рыдиныҳәалеит:

"Акыр иаҧсоу ҳарҵаҩцәа!

Ишәыдысныҳәалоит шәзанааҭ амшныҳәа. Арҵаҩы – ари ажәа зегьы ҳзы лымкаала аҵак ду амоуп.  Уи амч, заанаҭк ааҳәаа иузҭагӡом. Ҳзыхшаз ҳҭаацәа рнаҩсан аҧсҭазаара ҳазланысуа адыррақәа ҳазҭо, 11 шықәса знапы ҳану ҳарҵаҩцәа роуп. Дара  роуп изааӡо уаҵәтәи аҳақьымцәа, анџьнырцәа, аҳәынҭқарра напхгара азҭараны иҟоу аполитикцәа.

Аҧсны жәлар зегь рыхьӡала иҭабуп ҳәа шәасҳәоит ҿыц игыло абиҧарақәа рааӡараҿы ижәбо аџьабаазы. Ихьанҭаз аибашьра ашьҭахьтәи ашықәсқәа раан иҟаз ауадаҩрақәа чҳаны, шәгәы камыжькәа шәзанааҭ шәазыхынҳәны ҳашколқәа реиқәырхара ахьалшәыршаз фырхаҵара дуны исыҧхьаӡоит. Уи ахашҭра аӡәгьы азин имаӡам.

Сынтәа шәзанааҭ ныҳәа азгәашәҭоит имариам аамҭазы. Адунеи зымҽхазкыз ачымазара бааҧс ҳашколқәагьы ирхьымсыр амуит. Ажәлар ирбоит шәара иаашәырҧшуа агәцаракра, ҳхәыҷқәа шәышрыхӡыӡаауа. Сшәыҳәоит абри аамҭазы шәаргьы шәхы шәеиҷаҳарц. Аҳәынҭқарра анапхгара ирылшо зегь ҟарҵалоит ҳашколқәа, иааизакны аҵарадырра  аусхк адгылара аҭаразы.

Иҳазгәакьоу ҳарҵаҩцәа, ишәзеиҕьысшьоит агәабзиара, шәнапы злаку иҧшьоу аус аҿы ақәҿиарақәа, шәҭаацәарақәа рҿы аманшәалара!"


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org