Аҧсны Аҳәынҭқарра Ахада

 

Ахада аҧсуа милициа аусзуҩцәа аҳаҭыртә шәыҟәқәа риҭеит

29.09.2020

Ахада аҧсуа милициа аусзуҩцәа аҳаҭыртә шәыҟәқәа риҭеит

Аҧсны Аҳәынҭқарра Ахада Аҧсны Аҩныҵҟатәи аусқәа рминистрра аусзуҩцәа иранеишьеит аҳаҭыртә шәыҟәқәа.

Иахьа Ахада ашәарҭадареи ауаажәларратә зинтә леишәеи ралыршареи рмаҵуратә уал ламысла анагӡареи рзы хаҭала аҳаҭыртә шәыҟәқәа ранаишьеит: Амилициа аполковникеиҵбы Игор Базильски  АА ААР акадртә еилазаара азыҟаҵаразы;  

Ашәарҭадареи ауаажәларратә зинтә леишәеи ралыршареи рмаҵуратә уал ламысла анагӡареи рзы амилициа алеитенант еиҳабы,   АА ААУ Ирласны аҭакҟаҵаразы иҷыдоу аотриад опермчызмоу  еиҳабы Саид Базба;  амилициа алеитенант, АА ААР Ашьаустә ҧшааразы аусбарҭа азинмчызмоу Татиана Агәмаа;

Ауаажәларратә зинтә леишәа ахьчара гәацҧыҳәарала аҽалархәразы,  абџьарла еибыҭаз атәылауаҩ ишьҭазаараан иааадырҧшыз агәҽанызааразы, агәаҕьреи, аус дыррала азнеиреи рзы ААР Арҵаратә Центр 2-тәи акурс акурсантцәа Асҭан Ҭарбеи Аслан Шониеи.

Аҳәынҭқарра Ахада амилициа аусзуҩцәеи акурсантцәеи ирыдиныҳәалеит Аиааиреи Ахьыҧшымреи рымш.

Адныҳәаларатә ажәахә аҟны иҳәеит:  «Сара сзы гәахәароуп ара шәыдкылара, иахьа, ҳныҳәа ду аламҭалазы. Сара ҳаҭыр дула сырзыҟоуп аҩныҵҟатәи аусқәа рминистрра аусзуҩцәа. Сара ибзианы издыруеит аусбарҭа иамоу, иааидкыланы азинхьчаратә усбарҭақәа ирымоу ауадаҩрақәа ртәы. Ибзиоуп аҿар ахьыҟоу, аҧхьаҟа инапхгаҩцәаны иҟалаша, ианакәзаалак знапынҵа анагӡара иазхиоу, ргәабзиаразагьы, рыҧсҭазааразгьы шәарҭара аныҟоу.  Ари азы иҭабуп ҳәа шәасҳәар сҭахуп.
Иара убас ишәасҳәаргьы сҭахуп, хара имгакәа, мызқәак рыла аҩныҵҟатәи аусқәа рминистрра аусзуҩцәа руалафахәқәа шышьҭыххо. Аҧхьаҟагьы аҩныҵҟатәи аусқәа рминистрра аусзуҩцәа ганрацәала ацхыраара рыҭара ҳгәы иҭоуп.   Ҳтәылауаа атәылаҟны азинтә леишәа шьақәыргылазар рҭахуп. Ари иаҧырхагоу рацәоуп даара, аидара зегьы амилициа аусзуҩцәа рыжәҩа иқәуп. Иахьа иҳамоу алшарақәа зеиҧшроу еиҧш ҳныҟәоит, аха шьаҿа-шьаҿала ацхыраара шәыҭара ҳалагоит».

Аслан Бжьаниа иара убас амилициа аусзуҩцәа аныҳәа ахьӡала аҧаратә ҳамҭақәа риҭеит.  

Аиҧылара иара убас далахәын Ахада Иадминистрациа анапхгаҩы Алхас Кәыҵниа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org