Аҧсны Аҳәынҭқарра Ахада

 

Ахада аҵаҩцәеи, арҵаҩцәеи, аҭаацәеи аҵарашықәс ҿыц алагамҭаиныҳәалеит

01.09.2020


Аҧсны Аҳәынҭқарра Ахада Аслан Бжьаниа аҵарашықәс ҿыц алагамҭа рыдиныҳәалеит аҵаҩцәеи, арҵаҩцәеи, аҭаацәеи.

Адныҳәаларатә шәҟәаҿы иҳәоуп:

"Акыр иаҧсоу аҵаҩцәа, арҵаҩцәа, аҭаацәа!

Ишәыдысныҳәалоит аҵарашықәс алагара!

Сынтәа даҽа аамҭак еиҧшымкәан зегь шәазыҧшын ари амш. Адунеи зегь зымҽхазкыз ачымазара иахҟьаны шықәсыбжак иеиҳауп шәара шәҵараиурҭақәа рахь шәымныҟәоижьҭеи, убри аҟнытә иахьатәи амш лымкаала иацуп агәхьаагареи агәбылреи.

Хымҧада, сынтәатәи аҵарашықәс уаанӡатәиқәа излареиҧшым рацәахоит. Макьана иҳамазароуп агәҽанызаара, ҳрықәныҟәалароуп аҳақьымцәа иҟарҵо абжьгарақәа, аамҭала иаанаҳкылароуп бзиа иаабо ашколтә ныҳәақәа рымҩаҧгареи, аспорттә еицлабрақәеи.  Зегь агәра ҳгоит арҭ ауадаҩрақәа лассы ишымҩасуа, ҳшазыхынҳәуа ҳзышьцылахьоу, усхк рацәала ибеиоу ашколтә ҧсҭазаара.

Лымкаала срыдныҳәалар сҭахуп раҧхьаӡа акәны ашкол ахь зшьапы еихызго ахәыҷқәа.

Иахьа инаркны шәара шәанылоит иҭбаау, зегь рыла ибеиоу аҵара, адырра амҩа. Ишәыцзааит еснагь аманшәалара, агәалаҟазаара бзиа, ишәзеиҕьасшьоит ақәҿиарақәа.
Аҵара, адырра аусхк аҳәынҭқарраҿы лымкаала хшыҩзышьҭра зыҭатәу хырхарҭоуп. Ҳашколқәа рҿы ауп иахьеиқәҳархо ҳбызшәа, иахьаҳааӡо аҧхьаҟатәи аҳақьымцәа, анџьнырцәа, аекономистцәа, аҧсуа ҳәынҭқарра уаҵәы напхгара азҭо аполитикцәа.

Абжьаратә зеиҧштә ҵараиурҭақәа иахьатәи русура ианыҧшыр ауӡом ҳҳәынҭқарра уаҵәтәи аҧеиҧш. Иҭабуп ҳәа шәасҳәоит ҳарҵаҩцәа. Шәара шәусураҿы ишәҧыло ауадаҩрақәа шмаҷымгьы, шәгәы ацәкамыжькәа аҿар рааӡара шәаҿуп. Ижәдыруаз, аҳәынҭқарра анапхгара рҟынтә еснагь адгылара шшәыҭахо.

Иҳазгәакьоу ашколхәыҷқәа, акыр иаҧсоу арҵаҩцәа, ишәзеиҕьасшьоит агәабзиара, аманшәалара, аихьӡара дуқәа!"


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org