Аҧсны Аҳәынҭқарра Ахада

 

Ахада хатәгәаҧхарала Аҧсны Аџьынџьтәылатә еибашьра иалахәыз дырҧылеит

14.08.2020

Ахада хатәгәаҧхарала Аҧсны Аџьынџьтәылатә еибашьра иалахәыз дырҧылеит

Аҧсны Аҳәынҭқарра Ахада 1992-1993 шш. Аҧсны Аџьынџьтәылатә еибашьра иалахәыз хатәгәаҧхаралатәи аибашьцәа - аветеранцәа идикылеит. Урҭ Аҧсны иаҭааит Хатәгәаҧхаралатәи аибашьҩы имш иазку аусмҩаҧгатәқәа рыҽрылархәразы.  

"Бзиала шәаабеит! Сара сзы акраҵанакуеит Ахада иаҳасабала ас еиҧш аиҧылара амҩаҧгара!»,- иҳәеит Аслан Бжьаниа, аибашьцәа-аветеранцәа аҧсшәа раҳәо.
Аҳәынҭқарра ахада иазгәеиҭеит Аиааира агараҟны хатәгәаҧхаралатәи аибашьцәа рлагаламҭа.   «Аҧсны абиҧарақәа зегьы шәара шәџьабаа рдыруеит, ахәгьы ҳаракны иршьоит.  Иҭабуп ҳәа шәасҳәоит. Даҽазныкгьы абри ахшыҩҵак иаҵшьны исҳәарц сҭахуп:  Аҧсны шәара Шәыҧсадгьыл ауп, уи азы ашьа кашәҭәеит, шәхы шәамеигӡеит. Уи ҳара бзанҵыкгьы иаҳхашҭраны ҳаҟаӡам.  Шәгәы бзиаз, насыҧ шәымаз. Сара есқьынгьы шәара ианышәҭаху шәҧылара сазхиоуп.  Даҽазныкгьы иҭабуп ҳәа шәасҳәоит Аҧсны жәлар рыхьӡала иаашәырҧшыз афырхаҵаразы", - иҳәеит А. Бжьаниа.

Аиҧылараҟны ирылацәажәан иара убас аибашьцәа – аветеранцәеи урҭ рҭаацәеи зыниало ауадаҩрақәа: Аҧсны атәылауаҩра аиура, Аҧсны аҧсшьара аиҿкаара иадҳәалоу азҵаарақәа уҳәа уб.егь. Ахада ишҟа аҳәара ҟаҵан хабарда ибжьаӡыз аибашьцәа рыҧшаараҟны ацхырааразы. Ахада арҭ азҵаарақәа рыӡбараҟны ацхыраара шыҟаиҵо азы ажәа риҭеит.  

Аиҧылара иалахәын иара убас Ахада Ихаҭыҧуаҩ Бадра Гәынба, Ахада Иадминистрациа Анапхгаҩы Алхас Кәыҵниа, Аҟәа ақ. Администрациа ахада ихаҭыҧуаҩ Авҭандил Сурманиӡе.

Хатәгәаҧхаралатәи аибашьцәа реиҿкаара ахаҭарнакцәа Ахада иреиҳаӡоу аҳәынҭқарратә маҵзурахьы иалхра идырныҳәалеит, изеиҕьаршьеит аихьӡарақәа.  

Ҟабарда-Балкариатәи аибашьҩы – аветеран Ҭемыр Шарданов Аслан Бжьаниа ҳамҭас ииҭеит ашәҟәы "Ачерқьес диаспора".


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org