Аҧсны Аҳәынҭқарра Ахада

 

Ахада 2008 шәықәса нанҳәамза 8 рзы Алада Уаҧстәыла иҟалаз ахҭысқәа раан иҭахаз ҳаҭырла игәалаиршәеит

08.08.2020

Аҧсны Аҳәынҭқарра Ахада Аслан Бжьаниа Аҧсны Аҳәынҭқарраҟны иҟоу Алада Уаҧстәыла ацҳаражәҳәарҭаҟны 2008 шәықәса нанҳәамза 8 рзы Қырҭтәыла аганахьала ақәылараан Алада Уаҧстәылан иҭахаз ҳаҭырла игәалаиршәеит.  

"Иахьа Алада Уаҧстәыла ҳаиашьаратә жәлар аҭоурых аҟны иҟалаз атрагедиатә хҭыс ҳгәалаҳаршәоит. 12 шықәса раҧхьа 2008 шәықәса нанҳәамза 8 рзы аҵх агәазы ақырҭуа ар ҭынч ицәаз Цхинвал ақалақь иақәлеит. Усҟан иҭахеит хара змамыз ауаа, урҭ рыҩныҵҟа иҟан ахәыҷқәа, аҳәса, абыргцәа»,- иҳәеит аҳәынҭқарра Ахада.
«Абри амш аҽны ҳара ҳхырхәоит зыҧсадгьыл зхы ақәызҵаз афырхацәа рыхьӡала, урҭ рфырхаҵара аҧсадгьыл амаҵ ауразы иҿырҧшыгахоит. Рыхьӡ кашәара ақәымзааит аибашьцәа – аҧсадгьыл ахақәиҭразы ақәҧаҩцәа», - иазгәеиҭеит аҳәынҭқарра Ахада.

2008 шықәса нанҳәамза 8 трагедиатә рыцхәуп, аха ари амш афырхаҵарагьы иамшуп. «Ари амш Аҧсадгьыл ахьчаҩцәа рфырхаҵара, ргәымшәара ирсимволуп. Алада Уаҧстәыла ахьчаҩцәа рфырхаҵара, ргәымшәара иасимволуп. Алада Уаҧстәыла аҵеицәа ргәы еиҭамҧеит, хацәнмырха игылеит рыжәлари Рыҧсадгьыли рыхьчаразы»,- иҳәеит Аҧсны Ахада.

  А.Бжьаниа иажәақәа рыла, «2008 шықәса нанҳәамза ахҭысқәа адунеи зегьы иадырбеит Урыстәыла Дуӡӡа арыцҳара ианиаз аҩызцәа ианаҭахха адгылара шрынаҭо. «Урыстәыла анапхгара ианаамҭаз иҟанаҵаз ацхыраарала агрессор ируаа ҧыххаа иқәҵан», - иҳәеит А.Бжьаниа.

Аҳәынҭқарра Ахада  иара убас 2008 шәықәса нанҳәамзатәи атрадегиатә хҭысқәа  ирызкыз ацәыргақәҵа даҭааит, агәалашәара ашәҟәы аҟны анҵамҭа нижьит.  
Аҧсны Аҳәынҭқарра Ахада Аслан Бжьаниа, Ахада ихаҭыҧуаҩ  Бадра Гунба, аиҳабыра минуҭктәи аҿымҭрала 2008 ш. нанҳәамзазатәи атрагедиааан иҭахаз ргәаладыршәеит.  

Аҧсны иҟоу Алада Уаҧстәыла Ацҳаражәҳәаҩ Олег Боциев Аҧсны Ахада иҭабуп ҳәа еиҳәеит иҟаиҵаз адгыларазы. «2008 шықәса нанҳәамзазы иҟалаз арыцҳара ду  аан иҭахеит акгьы зхарамыз ауааҧсыреи хамеигӡарак ҟамҵакәа игылаз, Алада Уаҧстәыла ахьчара уалны изыҧхьаӡаз урыстәылатәи абжьаҟазаҩцәеи»,- иҳәеит иара.
«2008 шықәса нанҳәамза 8 Алада Уаҧстәылеи Урыстәылеи рзы ахақәиҭразы ақәҧареи, афырхаҵареи, аицхыраареи ирсимволны иҟалеит», - иҳәеит  Аҧсны Аҳәынҭқарраҟны иҟоу Урыстәылатәи Афедерациа Ацҳаражәҳәарҳәаҩ иабжьгаҩ Максим Литвинов.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org