Аҧсны Аҳәынҭқарра Ахада

 

Ахада Владимир Аҩӡба иҭаацәа дрыдышшылеит

21.07.2020

Аҧсны Аҳәынҭқарра Ахада Аслан Бжьаниа Владимир Аҩӡба иҧсҭазаара иалҵра инамаданы иуацәеи иҭынхацәеи дрыдышшылеит.

Адышшыларатә текст аҟны иҳәоуп:

Гәалсрала срыдышшылоит еицырдыруа ауаажәларратә, аҳәынҭқарратә усзуҩы, адипломат, ажурналист Владимир Аҩӡба иуацәеи иҭынхацәеи.
Владимир Џьамал-иҧа шықәсырацәалатәи иусураҟны, аус ахьиуазаалак, маҵурас иникылозаалак, апрофессионализм, ҭакҧхықәрала инапы иану аус анагӡара, ауаа ҳаҭырқәҵарала рызнеира иҟазшьан.

Ахә ашьара уадаҩуп Владимир Аҩӡба Ҭырқәтәыла инхо аҧсуаа реимадара, рҭоурыхтә ҧсадгьыл агәбылра дыркра аус аҟны илагаламҭа.

Владимир Џьамал-иҧа 20 шықәса инареиҳаны Ҭырқәтәыла Ареспубликаҟны Аҧсны Азинмчызмоу ахаҭарнак имаҵура наигӡон.  Инапы ианыз аус гәык-ҧсыкала иазнеира иабзоураны уи аҧсуа диаспора абзиабареи аҳатыри дрыҧсахеит. Ҭырқәтәыла инхо ҳџьынџьуаа зегьы ҭынхак еиҧш дырбо дҟалеит.  

Ихьанҭоу абри асааҭқәа рзы гәыкала рхьаа рыцеиҩысшоит, срыцгәырҩоит Владимир Аҩӡба иҭаацәа.  



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org