Аҧсны Аҳәынҭқарра Ахада

 

Ахада Аҧсны иҟоу Аҷыдалкаатәи Азинмчызмоуи УА ацҳаражәҳәаҩ дидикылеит

17.06.2020

Аҧсны Аҳәынҭқарра Ахада Аслан Бжьаниа Аҧсны Аҳәынҭқарраҟны иҟоу Урыстәылатәи Афедерациа Аҷыдалкаатәи Азинмчызмоуи ацҳаражәҳәаҩ Алеқсеи Двинианин дидикылеит.

Аиҧылара иалахәын иара убас Аҧсны иҟоу Урыстәыла Афедералтә шәарҭадара амаҵзура Аҳәаахьчаратә усбарҭа аиҳабы Алексеи Трубецкои, аинрал-амаиор, 7-тәи урыстәылатәи арратә база адҵаҟаҵаҩ, аполковник Олег Сеньков, Аҧсны иҟоу УА ацҳаражәҳәарҭа абжьагаҩцәа Александр Опарини Владислав Нечипоренкои, Аҧсны иҟоу Урыстәыла ААР ахаҭарнак Станислав Аҧсаа, Ахада Иусбарҭа Анапхгаҩы Алхас Кәыҵниа.

Аслан Бжьаниа асасцәа аҧсшәа раҳәо, иазгәеиҭеит астратегиатә ҩызара ҳзызуа – Урыстәылатәи Афедерациеи Аҧсни ҩ-ганктәи русеицура иамоу аҵак ду.  Аиҧылара мҩаҧысит аҳәынҭқарра Ахада Москваҟа ицара аламҭалазы. Аҧсны Аҳәынҭқарра Ахада Аслан Бжьаниа Урыстәыла Ахада Владимир Путин иааҧхьарала Аџьынџьтәылатә еибашьра дуӡӡа аҟны Аиааира 75 шықәса ахыҵра иазкны Москва имҩаҧысраны иҟоу аныҳәатә парад далахәхоит.  

"Иҳабжьоу аиҩызаратә еизыҟазаашьақәа ҳасаб рзуны, урыстәылатәи аҳәынҭқарра ахаҭарнакцәеи ҳареи Аҧсны адгьылҵакыраҟны аимадара бзиақәа ҳабжьазароуп ҳәа исыҧхьаӡоит. Москваҟа сцара аламҭалазы, хаҭала сшәацәажәар, ҩ-ганктәи аусеицура азҵаарақәак ҳрылацәажәарц   сҭахын»,- иҳәеит Бжьаниа.

Аҳәынҭқарра Ахада иажәақәа рыла, «Аидгыларатәии астратегиатәи усеицуразы» Аиқәшаҳаҭрала иазҧхьагәаҭоу аусмҩаҧгатәқәа жәпакы нагӡоуп, инагӡамгьы ыҟоуп. «Уи мзызс иамоу аилкаара аҭахуп ҳәа исыҧхьаӡоит. Аиқәшаҳаҭра ҳҳәынҭқаррабжьаратә еизыҟазаашьақәа алшара ҿыц, агәазҭаҵара ҿыц аҭара иазкын. Ари аиқәшаҳаҭра аҧҟарақәа рырҿиара Аҧсни Урыстәылеи ртәылауаа рзы акраҵанакуеит»,- иҳәеит Аслан Бжьаниа.

Аҧсны иҟоу Урыстәыла ацҳаражәҳәаҩ Алеқсеи Двинианин Аҧсны Ахада иҭабуп ҳәа еиҳәеит аиҧыларазы, иҳәеит Аҧсны анапхгара рыҟны аҳәынҭқаррабжьаратә документқәа зегьы рылацәажәара дшазхиоу, 2014 шықәсазтәи Аиқәшаҳаҭрагьы убрахь иналаҵаны.
  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org