Аҧсны Аҳәынҭқарра Ахада

 

Ахада хаҭалатәи аилазаара Атәылахьчара аминистр Владимир Ануа дыдирдырит

03.06.2020

  Ахада хаҭалатәи аилазаара Атәылахьчара аминистр Владимир Ануа дыдирдырит

Аҧсны Аҳәынҭқарра Ахада Аслан Бжьаниа хаҭалатәи аилазаара Атәылахьчара аминистр аинрал-аполковник Владимир Ануа дыдирдырит.

Аҳәынҭқарра Ахада иазгәеиҭеит аинрал аидара ду дшаҵало, агәра шигогьы иҳәеит Владимир Ануа инапхгарала Аҧсны арбџьар мчқәа рырҕәҕәаразы, арратә леишәа аиҿкааразы, арбџьар мчқәа ргәышьҭыхразы ихацырку аусқәа ишрыцҵахо, ишеихаҳахо.  

Аслан Бжьаниа иажәақәа рыла, аибашьроуп атәылауаҩ изанааҭ змаз ауаҩы Владимир Ануа ипрофессионалтәу аруаҩны дҟазҵаз.  «Шәара ибзианы дыжәдыруеит иара, аҵыхәтәантәи аибашьрашьҭахьтәи ашықәсқәа рыҩныҵҟа атәылахьчара аминистрраҟны иара амаҵура харакқәа ааникылоит»,- иҳәеит Ахада.
Атәылахьчара аусбарҭа ахада ҿыц атәыла анапхгара иҭабуп ҳәа реиҳәеит ирҭаз агәрагаразы, иҳәеит Арбџьармчқәеи аҳәынҭқарра ахьчаралшареи рырҕәҕәара аус аҟны илшо зегьы шыҟаиҵо.  

«Аҭагылазаашьа схы иархәаны, ҧасатәи атәылахьчара аминистр иҭабуп ҳәа иасҳәарц сҭахуп, илегендоу ар рҧыза, Мираб Борис-иҧа Қьишьмариа иҭабуп ҳәа иасҳәар сҭахуп. Мираб Борис-иҧа ҳарбџьармчқәа рҭоурых аҿы ихьӡ хьтәы нбанла анҵара илшеит.  Ари фактуп! Сгәы иаанагоит, аринахысгьы ҳара аҧхьаҟа ҳарбџьармчқәа ҳрызгәдуны ҳҟалоит ҳәа!», - иҳәеит аҳәынҭқарра ахада.

Ахада Мираб Қьишьмариа арратә уал анагӡараан иааирҧшыз агәымшәареи ахамеигӡареи рзы ианеишьеит "Афырхаҵара аорден".  
Иара убас Мираб Қьишьмариа АА атәылахьчара аминистр иабжьгаҩ хаданы дҟаҵоуп.    

   Аҧсны Аҳәынқарра Ахада Аслана Бжьаниа АА атәылахьчара аминистррраҟны иқәгылара атекст:  

Аҩызцәа аофицерцәа!
Аҧсны Аҳәынҭқарра Арбџьар мчқәа рыдҵаҟаҵаҩ хада иаҳасабала, сара сзы ҷыдала аҵак ду амоуп иахьатәи аиҧылара. Ари азал аҟны итәоуп ҳарбџьармчқәа рылшара зхьыҧшу аофицерцәа. Аҧсуа ар аҧсуа ҳәынҭқарра иақәлоуп. Иара ахыҵхырҭа “аҧсуа гвардиа” ҳәа изышьҭаз хазы игоу аҩныҵҟатәи архәҭақәа рышьақәгылара аҟнытә иаауеит.
Ари аполк аибашьцәа мчла еиҟарамыз аидыслараҟны ақырҭуа оккупантцәа ирҿагылеит 1992 шықәса нанҳәамза 14 рзы. Еиҧырҟьам ар, уи анапхгаратә усбарҭақәа - атәылахьчара аминистрреи аинралтә штаби раҧҵара мҩаҧысуан аџьынџьтәылатә еибашьраан. (Атәылахьчара аминистрреи Аштаб хадеи раҧҵаразы 1992 шықәса жьҭаарамза 11 аҟн. Аусҧҟа инапы аҵаиҩит Аҧсны Аҳәынҭқарра Иреиҳаӡоу Асовет Апрезидиум Ахантәаҩы Владислав Арӡынба).

Иахьа иаҳгәалаҳмыршәар ҟалом аҧсуа ар аҧҵаҩцәа, ҳар  рҧызацәа – Владимир Аршба, Сергеи Дбар, Султан Сосналиев. Раҧхьатәи Арбџьар мчқәа рыхәҭақәа ардыҧхьала аортиадқәа. Иахьа уажәраанӡагьы  амилаҭтә ар шьагәыҭс иамоуп ардыҧхьалацәа. Шәара аӡәырҩы шәеиҧш, Владимир Ануа, атәылауаҩ изанааҭ змаз ауаҩы, аибашьроуп ипрофессионалтәу аруаҩны дҟазҵаз. Шәара ибзианы дыжәдыруеит иара, аҵыхәтәантәи аибашьрашьҭахьтәи ашықәсқәа рыҩныҵҟа атәылахьчара аминистрраҟны иара амаҵура ҳаракқәа ааникылоит.
Сара агәра згоитт Владимир Ануа инапхгарала арбџьар мчқәа рырҕәҕәара, арратә леишәа аиҿкаара, Аҧсны Арбџьар мчқәа ргәышьҭыхразы ихацырку аусқәа ишрыцҵахо, ишеихаҳахо.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org