Аҧсны Аҳәынҭқарра Ахада

 

Аслан Бжьаниа Аҩныҵҟатәи аусқәа рминистрра аколлектив аминистр ҿыц дыдирдырит

04.05.2020

Аслан Бжьаниа Аҩныҵҟатәи аусқәа рминистрра аколлектив аминистр ҿыц  дыдирдырит

Аԥсны Аҳәынҭқарра Ахада Аслан Бжьаниа Аҩныҵҟатәи аусқәа рминистрра аколлектив аминистр ҿыц – Дмитри Дбар дыдирдырит.

Амилициа аусзуҩцәа злахәыз аиҧылараҟны Ахада Иадминистрациа анапхгаҩы Алхас Кәыҵниа Ахада Иусҧҟа даҧхьеит:

«Даҭазааит Аԥсны Аҳәынҭқарра Аҩныҵҟатәи аусқәа рминистрс Дбар Дмитри Сергеи-иҧа».

Аҳәынҭқарра Ахада Аслан Бжьаниа еизаз ихы рықәкны иҳәеит:

«Ҳаҭыр зқәу аҩызцәа, сара ибзианы еилыскаауеит аҵыхәтәантәи ашықәсқәа рзы шәусура анымҩаҧысуаз иҟаз аҭагылазаашьа. Ҳәарада, аусбарҭаҟны иҟоу апроблемақәа иахьа ицәырымҵӡеит. Аҩныҵҟатәи аусқәа рминистрра – аҳәынҭқарра аусбарҭа хадақәа ируакуп. Сара, аҳәынҭқарра ахада иаҳасабала, ААР аусура ҷыдала хылаҧшра азызулоит.

Даҽазныкгьы иҭабуп ҳәа иасҳәар сҭахуп Рауль Қьаазым-иҧа иара убас шәара зегьы имҩаҧыжәгаз аусуразы. Имариаӡамызт аҭагылазаашьа аҭышәныртәалара алхрақәа анымҩаҧысуаз. Аҳәынҭқарра шәусбарҭа ацхыраара анаҭалоит».

Аҳәынҭқарра Ахада Аслан Бжьаниа иҳәеит аусбарҭаҟны аиҭакрақәа ҟалар шауа, амчратә еилазаарақәа рҿы реформақәак шалагалахо.

«Иаҭахуп аусура ахаҭабзиара еиҕьызтәуа аиҭакрақәа. Абри инаваргыланы аминистрраҟны акраҵанакуеит иаартны аусура, иашьашәалоу аилазаарақәеи иареи русеицура, ҷыдала, апрокуратуреи аусбарҭеи. Ҳтәылауаа ршәарҭадара аҩаӡара ҳаракызароуп. Апрокуратура хадеи аӡбарҭақәеи рҽеимаданы русеицура ашәарҭадара ашьақәыргылара иацхраауеит. Аусбарҭа аусура ахаҭабзиара иақәнагоу ахәшьара аҭахоит», – иҳәеит аиҧылараан Ахада.

Аҩныҵҟатәи аусқәа рминистр Дмитри Дбар атәыла анапхгара иҭабуп ҳәа реиҳәеит ирҭаз агәрагаразы.

«Иҳалшо зегьы ҟаҳҵоит ҳҿаҧхьа иқәгылоу ауснагӡатәқәа рынагӡаразы. Еилаҳкаауеит ари шыуадаҩхо, аматериалтә техникатә база шхьысҳау. ААР аусзуҩцәа рнапы иану аҳасабтәқәа рынагӡаразы алшарақәа аҧҵахоит. Иҭабуп.», – иҳәеит аизара ахыркәшамҭазы Д. Дбар.

Аслан Бжьаниа ҧасатәи аминистр Рауль Смыр иҭабуп ҳәа еиҳәеит усдыррала аусбарҭа аусура азнеиразы.

Рауль Смыр иганахьала ААР аколлективи анапхгара ҿыци ирзеиҕьеишьеит рҿаҧхьа иқәгылоу ауснагӡатәқәа рынагӡараҟны аихьӡарақәа.

0X0A6799.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org